《Running Man》(RM)佢哋今晚首度以齊人姿態嚟到亞博館開見面會《Race Start ! Season 3: RM Special Tour in Asia》，七位成員劉在錫、金鐘國、李光洙、宋智孝、Gary、HaHa以及池錫辰就先到香港天際萬豪酒店出席記者會。
‧眾成員推介香港好去處，池錫辰介紹劉在錫去旺角飲鮮榨果汁，劉在錫又笑指去Soho區識女仔，請成員守秘密。
‧Gary被爆係「party中毒者」。
‧光洙最想請Angelababy上《RM》，俾金鐘國話佢對唔住熊黛林
‧光洙用國語向熊黛林表示：「我愛你，我愛你。」
‧劉在錫搞笑表示隊中有人好小器，而當事人亦好大力，暗示係金鐘國。
訪問環節上，問到點解劉在錫會出席香港嘅見面會，佢就表示之前一直都好想出席見面會，不過因為工作太忙，但每次成員去完海外活動都會同佢分享海外啲粉絲有幾好，令劉在錫都心郁郁，所以決定抽時間嚟香港。
由於劉在錫比較少嚟香港，成員都各自向佢推介好去處，池錫辰就介紹劉在錫去旺角飲鮮榨果汁、Gary就推介去飲茶、金鐘國就表示叫劉在錫去club飲酒，劉在錫即揮手表示自己唔識飲酒，不過之後又鬼馬地表示：「如果我去Soho區識女仔，大家守秘密嘅話，我就話俾大家知啦。」
問到對港迷印象如何，HaHa就表示大家都好熱情，由機場開始到去到會場，一直俾咗好多加油佢哋。
咁除咗香港之外，有咩地方想去？成員都表示想去西班牙，金鐘國更表示：「有club呀，有club呀。」主持問金鐘國係唔係好鍾意去club，成員就表示係鍾意party，更踢爆：「Gary唔係鍾意party，係愛party。」暗示Gary係「party中毒者」。
問到想邀請乜嘢港星或內地星上《RM》或出席《RM》見面會，光洙即表示：「Angelababy。」不過因為光洙同熊黛林拍緊內地戀愛真人騷，金鐘國即表示光洙嘅答案好對唔住熊黛林，又用國語代光洙向熊黛林道歉。之後金鐘國就表示想邀請嘅星係熊黛林，光洙即表現得非常唔好意思，即用普通話向熊黛林表示：「我愛你，我愛你。」
最後問到七位成員點維持友情，池錫辰笑言完成拍攝後唔見面就可以。Gary同HaHa亦表示因為拍攝《RM》而識到成員，感到好開心。劉在錫就搞笑表示隊中有人好小器，而當事人亦好大力，暗示係金鐘國。
| 採訪、攝影：黎嘉穎、陳慧安、馮嘉銘 |  「周一情侶」Gary同宋智孝就默契十足要舉起手指。 |  池錫辰喺記者會上就喺Instagram上載同李光洙同宋智孝嘅合照。 |
 |  |  |
 (資料圖片) |
|
鍾意就快D Share啦！
|
|
|
