網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2015年6月19日 星期五

跑數還債俾大台 周志文翻撻有米女友 [忽然1周 - 1038] 周志文,MW,



11/6球場騷肌

周志文冇工開,只好慳住使。打籃球係佢主要娛樂。開波前,佢先做橡筋操熱身,順便騷肌肉。

娛樂喧

跑數還債俾大台 周志文翻撻有米女友

色字頭上一把刀,巨聲幫周志文四圍溝女惹禍,遭緋聞女友吳若希篤死,冇得留低大台!雖然有周刊指周志文哭腔死𦧲樂易玲,令他大難不死有得留低。但據知大台只是將周志文份約延遲三個月,皆因他之前曾預支十萬元生活費,現在延長合約期只是俾多幾個月他跑數還債,續約零希望。

前路茫茫的周志文,得悉前有米女友 CoCo不堪男友向佐暗嗒大陸女星王秋紫而鬧分手,便乘虛而入玩翻撻。不過,周志文之前紀錄唔好,要 CoCo落疊,真係要加多幾錢肉緊。

有傳吳若希因愛成恨,反篤周志文周圍溝女。花心真係要付出代價。

兩個月前,有傳周志文因背着正印吳若希,連溝蔡思貝、劉佩玥及何雁詩,令吳若希向「爸爸 B」何哲圖詐型,余詠珊即出手施壓,上月 10日成功篤死花心男,周志文返大台執包袱。

為還大台預支給他的十萬生活費,周志文在個多月來等 job到。「呢排大孖(周志文)都係做吓啲冇記者去嘅登台騷。上個禮拜司棋姐都搵咗佢上麗星郵輪唱歌。佢之前同大台預支十萬蚊,依家要跑數還債!」知情者說。

去年十月,姣精蔡思貝去台灣拍《衝線》時,被指摸上周志文房門,返港後兩人更被傳媒影到拖手相。不過近日周志文變棄將,蔡思貝即劃清界線:「都係顧掂自己先,冇留意佢(周志文),同佢只係工作過嘅同事。」大難臨頭各自飛。

周志文事業觸礁,惟前度 CoCo仍致電問候,對外更處處維護,力撐周志文不花心。患難見真情,周志文近日頻頻上 CoCo家博翻撻。

「其實 CoCo之前係頂唔住大孖(周志文)花心先分手,佢仲好愛對方,成日留意佢啲新聞。兩個月前佢哋傾番電話同 WhatsApp。大孖呢排頻頻上去搵 CoCo,擺明想復合。至於向佐,前女友大陸妹(王秋紫)出嚟數佢,話同佢有咗,搞到 CoCo同向佐吵大鑊嗌晒分手!」知情者說。

局住放狗

周志文以「湊狗」做藉口接近 CoCo,近日他差唔多日日放狗。

翻撻 CoCo

周志文之前同《今晚睇李》調酒女 CoCo分手,但是他近日頻頻出入 CoCo屋企,戮力翻撻。

怒飛向佐

向佐搭上內地女星王秋紫,令對方大肚,正印 CoCo即與他分手。《蘋果日報》圖片

王秋紫

周志文緋聞多多, 2012年拍《名媛望族》時,傳他同馬賽假戲真做,搞到 CoCo親自去上海𥄫實。

就大孖力追翻撻一事,記者致電 CoCo求證。她承認與周志文有見面,「佢係有上我屋企,我哋以前養咗隻狗,佢上嚟帶隻狗去玩啫。(你哋復合?)唔係,大家係朋友關係。(你好關心佢,之前仲打電話安慰佢,有情有義喎!)我對朋友係咁,呢件事(被大台解約)咁大,所以至問候佢。(咁你同向佐又點?)佢都係朋友咋。依家我係單身,想專注事業,暫時唔拍拖。」至於周志文,電話則長駁留言信箱,至截稿前未能聯絡。

周志文近日的確修心養性,閒時只會落街放狗或約老友打籃球。不過他花心有前科,睇嚟要取得前度信任,唔係一朝一夕搞得掂。

8/6周街吹水

冧番掂有米女友,周志文冇工開心情都好好,食完茶仔同朋友繼續周街吹水。

茶仔醫肚

連日來,周志文使費不多。當日佢同朋友食飯都是去附近茶仔,埋位佢就打機,一坐就一粒鐘。

買酒自隊

之後周志文同另一位朋友去超市入貨,兩人買了一支紅酒,之後上周志文屋企一齊隊。

周志文同「大隻仔」溫家偉一齊住。周志文唔得閒放狗的日子,就由溫家偉代勞。

明星愛翻撻

分手亦是朋友,更可以是男女朋友。娛圈興翻撻,以下都係經典例子。

孫興 娶前妻

孫興 07年因為小三介入,結束與林美貞七年婚姻。不過兩人上年翻撻,今年更再婚度蜜月兼影婚照。

吳雨霏 三度復合

吳雨霏與青梅竹馬的「網球王子」洪立熙三離三合,雖然她與余文樂拍過拖,但仍難忘前度,兩人今年更拉埋天窗。

周慧敏 先離後婚

08年倪震被揭偷食張茆,周慧敏高調和他分手。但事隔一周後,兩人宣布婚訊, 09年 1月結婚。

王菲霆鋒 最長情

00年,王菲當眾拖謝霆鋒,高調晒戀情。兩人於 03年分手,但於去年兩人在王菲家又攬又咀,事隔 11年成功翻撻。

鍾意就快D Share啦!