圓方成為蔡少芬一家的主要活動場地，上週一家三口便約埋姚瑩瑩母子在商場學溜冰。
探熱針
親子樂 拒做怪獸媽咪 蔡少芬姚瑩瑩仔女開心學溜冰
每個父母都想仔女贏在起跑線，小朋友未夠一歲，已經要返 playgroup、學西班牙文、學豎琴，總之以難壓易，提高入讀名校機會率。
蔡少芬同姚瑩瑩兩位星級媽咪就冇咁怪獸，寧願安排仔女跟私人教練學溜冰，讓同樣四歲的楚兒與 Evan，童年冇壓力。
甩繩馬騮
家住沙田，過條尖山隧道就出到尖沙咀的蔡少芬，經常一家大細圓方活動，早個禮拜，兩公婆一齊出動接大女楚兒放學，在圓方開餐，同枱還有姚瑩瑩和她的寶貝仔 Evan。著住校服裙的楚兒坐唔定，扭計落地到玻璃欄前睇人溜冰，老豆張晉捉都捉唔實，冇晒符！相反， Evan就文靜得多，成餐飯都坐定定。
醫飽肚一行人先到附近書局巡了一圈，之後經過戲院見到美國隊長擺設，兩個小朋友立即變甩繩馬騮，甩開媽咪，走上前自動擺甫士，相當搞笑。
Hea到三點，終於夠鐘上堂！楚兒同 Evan換過裝備，跟教練學溜冰，由於仍是初學階段，兩個小朋友所做的動作以簡單為主，打開雙手練習平衡，又推住櫈仔，滑前滑後。
冇電扭抱
坐在觀眾席的蔡少芬和姚瑩瑩一邊篤電話，一邊雞啄唔斷講媽咪經，張晉則拎住手機，拍低囡囡上堂過程，精靈的楚兒偶然會滑近觀眾席，擺晒甫士讓老豆過手癮，氹死人！
溜冰課上半小時，蔡少芬兩公婆夾手夾腳幫楚兒換好鞋仔，之後就同姚瑩瑩分道揚鑣。拖實囡囡搭扶手電梯時，蔡少芬問囡囡：「溜冰好唔好玩呀？」楚兒興奮答：「好玩！」
返學到上完溜冰課，楚兒開始冇電，行去停車場期間已經要扭老豆抱，其間冇化妝的蔡少芬發現記者，即笑住說：「唔好影我呀！影佢哋（張晉及楚兒）」早已習慣面對鏡頭的楚兒時不時回頭望， sweet爆！家長唔怪獸，小朋友亦較可愛！
|
鍾意就快D Share啦！
|
|
|
