磚頭王 孭 2.3億獨立屋 咇多 1億入市 陳奕迅變樓奴老婆奴 [FACE - 416] MF, 陳奕迅,

陳奕迅同徐濠縈現時手持近 4億物業，努力賺錢供樓的 Eason，放假都會帶囡囡康堤（左）周圍玩。《蘋果日報》圖片

真面目

磚頭王　孭 2.3億獨立屋　咇多 1億入市　陳奕迅變樓奴老婆奴

今年 7月即將 41歲的陳奕迅（ Eason），忙住世界各地做巡唱，比宇宙漿更少時間經過香港。

密密做到冇停手，全因 Eason負擔太重。徐濠縈去年 1月以個人名義用 2.3億買入壽臣山道獨立屋，淨係供樓已經每月要 70萬！點知阿徐再睇準時機，去年 8月與 Eason再斥資 1億買入黃竹坑 3個商廈單位，總共孭住 3億幾樓債。

老婆入市咁進取，聽晒老婆話嘅 Eason都要巡唱多幾 round先夠供樓喇！

其他影片：>>10歲康提想有個妹　阿徐轉口風生多件

阿徐間時裝店 Liger愈做愈大，今年 2月喺尖沙咀 K-11又開分店，現時總共有 3間。網上圖片

出名錫老婆的陳奕迅，曾經講過唔介意徐濠縈做大花筒，不只一次開口護妻，「大使又點？我大把，使極都有，吹咩！」

睇中商廈升值

Eason搵錢能力高係事實，所以阿徐亦唔需要慳住用。去年 1月，阿徐以自己名用 2.3億買入壽臣山道 Shouson Hill獨立屋，大屋有花園同私人泳池，面積超過 3千呎，而且位於南區校網，絕對適合康堤成長。

老公搵到，樓市又唔似會冧，阿徐決定繼續入市。去年 8月，再扑搥以公司名義、以 1億購入黃竹坑環匯廣場 3個商廈單位。現時 3個單位全部升值，其中面積達 1萬呎的中層全層由買入時的 8,390萬，升至約 1.4億；另外兩個相連中層單位亦微升至約 1,250萬一個。

掃商廈

位於黃竹坑的環匯廣場，屬港島區甲級商廈。《蘋果日報》圖片

3單位未入伙

大廈現時只有幾層入咗伙， Eason手持的 3個單位，仍然空置中。

Eason分別以 3間公司名義買入環匯 3個單位，而 3間公司都有阿徐名，預埋老婆一份。

4千呎大屋裝修緊

阿徐去年用自己名買入的獨立屋，現時仲裝修緊，未入得伙住。

康堤想有個妹

港鐵南港島線下年開通，估計阿徐同 Eason的 3個商廈單位只會升得更高。投資有道，女兒康堤又已經 10歲，忙住打理 3間時裝店的 41歲阿徐，近日放風話想追多個，「有計劃過， Eason梗係想生時間無多，阿女都想要個妹妹！」

老婆開綠燈，一度灰爆怨阿徐唔合作的 Eason，早前提起生仔突然生猛，「有（ BB）梗係好事，有照應、有血緣，俾人炒咗都可以度兩嚿水！」講係咁講， Eason兩公婆有 4億物業在手，第時仔女被炒都未驚過

供樓負擔重， Eason惟有密密北上巡唱賺人仔。網上圖片

除咗開騷， Eason仲要接戲撈多瓣，嚟緊 6月佢同湯唯、周潤發主演、杜琪峯執導的《華麗上班族》將會上畫。新華社圖片

今年 3月， Eason（左二）與盛傳不和的 Wyman（左）同場為阿徐慶祝生日。網上圖片

生仔有得傾

女強人徐濠縈一向事業心重，而且近年迷上馬拉松，每年都要周圍飛參加比賽，忙過 Eason。 12年阿徐向傳媒表示未想追多個，拖得就拖，但最近突然轉口風話想生，睇嚟 Eason應該出咗好多力氹掂老婆喎！

網上圖片

'15想追女

有計劃過， Eason梗想生時間無多，阿女想要個妹！

'12拖住先

我好怕蛇，接受唔到 BB屬蛇，或者再下一年馬年先

鍾意就快D Share啦！

下一篇 》