掃呢頁CODE去手機

2015年6月25日 星期四

三分鐘雞髀包 [壹週刊 - 1320] M1,



鍾振明十年前發明的雞髀包,上週突然鹹魚翻生式爆紅,「男人五十」的他,對住記者無借勢吹捧,反而話:「其實個包無咩特別。」

坦白講

三分鐘雞髀包

鍾振明 五十歲

粉嶺聯和墟協香餅店老闆,入行三十年,十年前自創全港獨一無二的雞髀包,上週因商台 DJ青木急急子在節目介紹,引來全城搶購,但他心水清,對網絡世界帶起的三分鐘雞髀包熱潮,睇得好淡。

我嘅獨門雞髀包爆紅又點呢?我做咗大半世人,當然知乜嘢係「花無百日紅」、「三分鐘熱度」。我份人好老實,個雞髀包唔係新嘢,大約十年前,我見大人細路都鍾意食雞髀,拎住支骨一路行一路食都得,就試吓加埋個包睇吓夾唔夾,點知滷水雞髀同個鹹餐包一拍即合。嗱,雞翼包就唔得啦,因為太多骨,好易鯁親。

整雞髀包其實唔難,用滷水煮熟雞髀之後,過一晚再將麵團包住隻入味雞髀,放一、兩個鐘等麵團發酵,之後放入焗爐,同埋我啲菠蘿包呀、腸仔包呀一齊焗十五分鐘,其他包夠鐘出爐,雞髀包就未得,要用慢火再焗多十分鐘,等中間嘅麵團熟透,咁樣雞髀出油都唔會黐住個麵包。

十年嚟,我個雞髀包都係賣八蚊,每日賣百多個,同其他包差唔多。嚟買嘅都係粉嶺聯和墟附近嘅師奶和學生,有人食完同我講:「嘩,全世界都無啊, chicken drumstick bun」、「食完,真係飽到唔使食飯」、「食包先定食雞髀先好呢」、「八蚊?喺連鎖快餐店淨買隻雞髀都唔得啦。」

老實講吖,我唔覺得雞髀包有乜咁特別,想當年我都係用街頭智慧搞出嚟,而家係你哋班網民吹啫,我唔識上網,唔知你班友講乜,我淨係知個商台 DJ訪問完我之後,就有好多街外人特登入嚟幫襯,而家每日賣八百個,我呢期真係忙到嘔,朝早五點就開工,醃雞髀醃到手軟,晏晝四、五點就賣晒,幫襯開我嘅熟客,都要打電話預訂先有得食。

低調香橙包

呢個就係好低調,但老闆好鍾意嘅香橙包。

我記得三年前,金剛同小儀都曾介紹過我,個電視節目出咗街之後,都多咗好多外人嚟,嗰陣雞髀包銷量一日突然多咗幾百,有被人捧上天好威嘅感覺,但點知過咗兩個月左右就打回原形。今次唔係電視,而係班後生仔女嘅網絡熱,我諗,咪又係好似一陣風咁,你哋興講乜鬼快閃即興,係呀,我知呢個世界無嘢係永恒,今期生意多咗,我咪當自己時運高。

你哋將我個雞髀包古老當時興,但我想話你知,其實我最鍾意,係我發明嘅另一個包,叫香橙包,要好多心機做㗎,首先我將嚿麵團又搓又摺又捲,再搽上一種日本生產嘅橙味牛油,呢隻包拎嚟歎下午茶我覺得最正,但佢嘅外表好低調毫無特別,要食落口先知與別不同。

雞髀包因為外表夠出位,或者因為咁,齋睇已經覺得好有話題,喺網絡世界,乜都講噱頭。我知道隔多一陣,你哋就唔會再講我個雞髀包,但無所謂,我只係希望,下次你哋走入嚟我間鋪,可以試吓用個心欣賞我嗰個好謙虛、好平實,但好有料嘅香橙包。

由你開講

一切好人好事,壞人壞事,先吐為快。

你敢坦白,我敢講。

電郵:voice@nextmedia.com

鍾意就快D Share啦!