掃呢頁CODE去手機

2015年5月28日 星期四

陳凱琳連環撻 Q 鄭嘉穎氹番 [壹週刊 - 1316] 凱琳,鄭嘉穎,嘉穎,陳凱琳,M1,



上週四(二十一日),鄭嘉穎同陳凱琳拍住拖為《殭》開工。

探熱針

陳凱琳連環撻 Q 鄭嘉穎氹番

四十五歲鄭嘉穎被踢爆同細二十二年的陳凱琳( Grace)行埋後,對感情事一向拉鏈嘴的他雖然未至於有碗話碗,但亦反常較過去高調。上週四(五月二十一日),一對緋聞男女拍住拖為劇集《殭》開工,見有記者探班,嘉穎拎手機反拍,仲故意笑笑口寸咀說:「你(記者)介唔介意我擺上網?」但對住連環蝦碌的處女 Grace,嘉穎便收晒火,又扮 cute做古怪表情,氹到對方笑晒!

手機反拍

當日下午,劇組在觀塘巧明街附近拍外景,劇情講被殭屍追殺的陳凱琳匿在車尾廂,嘉穎趕到英雄救美後二人深情擁抱。

男主角到埗後,企埋一邊與工作人員吹水扯煙,心情看來不錯的他,發現記者秒速變臉,之後更攞住電話反拍記者:「你(記者)介唔介意我放上網?(唔介意,我又唔係知名人士。)我都唔介意你放上網……多謝關心呀,多謝晒!(拍攝順唔順利呀?)你未嚟之前就好順利!(我哋阻住你同 Grace傾偈?)你哋阻住,即係你哋又唔係 TVB,但又嚟到呢度好似係 TVB嘅人咁樣,歡迎你哋加入我哋大家庭,多謝你呀,記住嚟申請喎!」

申請?記者該向那個部門申請呢?觀塘警署?地政署抑或大台外事部呀?

明知有記者在場,一對男女主角刻意保持距離,但 NG了幾次後, Grace開始有點不開心,見女友扁晒嘴,鄭嘉穎即使隔住工作人員,仍對 Grace做口形,甚至當眾裝出 cute樣,氹到 Grace即刻笑番。

NG咗幾次,陳凱琳扁晒嘴,鄭嘉穎立即做出古怪表情氹番, cute爆。

未埋位,鄭嘉穎同工作人員企埋一邊扯煙吹水。



鄭嘉穎拎住電話反拍記者,更寸咀話:「介唔介意我擺上網?」

私下再約

中場休息,最後一日埋位的 Grace主動同記者打招呼。「(頭先嘉穎見到有記者唔開心喎?)咁大家唔阻住拍攝都 OK嘅!(拍完有冇失落呀?冇得成日見到嘉穎!)咁大家好朋友都可以約出嚟見面,一齊食飯都 OK嘅!(私底下都會見面?)睇吓大家有冇時間囉。」 Grace笑着說。

之後 Grace返上公司車休息,並與一早在車上的鄭嘉穎並排而坐,見記者在拍照,鄭嘉穎即一臉不悅指住記者, Grace於是落車。過不久,鄭嘉穎亦落埋車,只見他好不耐煩地,「唔使吓吓都拎晒(指攝錄機)出嚟嘅!」

二人深情對望一輪,陳凱琳便肉緊攬住鄭嘉穎,三 take導演便收貨,非常有默契。

落住毛毛雨,鄭嘉穎細心幫陳凱琳遮雨。

兩個一行埋就雞啄唔斷,陳凱琳更不時使出招牌電眼,冧到鄭嘉穎暈晒浪。

出手擋雨

傍晚時分,終於輪到「戲肉」,攞正牌擁抱, Grace不時使出招牌電眼,眼定定凝望對方甜笑。由於當時落住毛毛雨,鄭嘉穎不顧記者在場,伸手幫女方擋雨。導演一叫 roll機,二人深情擁抱,非常有默契,前後三 take搞掂,外景收工,返廠繼續。

過去的無論周麗淇、佘詩曼,鄭嘉穎對感情事採取封鎖政策,一○年被爆私藏國產女模徐靖雯,戀情更加見光死。今年初因為合作新劇《殭》,火速和女主角陳凱琳進入熱戀狀態,對身邊朋友,他對 Grace讚不絕口,對外,亦破例不排除發展可能。

「第一日開工,嘉穎已經話 Grace好 charming,識落咗更覺得佢簡單,諗嘢唔複雜,話同佢一齊好舒服,而家一有人喺嘉穎面前提起 Grace,佢就冧晒。嘉穎都唔細,佢對 Grace好認真,亦好緊張。」鄭嘉穎身邊人說。

中場休息,二人返公司車休息,嘉穎繼續保持黑面,落車時再加多句:「唔使吓吓都拎晒(指攝影機)出嚟嘅!」

就算埋緊位,鄭嘉穎都時不時擰轉面怒啤鏡頭。

鄭嘉穎一跳起,露晒成條紅色底褲邊。

陳凱琳邊跑邊尖叫,著住短裙的她差啲露底。

早前二人拍攝咀戲, Grace完全零尷尬話咀就咀,非常投入。

密封感情

圈中男女,十居其九唔提感情!甚至影到相都唔認,包括鄭嘉穎,入行多年,先後與不少花旦傳過緋聞,但當事人永遠拉鏈嘴,鐵筆都撬唔開。

周麗淇

03年與周麗淇合作《翡翠戀曲》秘密搭上,但二人一直否認; 06年再度合作《天幕下的戀人》,戀情依然冇正式浮面,拍拖五年都係收收埋埋,直至 08年搭上佘詩曼,周麗淇決心斬纜。

佘詩曼

07年合作《法證先鋒Ⅱ》火速撻着,多次被拍到車阿佘回家過夜,有次更加斷到正,鄭嘉穎竟然丟低女方逃之夭夭。據指阿佘一度想公開關係,但男方拒絕, 09年二人正式玩完。

徐靖雯

10年被踢爆收埋比自己後生廿年的國產女模徐靖雯,於西貢寓所二人世界 72小時,事件曝光後,嘉穎依舊死口唔認,更勒令女友離開香港,戀情見光死。

鍾意就快D Share啦!