掃呢頁CODE去手機

2015年6月8日 星期一

娛樂專題:娛樂專題:劉佩玥陳瀅心中的夢幻婚禮 陳瀅,劉佩玥,



榮升「女神」的Moon及Jeannie與平凡女生沒有分別,同樣渴望有一個夢幻般的婚禮。

next 1/1 pre

大批宅男都希望娶得如女神Moon(左)及Jeannie般可愛的嬌妻,而兩人亦正靜待Mr.Right!

next 1/1 pre

思想傳統的Moon希望早結婚早生B,並視父親為模範的理想對象。

next 1/1 pre

傳統又貪靚的Moon希望將來的婚禮中西合璧,既披白色婚紗,又穿紅色裙褂。

next 1/1 pre

爽朗的Jeannie不排除閃婚,並希望與親朋密友在異地共度人生最重要的一刻!

next 1/1 pre

Jeannie坦言將來結婚不會大搞,只會邀請最親蜜的親戚好友出席。

next 1/1 pre

二人定下諾言,將來必定要出席對方的婚禮。

next 1/1 pre

二人均表30歲前生B是最理想的。

next 1/1 pre

情迷單眼皮男生的Moon,對人夫周杰倫(圓圖)嗒晒糖。

next 1/1 pre

Moon笑言怕攰,希望婚宴可以分兩日舉行。

next 1/1 pre

怕醜的Jeannie自爆鍾情型男古天樂(圓圖),未知兩人將來有否機會合作呢?

next 1/1 pre

Jeannie理想嘅另一半要識得保護家人,做好老公同父親嘅角色。

next 1/1 pre

陳瀅(左)與劉佩玥。

next 1/1 pre

女生對婚姻都有無限憧憬與期待,極速上位的無綫小花劉佩玥(Moon)及陳瀅(Jeannie)也不例外,兩人憑Sweet爆外形成為宅男的夢中情人!而兩大女神自小已幻想出嫁一刻會是何等夢幻難忘,她們最近換上幾套性感晚裝接受《好報》專訪,大談心目中的婚禮、白馬王子類型、難忘的婚宴回憶⋯⋯少女情懷總是詩!兩人講到停唔到口,笑聲不斷!

第一章:中式定西式?

傳統又貪靚的Moon希望將來的婚禮中西合璧,既披白色婚紗,又穿紅色裙褂,並打算分兩日舉行,好讓每位親友都有足夠時間與她分享喜悅;爽朗又隨心的Jeannie則渴望到外國的沙灘行禮,並明言不抗拒閃婚,連家人都冇佢符!

M:Moon J:Jeannie

M:今日我哋着到靚靚咁傾吓婚禮呢個話題,好多女仔結婚當日都要打扮得好隆重,婚紗好多層好似蛋糕咁,但我想白色簡單啲,你有冇見過啲人喺夏威夷呢……

J:唔着衫囉佢哋!哈哈哈!或者得個Tube,你想咁?

M:唔係呀!只係想好簡單嘅花,設計簡約,唔使好多Fashion嘢嘅。

J:我可能着黑色裙囉!講笑,其實未諗到,都係想簡單啲,婚禮就未必請好多人,可能得兩三圍,只請好熟嘅人,我鍾意Destination Wedding,想出國搞,咁就知真正朋友係邊幾個,因為要請假同自己買機票睇你結婚喎!

M:吓?我諗住你幫我畀晒喎!

J:我幫你畀酒店錢,你就畀機票,要有誠意嘛!如果唔肯畀錢買,即係唔係咁Friend囉!至於去邊搞婚禮?唔想太凍,因為着婚紗唔可以着羽絨,又唔可以太熱喎,會好辛苦!上兩年我家姐喺三亞結婚就太熱,出晒汗又多蚊,所以我想喺春天或秋天舉行,浪漫啲梗係最好我鍾意沙灘……

M:係呀!沙灘好靚,有夕陽,你喺岸邊行,老公喺對面望住你,好浪漫!

J:你鍾意中式定西式?

M:香港人普遍偏向西式多啲,我就要中西合璧,西方嘅嘢係好靚,蛋糕、婚紗……我仲想同爸爸跳番隻舞,但中國文化又唔可以少喎!我會穿裙褂、跪低斟茶,我屋企比較傳統,但又唔一定要擺好多圍先係開心。

J:可能我哋已經成日要娛樂人,所以結婚就想簡單啲!

M:我父母覺得結婚係我同未來老公嘅決定,最緊要我哋開心,有朋友試過大搞,過程中有好多嘢要兼顧,令一對新人好攰,結果有啲唔開心,我唔想咁,希望一世都記得呢日係好開心,而唔係好攰又照顧唔晒啲賓客!我覺得將朋友同親戚分開唔同日子慶祝幾好,有個好朋友嫁畀外國人,一日喺中式酒樓好傳統咁搞,一日就只係同朋友舉行Cocktail Party,呢日玩到好癲,我覺得呢個做法幾好,Jeannie呢?你又會揀中定西?

J:其實我想點就點,唔會理屋企人,可能有日唔同人講,去閃婚都唔奇!可能去去吓旅行註埋冊,返嚟就話結咗喇,唔擺酒喇!因為婆婆、媽咪、家姐都有自己諗法,我唔想鬧交,寧願輕鬆啲,而且婚姻係自己嘅事,家人都知我係咁諗。

M:佢哋冇你符?

J:哈!係呀!

第二章:最難忘婚禮

Jeannie(陳瀅)及Moon(劉佩玥)曾參與不少親友的婚宴,親身經歷感動時刻,亦遇見過瘀事並引以為鑑!Jeannie搞笑自爆在家姐的婚禮上,站在一對新人中間時的核突喊樣被拍下,Moon則最介意外人對人情金額說三道四,認為誠意更重要!

J:最難忘係我家姐個婚禮,始終係最親嘅人結婚,佢去咗三亞搞,點解我鍾意出國搞都係受呢次影響,因為真係真心祝福你嘅朋友先會出席,當日人數唔多,每個人都有足夠時間送祝福,每個人都有自己好Sweet嘅回憶,如果搞成200圍嗰啲,有啲人根本唔識,又冇時間逐一傾偈,唔係我想要嘅嘢。最深刻係一對新人Say I Do,個個感動喊晒,我係拎戒指嗰個,一對新人對望,我企正佢哋中間喺後面狂喊,影晒相搶晒鏡,好核突!

M:你破壞咗人哋個婚禮!每次見到張相,就見到你個喊樣!

J:我都唔想!咁你最難忘係咩?

M:每次出席婚宴都好開心,因為全部都係朋友、親戚,玩到好盡興,但有個問題係關於人情,依家啲人成日話要做幾多錢,我覺得冇所謂,唔好太計較,有啲人係冇咩錢,可能人哋500蚊食一個禮拜都畀晒做人情呢?最記得有次新郎新娘冇意見,但身邊啲人不停討論呢樣嘢,點解畀咁多畀咁少,幾煩!

J:所以我想旅行結婚,應該唔使畀人情!因為機票已經係自己出。

M:唔係喎!話晒係一份心意,但既然你咁諗,你結婚我係唔會畀人情嘅!哈哈!之前見過呢啲事上頭條,開心嘢唔應該搞到不歡而散!

J:咁有冇啲難忘事係開心嘅?

M:有個朋友同咗個外國人一齊,之後要嫁去外國生活,個婚宴係公布要離開香港,唔止係婚事,直情係同家人道別,唔捨得之餘又好Sweet,佢父母係贊成,個女仔跟住要去一個陌生地方,當時睇住Video播佢哋啲經歷,好感動!依家佢生咗BB,好開心幸福,恭喜佢搵到自己好愛嘅人!

第三章:白馬王子之選

Jeannie與Moon都視父親為擇偶的範本,並列出理想老公應備的條件,被爆至愛單眼皮男生的Moon大讚台灣天王周杰倫有才華又夠Cute,Jeannie則情傾型男古天樂,欣賞對方低調行善。

J:細個好仰慕爸爸,想搵個好似佢咁嘅老公,爸爸好似Superman!夢想嘅婚禮就好似灰姑娘咁,要有玻璃鞋同馬,會諗迪士尼啲公主點結婚,但大個咗就相反,覺得愈簡單愈美好!

M:我同你一樣喎!都係受父母影響好多,成日睇卡通片,幻想做公主,但大個咗諗唔係因為想要個婚禮而結婚。至於咩類型嘅男仔好?都係似爸爸咁,又要識彈結他,好浪漫!

J:我理想嘅另一半要識得保護家人,做好老公同父親嘅角色,性格自私就唔OK!外形方面要高大、大隻,唔係要肌肉型,係要大份過我,唔可以瘦蜢蜢或者矮過我!同埋要鍾意食嘢,咁佢平時叫好多嘢食,我就樣樣食一啖,其他質晒畀佢食,咁就佢肥我唔肥

M:我覺得孝順同上進心呢兩樣條件係不論男女都要,孝順代表由親及疏,對咩人都好,上進心呢……喺香港咁細嘅地方好多嘢要爭取,我哋女仔其實唔介意食平嘢,但男仔要努力為女仔做多啲,不停進步,冇上進心會令魅力大減呀!希望佢每日都為自己為我而努力!

J:外形呢咁?

M:搞笑!

J:咩叫外形好搞笑呀?

M:唔……高過我、矮過我都OK,其實都係講感覺。

J:我有嘢爆!Moon係鍾意人單眼皮!

M:(怕醜樣)哈哈哈!係呀!單眼皮好似周杰倫,佢係幾好嘅例子,有音樂才華,我覺得單眼皮嘅男仔好得意。Jeannie你男神係邊個?

J:(緊張掩面)我呀?古天樂!

M:因為佢靚仔?黑實大隻?

J:主要係佢好低調,做好多善事都唔會周圍宣揚。

第四章:好姊妹唔少得

Jeannie、Moon與陳凱琳(Grace)、何雁詩因拍劇集《四個女仔三個BAR》結為好友,任何一位結婚,好姊妹當然要人到禮到!Jeannie更笑言要齊齊上台跳於劇中改編自韓國舞團Crayon Pop的《Bar Bar Bar》舞步,令Moon啼笑皆非!

M:如果我結婚,我哋四個上唔上台表演好?

J:梗係要!我會要求我哋四個上台跳《Bar Bar Bar》!哈哈!

M:嗱!我冇出聲呀!但我個婚禮一定要有你哋三個,姊妹一定要到,你哋三個仲要表演添!

J:咁我單人跳《Bar Bar Bar》!

M:唔……我諗大家會繼續食嘢,唔……

J:咁你覺得我哋四個邊個會結婚先?

M:我哋之前講過Jeannie同雁詩唔似咁早結婚,於是就話係我同Grace,因為思想比較傳統,鍾意家庭,但呢啲都係性格啫,依家太多變數,唔知喇!

J:係呀!好難講!

M:咁你有冇諗過幾多歲結婚?

J:30歲前,仲有幾年時間!

M:以前想25歲,但依家都過咗……

J:嘩!你爆咗自己幾多歲!

M:我選美時都有報年齡,唔緊要我覺得30歲前生B,有力同佢玩,好驚年紀大好攰!我以媽咪做榜樣,佢比較早結婚早生女,同我關係亦母亦友,我都想咁,同小朋友做到Friend,但依家過咗,順其自然

童夢……

予人鄰家少女之感的Moon,兒時竟夢想開車房做車房妹,更笑言覺得「夾乸衣」制服很有型,令人難以置信!至於不介意閃婚的Jeannie喜歡自由自在,問到兒時夢想,她表示最想在歐洲大草原建花圃,過着無拘無束的生活,寫意又浪漫!

Moon:做呢樣嘢畀人好硬朗嘅感覺,由細到大已經覺得做車房好與眾不同,一架車由唔同嘅細小零件組成,感覺好神奇,細個坐爸爸車,間中遇到啲故障問題,當時諗如果我開到車房,爸爸咪唔使煩囉!雖然依家冇做呢份職業,但對車仲係有種特別感覺……

Jeannie:細細個就想去歐洲揀個大草原,種晒世界各式各類嘅花,變成博覽館,吸引唔同地方嘅人嚟參觀!(要另一半陪住?)哈哈!老公反而唔係最重要喎!我想生幾個小朋友,到時同佢哋加埋我兩隻狗仔一齊賞花……

鍾意就快D Share啦!