尋找來自江湖的她 [忽然1周 - 1039] MW,

曾幾何時，恬妞係纖體公司嘅紅牌代言人，真係流晒鼻血呀。

媽咪姐

尋找來自江湖的她

啱啱先第 N次翻煲完《大時代》，依家又要晚晚追《他來自江湖》！大台真係俾大家唞吓都唔得㗎。話時話，媽咪姐同成班靚太 friend一路睇就一路喺度諗，劇入面好多好好戲嘅女星好似失咗蹤咁！唔得，媽咪姐即刻發散人搵佢哋出嚟先。吖，又估唔到個個都 keep得幾好，一比起萬子同星爺依家一頭白髮又殘殘哋，佢哋絕對係美魔女，掂呀！

其他影片：>>《他來自江湖》爆笑位

84年來自台灣嘅恬妞同印尼華僑葉聰豪結婚，點知嫁過去先知對方已婚有個女，最終離婚。後尾入大台拍《他來自江湖》，同萬子撻着， 92年結婚，由六叔做證婚人，仲現場直播婚禮。可惜 96年都因性格不合而離婚收場。

恬妞　貪玩魔女

今年 57歲、喺劇入面扮新移民嘅恬妞，近年都係返大陸拍劇搵食，平均一年兩、三套，偶然又返香港拍吓戲，仲好有 market㗎！不過，呢位傻大姐最犀利嘅係有觀眾緣，當年佢佗女 7個月，同第二位老公萬子離婚，獨力養女，供到佢喺瑞士讀完大學。依家阿女出身做品酒師，恬妞得閒拍吓劇，同班細佢一大截嘅後輩 friend到爆， so cute！

恬妞最近同潘瑋柏（左）合作大陸劇，成日玩到癲，點睇都估唔到佢就快 60歲。

素顏照都敢晒，仲要好得吓！

恬妞同鍾意中性打扮嘅囡囡朱曉彤，成日四圍去，好 friend。

嘩！少女時代嘅恬妞好鬼陽光！不過身材就梗係依家嘅好。

張鳳妮　馬拉靚太

喺劇入面愛萬子愛到癲咗嘅張鳳妮，現實中就幸福好多！今年 46歲嘅佢， 87年參選港姐入行，無停過拍劇，直至 97年去咗馬來西亞發展，識咗當地華僑富豪傅仰峰，一見鍾情， 98年就嫁去吉隆坡，生咗 3個可愛囡囡。鳳妮自己都話依家無晒戲癮，只係想專心湊女呢。

3年前，張鳳妮由老公打本開薯條店，佢話自細志願係做個好媽媽，依家湊住 3個女已經好開心。

據知鳳妮老公傅仰峰係咁意都買間有室內泳池、價值千幾萬港幣嘅獨立屋𠱁老婆，豪！

張鳳妮係 87年港姐，得到「最受佳麗歡迎獎」㖭。

睇劇見張鳳妮成日俾躁狂萬子鬧，真心覺得佢好慘呀！

楊寶玲　珠寶女王

喺劇集尾段先出現嘅楊寶玲，由 87年當選港姐冠軍（佢同李美鳳、張鳳妮同屆㗎！）開始，個樣好似無變過咁！佢最叻嘅係 99年淡出娛樂圈之後，就專注喺商界發展。六福珠寶佢有份㗎，仲親身做過代言人，同鄺美雲一樣係珠寶女王，勁呀！

楊寶玲喺劇中一閃而過，飾演萬子嘅死鬼未婚妻。都係嗰句，點解佢個樣 26年如一日嘅。

今年 48歲嘅楊寶玲着泳衣同囝囝 Nathan玩水，仲係好 fit！同半百出寫真嘅羅霖有得揮。

94年楊寶玲秘嫁音樂人陳容森，但 97年不歡而散。好彩佢喺 02年嫁俾拉斯維加斯賭場高層 Nelson Wong後，婚姻美滿，個仔都 9歲喇。

上年楊寶玲出席六福周年晚宴同林峯合照，無 PS一樣皮光肉滑㗎。

鍾意就快D Share啦！

下一篇 》