追唔番 簽黎明八年貼 500萬 王歌慧得個吉 [壹週刊 - 1314] 黎明,M1,

探熱針

追唔番　簽黎明八年貼 500萬　王歌慧得個吉

04年泊埋林建岳碼頭成立 A Music後，黎明成功捧出衞蘭，亦同時嚇走唔少藝人。同大台一樣，個個走得都走，繼 JW（ Joey Wong）提早解約走人，旗下藝人王歌慧（ Emily）亦終於約滿，即走！在 A Music八年，拍過三部電視劇，一直靠屋企支持的她，在娛樂圈立足這些年，已經自貼五百萬，得個吉，但對一手帶入行的黎明， Emily依然感激：「 Leon其實對我好好，不過冇嘢俾我做啫！」

投閒置散

現年 25歲的王歌慧，在黎明公司一直被投閒置散，八年來出過一首單曲，拍過三部電視劇，因為港視劇集《來生不做香港人》大熱，在劇中扮演社運女神的她才叫人留意。

「可惜公司冇反應，亦冇幫佢做任何宣傳，套劇播完，佢又打回原形；就算而家做緊《驚異世紀》佢都有份，但做女鬼角色又冇得點發揮。」王歌慧身邊人說。

黎明家族曾經人強馬壯，他更曾經帶隊飛美國拍音樂特輯，包括有王歌慧（右一）、衞蘭兩姊妹、應昌佑，以及杜汶澤。首播日，黎明又揼本搞首映禮。

在《來生不做香港人》劇集中做社運女神，跟梁小冰有不少對手戲。

求籤問前程

約滿 A Music，王歌慧毫不猶豫走人，對再簽另一間公司，更加謹慎，甚至走去大坑蓮花宮求籤。

誠心裝香後，王歌慧再跪低求籤，聽完廟祝講解籤文，自己又問了幾個問題，才安心離開。

黎明揸弗的 A Music藝人買少見少，現在只剩李治廷未約滿，但他大部分時間在內地開工。

王歌慧日前到蓮花宮求籤問前程，聽完廟祝講解，她到附近的 Classified醫肚。

返屋企幫手

「其實 Emily比 Janice（衞蘭）仲早入公司，不過 Emily覺得自己唱得差，所以出咗一首單曲就放棄唱歌，改學演戲，但咁耐以嚟只係拍過三部劇，好彩佢屋企係做生意，咁多年都係靠老豆經濟支持，屋租生活每個月五萬，八年來都用咗屋企五百萬有多，佢今年約滿，屋企人都覺得係時候諗清楚，到底係咪仲要喺呢個圈發展，又勸佢唔好做，返老豆公司幫手。」

下一步如何打算，剛約滿 A Music的王歌慧說：「而家都傾緊幾間公司，我想趁自己仲後生再試吓。（求咗支咩籤？）支籤幾好㗎！叫我唔使擔心，其實我都唔知點算，但（解籤）師傅一開口就叫我唔使擔心。（八年拍得三個劇，點維持生活？）好彩我唔使養家，生活冇太大壓力，但大個女，始終都要自己養自己，希望之後可以將啲時間追返嚟。

「（有冇覺得嘥咗啲時間？）其實 Leon對我好好，只係冇嘢俾我做，每間公司有唔同作風， A Music重質不重量，好保護我哋，好多時都會篩選過，先俾我哋做。」王歌慧說。

全盛時期，黎明鍾意帶住藝人去活動，就連一姐李嘉欣都會參與出席。

剛簽約未幾，她拍的第一個 MV，黎明也有到場督工，當時她仍有 baby fat包包面。

10年，王歌慧 20歲生日，衞蘭跟應昌佑跟她慶祝生日。

冇工開，王歌慧大把時間飛去玩， instagram有不少她去墨西哥及出海曬太陽的旅行相。

清倉

連減肥都採取「唔郁著多啲衫」的自然方法，黎明主導的 A Music，對旗下藝人亦自有一套，在推 job多過接 job的作風下，公司藝人，雞飛狗走。

應昌佑　兼職賣水貨

02年被雷頌德邀唱電影《大城小事》插曲後簽約 A Music十年，初期得老闆黎明力捧推出專輯，可惜發展一直麻麻。 12年與拍拖九年的圈外女友 Mandy結婚，去年三月兒子出世，要養妻活兒的應昌佑面對現實，兼職做 sales賣水貨，同年滿約公司即撇。

衞蘭　自我放棄

是 A Music的首位正式簽約的歌手， 04年被安排翻唱黎明的金曲成名後，由出道至打入樂壇女歌手頭三甲，只花了兩年時間，大受年輕樂迷歡迎；可惜衞蘭身形亦隨人氣而暴脹，被老闆形容似「電單車」，甚至下令不減肥不開演唱會，可惜衞蘭減極唔瘦， 15年約滿分手。

陳小春　齋講唔做

與黎明 11年於內地合作電影《鴻門宴》獲對方主動邀請加盟 A Music，一直想再開個人演唱會的小春，最後只能跟好友鄭伊健、謝天華、錢嘉樂和林曉峰合作《友情歲月演唱會》，事業冇起色， 15年約滿唔續約。

楊千嬅　走得快好世界

07年楊千嬅加盟 A Music後首張唱片，堅持己見的黎明親自落手揀歌，可惜唱片推出成績好麻麻，令雙方埋下不和伏線。 09年千嬅爆出跟丁子高秘婚，同年推出與 A Music合作的最後一張唱片，走得快，好世界！。

JW　提早五年解約

10年加盟 A Music的 JW（ Joey Wong），因為要完成學業而英、港兩邊飛， 12年才正式加入樂壇，但其時黎明已開始不太積極於公司發展，出過兩張唱片的 JW之後亦只有機會出數碼單曲，不想浪費時間， 15年解約。

衞詩　冇 job唔解約

09年 4月，衞詩與男友關楚耀遊日時被控藏毒罪成，老闆黎明即時跟她解除歌手合約，卻保留經理人合約，直到 11年，才正式與她解除經理人合約，放生！

文詠珊　和平分手

𡃁模始祖文詠珊（ Janice Man） 09年簽約 A Music，被黎明賜封「模 art」（模特兒與藝人混合體），安排她在影圈發展，去年滿約後， JM轉投 Paco揸弗的太陽娛樂，黎明也有公開祝福，雙方和平分手。

李治廷　冰冰帶挈

09年加入 A Music進軍樂壇，首次拍攝電影《歲月神偷》便獲第 29屆香港電影金像獎「最佳新演員獎」，跟住搭上范冰冰，轉移內地發展，二人合作的《武媚娘傳奇》在國內大受歡迎， 15年滿約將會同公司 bye bye。

樂基兒　夫妻緣盡

09年被踢爆與黎明秘婚的樂基兒，同年加盟老公開設的經理人公司百仕活。 12年，兩人宣布離婚， 14年約滿，再冇關係。

八年新人

16歲被黎明睇中收歸旗下的王歌慧，簽約 A Music後即推出單曲《大話精》，之後無以為繼， 06年拍完黎明執導的《緣邀知音》音樂特輯後便再冇工作，直至 12年，才有機會簽香港電視，連拍《第二人生》、《來生不做香港人》和《驚異世紀》三個劇，雖然已入行八年，仍被誤以為是新人。

鍾意就快D Share啦！

下一篇 》