B哥擺酒點只賺開心 [壹週刊 - 1316] M1,

同你吟一吟

B哥擺酒點只賺開心

舊年八月勞師動眾嗌咗過百人去峇里見證婚禮嘅阿 B范姜，上星期五（五月二十二日）香港 take two，喺君悅酒店擺咗三十三圍。出席賓客個個有頭有面， B哥唔慳荷包，三萬蚊圍，使過百萬！

老公人面廣，范姜亦唔手軟，六卡全美方鑽，白色 Dior婚紗，黑色透視晚禮服，上行「架生」，話俾大家知，事隔大半年先擺酒，唔係想賺人情，而係好似 B哥話齋：賺開心！

嚟飲唔嚟飲嘅都好，又或者舊年已經做過人情嘅又好，人情照 encore！有份去飲嘅二五同八珍講，其實當晚大家私下都有各自打聽究竟做咗幾錢人情，仲話最求其嗰個都意頭價三千八。三萬蚊一圍，咁點只賺開心呀！

著住 Dior婚紗同一家人切 cake嘅范姜，之後換上黑色穿窿晚裝，大晒手上六卡全美鑽戒，閃爆。

Sammi同許安分開到、一齊走，離開時見傳媒一擁而上，許安緊張到用兩隻手捉實老婆。

Sammi同周麗淇攬晒合照，睇十嫂個樣，有啲 high high哋喎。

舊年有去峇里嘅張家輝話 B哥擺酒係想大班朋友一齊玩番晚，所以唔介意做多次人情，仲做埋信差，幫唔嚟飲嘅鍾楚紅、陳慧琳等人，攞人情（圓圈）俾主人家。

歌神同校長唱歌娛賓，俾足面！

同 B哥拍過拖嘅樂易玲，性感 tube dress同陳友一齊到。

鍾意就快D Share啦！

下一篇 》