網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2015年5月6日 星期三

香港只剩合拍片? 《全力扣殺》郭子健:拍得好冇所謂 [FACE - 415] 郭子健,全力扣殺,MF,



爆 Like王

香港只剩合拍片? 《全力扣殺》郭子健:拍得好冇所謂

早前《金像獎》滿城風雨,司儀喺台上不斷叫人支持香港電影,又叫新晉導演上台親口多謝創意香港同埋電影發展基金,亦有人批評奪「最佳電影」的《黃金時代》唔係港產片,金像獎已變成合拍片頒獎禮。偏偏有大陸資金投資的《全力扣殺》導演郭子健和黃智亨則唱反調,認為合拍片冇問題,仲叫政府唔使揼錢落電影界。郭子健說:「政府俾錢邊個行業,邊個行業就會死㗎喇!」

10年《打擂台》低成本高效益,亦成為當年金像獎「最佳電影」,導演郭子健即上位。《蘋果日報》圖片

F:《 FACE》 郭:郭子健 黃:黃智亨

F:點解揀羽毛球做電影題材?

郭:因為我𡃁仔嘅時候鍾意玩啦,加上超儀本身話自己係安大略省女子雙打亞軍嚟,當日同佢提出呢個題材嘅時候,原來佢真係有打波,咁就一拍即合。

我自己好鍾意功夫但又冇學好功夫,所以拍咗《打擂台》,鍾意打羽毛球又冇成為羽毛球手,所以就拍呢部戲。

黃:最想講我哋向住個目標進發,好似好多勵志片咁,但我哋最想講,唔需要太着重最後奇蹟有冇發生,呢個唔係重點,重點係要你去做,結果係點?你未走到盡頭,結果都未會發生。

F:點睇合拍片同港產片?

郭:合拍片同港產片界線係含糊嘅,我成日都講套戲好唔好睇㗎咋,套戲好好睇,就算係合拍片都會睇,等於《寒戰》、《激戰》呢啲全部都係合拍片嚟。

拍得好睇嘅合拍片你會去睇,拍得唔好嘅港產片你都係唔會睇。

黃:嗰陣王家衞攞日本仔好多錢,攞法國人好多錢,佢拍出嚟都唔會變咗法國片,等如《一代宗師》都係合拍片,你唔會好介意。

郭子健由細到大都係《大時代》粉絲,就算有成套 DVD,都幾乎每晚追看,仲喺自己 fb上載被刪片段。電視畫面

F:香港幾時會拍到《復仇者聯盟》?

郭:香港電影做法仲係好天才波,即係應變能力高,無論點都拍到,但就係呢種所謂港產片精神,就係阻礙咗我哋能夠拍到《引力邊緣》、《復仇者聯盟》呢類具特技規模嘅戲。

因為呢類戲係講規劃,可能 5年前已經有個唔可以改嘅劇本,跟住 1年時間去集合資源,然後用 4年時間打造準備,最後只不過係拍兩個月;而外國人就係最善長規劃。我哋覺得 3個月籌備,然後俾你拍多 3個月,或者半年後做後期,然後就要上畫。

黃:特技唔係你揼錢就做到出嚟嘅行業,呢個行業係需要慢慢浸淫,要不斷補資源令佢慢慢成長,喺華人社會好難發展到。好多人覺得 CG係我部電腦好勁,跟住有啲 software,你學晒所有嘢就得,其實要有班好好工藝嘅人先做到,我畀支 10萬蚊鉛筆你,唔等於你畫到好靚嘅畫。

F:係咪要有槍戰同粗口先搵到老闆揼水?

郭:上年有部《狂舞派》未出之前個個話死梗,掂咗喎,今年《 5個小孩的校長》講個校長幾個小朋友喎,好多人話兒童片死梗㗎,但又掂咗。所以𠵱家啲老闆唔係好理㗎,你有一個劇本,你要幾多 budget,你想用咩演員,如果集合到嘅,你就做,集合唔到你就等,所以𠵱家老闆係冇咩限制。

郭子健今次同好友黃智亨一齊執導《全力扣殺》,黃做導演前為電影 3D動畫總監,《葉問》及《救火英雄》戲中嘅特技都係黃智亨嘅作品。網上圖片

F:政府要做咩支持電影業?

郭:政府只需要做一樣嘢,俾我哋借場景方便啲,唔好喺街景阻我哋拍攝或者得到一啲保護,申請程序唔好搞咁耐,唔好各樣嘢都唔批准,咁就得㗎喇!唔使畀錢嘅,政府俾錢邊個行業,邊個行業就會死㗎喇!點解台灣電影死咁耐就係因為有補助金。政府俾個方便我哋香港電影,已經幫我哋慳幾百萬啦。《蝙蝠俠黑夜之神》嚟香港取景,就可以 set台喺 ifc拍,我哋就話入黑唔俾拍,《變型金剛》喺香港可以爆巴士,我哋想拍架車喺中環行過都唔得。

鍾意就快D Share啦!