掃呢頁CODE去手機

2015年5月13日 星期三

打機片升級 跟詹瑞文學戲  YouTuber笑波子:唔靚仔係我長處 [FACE - 416] MF, 詹瑞文,



李煒樂  21歲

笑波子讀緊土木工程學學士課程 Yr. 3,每逢放假及週末便會拍片,佢話 keep住有新片至唔會流失觀眾。至於佢點解叫做笑波子同埋點樣靠做 YouTuber賺錢?快啲下載 FACE Pop app睇片

爆 Like王

打機片升級 跟詹瑞文學戲  YouTuber笑波子:唔靚仔係我長處

學黃子華話齋,現代社會嘅人「存在感大咗」真係冇講錯,就以 YouTube為例,就算打機、講笑話、扮明星都令你充滿存在感,最緊要係快! YouTuber笑波子今年 21歲,喺 YouTube打低能 game打到出晒名,又鍾意搞笑同抽水,挑戰過 16秒讀財經急口令,又同詹瑞文玩打手板,唔使靠靚樣,喪嗌爆笑都有 20萬人訂閱,唔怪得笑波子自己都話:「唔靚仔係我長處,天生嘅長處!」

F:《 FACE》 笑:笑波子

F:點解會做 YouTuber?

笑波子有機會跟詹瑞文學咗兩堂演戲,令佢更加想做喜劇演員:「做笑星係好神奇、係好特別嘅一種存在性,你叫我拍喊戲,我都做唔到」 YouTube畫面

笑:大概一年半前,覺得無聊,見到其他人拍啲搞笑嘢,我又有啲興趣拍喎,嗰時又覺得好多人都唔開心,咁我睇人哋啲搞笑嘢都會開心、會分享,所以就拍啲搞笑元素再加生活嘅嘢囉。一開始係拍啲打機片,之後有啲挑戰片、生活片;我專玩低能 game,低能 game先至好笑呀!平時玩來玩去都係 GTA、 CS,其實好多不知名嘅 game或者惡搞 game,佢背後一啲思維或者創意,可能比嗰啲大製作嘅 game更值得玩,呢啲 game有啲好 gag嘅,會好搞笑!

F:幾時開始多人睇你啲片?

課堂上詹 Sir唔着重教演技,反而着重教反應同演戲心態,所以同笑波子玩打手板,之後仲合作拍片添,不過要等下至有得睇喇。 YouTube畫面

笑:最初得幾十人咋,之後拍咗啲時事性嘅片,例如《港女十四巴》,同埋講內地人打尖嘅《七大打尖方法》,呢啲好有共鳴感嘅片會多人 share就自然多人識你;就算間中拍下打機片都會有人睇埋。印象中最多人睇嘅係《港女十四巴》嗰條片,講出我對呢件事嘅感想,你可以話我抽水或者 make fun of呢件事!

F:好多 YouTuber都拍抽水片,你最近玩急口令算唔算係抽水?

笑:一半算係其實拍嘅時候,你覺得抽水、有啲人又覺得唔係,但個 topic如果係 hit都值得拍嘅!我係會因為想拍片而留意多咗時事嘢,作為一個 YouTuber我好耐冇睇電視,因為每日啲時間都擺咗喺 YouTube,拍咗啲片要 edit好多嘢;自自然然養成咗習慣,一開電腦就上 YouTube先,好正常,好似你用開 fb都上咗 fb先啦。其實拍片最大嘅滿足感係拍咗啲搞笑片,令到觀眾開心,佢哋本身可能有壓力呀,有啲唔開心嘢呀,睇完之後會輕鬆咗,傻笑咗嘅,咁我幫到人嘅同時,又有成功感

近期人人玩財經急口令,笑波子都唔執輸,仲喺 16秒內唸完添。 YouTube畫面

笑波子曾經扮過 MK Pop嘅 FAITH,佢認為唔顧形象係 YouTuber嘅特質。最近 FAITH換血喎,有冇興趣扮多次呀? YouTube畫面

F:點解最近你會跟詹瑞文學戲?係咪想做明星?

笑:想㗎想㗎!之前參加咗 Sony比賽「 show your films」,拍啲關於夢想嘅作品贏咗,因為我願望係做個搞笑嘅藝人,佢哋就搞咗兩堂詹瑞文嘅班俾我同伍仔上。詹 Sir教我哋好多人生哲學,比較理論多啲,少部份係去熟習戲劇上一啲技巧,譬如 funny eye,把口講:「你好嗎?」但心入面其實講:「咁多人死唔見你死!」呢類嘅感覺。上完兩堂後諗咗啲嘢拍,挑戰詹 Sir,我哋會一齊挑戰食全球最臭嘅罐頭魚,坑渠咁臭,拍咗但未剪好,預計下個月有得睇。我好想學佢做笑星㗎,我覺得唔靚仔反而好笑過靚仔,係呀呢個係我長處,天生嘅長處!

鍾意就快D Share啦!