網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2015年6月17日 星期三

鍾舒漫冇眼睇 巨腩吳浩康搵索女陪過夜 [FACE - 421] 浩康,鍾舒漫,吳浩康,MF,



有 Sherman在身邊似足有為青年,相反 Sherman前腳走, Deep就置形象於不顧,肥厚腩肉士啤軚又有乜好怕?

封面

鍾舒漫冇眼睇 巨腩吳浩康搵索女陪過夜

可能係世界上最唔似分手嘅分手,吳浩康同鍾舒漫呢一對,年頭因為男方被爆連環偷食而分手,但上週六( 13日),吳浩康 32歲生日,「前女友」竟然又山長水遠入長洲陪慶祝,即係點啫?

可能係世界上最冇誠意改過嘅爛泥,錯完又錯嘅吳浩康,又話會用行動補救,結果呢?女朋友呢頭離開長洲,佢轉頭即搵索女陪過夜,翌日孖住食煙隊啤𡁻雞髀!不管鍾舒漫仲信唔信佢,反正我就唔信囉!

出道 13年,藏毒揭裙底又背未婚妻鍾舒漫偷食,真係數都數唔清,吳浩康已經認過幾多次錯,誓神劈願話要改過幾多次!今年二月婚前連𠝹六女一手搞鍋婚事, Deep被英皇擺入雪櫃冷藏全面停工,表面上 facebook動態唔係打波就去咗晨運跑步,開口埋口「相信便看見」,實情呢?洗心革面冇人見到,肥到自備巨腩「泳圈」就成個長洲人人見到!

索女接力

前女友走得快,大好機會俾 Deep解放身心,週日全日行程,去到邊都見到呢位白衣熱褲索女傍實, Deep事後解釋索女名花有主、同男朋友一齊入長洲陪 Deep慶生。

長洲過 32歲生日

上週六(13日),係吳浩康 32歲生日,亦係同鍾舒漫「結束」一年情後第一次過生日,吳浩康拉大隊入長洲慶賀生辰。唔係公司活動要指定出席,又唔係話近到轉個彎就到,奇就奇在「分手」三個月嘅鍾舒漫山長水遠撲入長洲陪 Deep,但依然堅稱未復合,鍾舒漫話︰「純粹想佢生日開心,我有同佢講清楚,佢生日我覺得可以去下,仲有佢爸爸同其他朋友, BBQ完之後我都走咗。」

唔知係唔係 Sherman走得快定冇眼睇,吳浩康無耐就喺面書更新狀態:「生日不快樂!」聽落陰功呢?不過信佢就真係中佢計。《 FACE》睇住 Sherman週六深夜坐船離開長洲,週日吳浩康才真正進入狂玩狂食慶祝模式!

朋友落水玩,吳浩康擦完盒飯同雞髀就淨係平躺沙灘,繼續儲肥膏。

又食

又酒

又煙

無論食煙隊啤炸雞髀,白衣索女都陪伴左右仲食埋一份添, Deep擺明自由自在唔似得平時有 Sherman又管又教。

生日正日當晚, Deep更新面書狀態,一句「生日不快樂」呃咗唔少 like同鼓勵說話,實情食得玩得又睇唔出佢有幾唔快樂。網上圖片

醫飽肚友人紛紛落水,唯獨 Deep踢都唔郁,最大動作就係風騷同迎面友人打招呼。

搭夜船走

分手後不時被拍到合體、上週六又入長洲慶祝 Deep生日,不過 Sherman堅稱未復合、燒完嘢食已經搭夜船離開。

越肥越食

140磅

巔峰時期 fit到漏, Deep話現時忙住教唱歌,無時間做運動已經突破 190磅大關。圖片

Sherman週六中午入長洲,燒完嘢食就走人,之唔係錯過精彩戲肉囉!

Deep原來在長洲有人有物,友情借來長洲山頂道豪華大屋做大本營,同二男二女友人徹夜狂歡。一覺瞓到翌日中午,晨運、籃球就無喇,吳浩康第一件事係直衝茶餐廳買外賣醫肚。等飯到時, Deep左手一支煙、右手一罐大啤不亦樂乎,等到外賣 ready行返大宅,見過餓鬼都未見過吳浩康咁餓,屋內友人開門行慢幾步, Deep已經就地喺門口開餐,一啖飯一啖湯再加多隻額外 order巨型炸雞髀,真係隔住 Deep肥騰騰嘅豬腩肉都覺得難消化。 32度高溫下,身邊一直陪在側的索女都唔多好胃口,惟有 Deep食唔停,咁都話「生日不快樂」?

「做咗唔係咁易接受嘅事!」

政府宣傳短片都有話,落水前唔好食太飽。大家即管放心,一行友人醫完肚的確係向海灘方向出發,不過個個都有份落水,唯獨最食得嘅 Deep移到淺水處,平躺養神,大半粒鐘最大運動量就係坐直低頭凝重注視自己個豬腩肉,呢啲叫唔叫自戀呢?不過咁,好多人都唔明,這些機會點解硬係俾 Deep獨霸,事業冇起色,但換女如衣服,風流史成呎厚,偏偏仲有個虔誠基督徒女友不離不棄,同鍾舒漫關係疑點重重,竟然 Sherman離開後,即刻有熱褲索女食飯、抽煙、吹水常伴左右,仲講乜上進心吖,似 Deep咪一樣快活似神仙!

週一 Deep在電話回答記者問題,坦承體重反彈到 190磅:「我係肥咗,因為忙住教唱歌、之前又幫公司拍完套戲,一唔做運動就係咁,嚟緊又會跑番!」至於過生日都話唔快樂,又關唔關 Sherman事呢:「係自己啲嘢,唔關感情同工作事,自己搞掂啦,冇同佢傾。𠵱家都係做好手頭上嘅嘢先,始終做咗唔係咁易接受嘅事,唔係一朝一夕可以修補。」至於講到趁 Sherman走咗,就有索女陪過夜,佢就話:「佢同男朋友一齊入嚟!」哦!

去到邊都有女陪, Deep叫記者放一百個心:「嗰日每個入去嘅朋友都係一 pair,佢同男朋友一齊入嚟。」

分手後一個走晒樣,另一個就又 fit又開心。到底有冇機復合,周一 Sherman電話全日關機, Deep就接受電話訪問表示:「始終犯咗錯,唔係一朝一夕修補。」網上圖片

厚多士

02年新秀出身, Deep唱得冇人否認,不過實在太多事,平均兩、三年就闖一次禍、道一次歉,又難怪今次再認錯,信佢嘅人都唔多。

12年 4月與胡定欣、莊思敏分手後,突然狂界𡃁模,同前度 Hazel當街扯煙又拉裙底,被影到後再道歉。

11被追欠租金和 8萬信用卡欠費,被爆表面風光內裡拮据,連上網及電話費都仲係一早分手嘅前度莊思敏搞掂。圖片

07年母親去世,吳浩康登上雜誌封面,聲淚俱下哭訴問唱片公司借錢找醫院數及殮葬費,又怪責自己唔生性搞到母親抑鬱成疾。圖片

04年 6月,錄音室外被截查搜出兩包可卡因,罰款五千並留有案底,當年認完錯無耐,又再捲入傷人案。

一擔擔

網上圖片

一錯再錯,認錯當食生菜,認完又再衰過,呢啲極品又點只吳浩康一個呢?

極品 周永恒

04年藏毒被叛感化,同年又再醉酒刑毀; 07年信主轉幕後一副痛改前非樣,結果奉子成婚再被大台炒; 14年打老婆鬧上差館爆出同小三 Ruby姦情,上電視流馬尿認完錯,結果照見小三仲上埋老婆娘家搞事。

《蘋果日報》圖片

《蘋果日報》圖片

冇品 魏駿傑

98年撻着滕麗名九年後分手,發誓無第三者結果唔夠半年就同年輕廿年重慶女大學生註冊。各行各路本來好哋哋,偏偏魏駿傑要喺微博鬧前度賤人、上內地節目又再數過!無品到咁,所以最近嫩妻疑似紅杏出牆好多人都話心涼。

網上圖片

《忽然 1周》圖片

次品 崔建邦

花心博愛激走唐詩詠已經惹人厭, 09年搭上𡃁模中巴竟然大打出手被女友告到入警署;守行為期間醉駕、醉駕停牌期間再無牌駕駛,自己前途自己斷送,口才再好都冇用!

《蘋果日報》圖片

《蘋果日報》圖片

鍾意就快D Share啦!