網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2015年7月22日 星期三

來懷念小菌 來忘掉真假 [FACE - 426 - 專訪] MF,



真人騷

來懷念小菌 來忘掉真假

邵子風:我以呃全世界人為樂!

蝦頭:我會陪佢一路行落去!

不要怪我陰謀論,而是事實上邵子風二十年來以賣橋為生,在他身上發生的新聞,又總是和他的工作動向配合得天衣無縫,說巧合?哪來那麼多巧合?

就拿 4月 1日和多年好友兼旗下藝人蝦頭公布戀情來說,不久之後蝦頭就在書展出版擸仔自傳《蝦魔功》,宣傳期邵子風既是經理人又是現任男友日日拍住上晒恩愛,你說,若果作者長期單身現時空窗,《蝦魔功》又怎麼能站得住陣腳?

尤其是,蝦頭出完書,下一步輪到邵子風獨腳戲,而兩人的終極 project是搞一場演盡天下男女關係的二人傳,你說如果這真是一場如意算盤,邵子風這個橋王會不會算得太盡?

抱着懷疑,我在影樓裡用盡心神觀察這對熱戀中的情侶:看到邵子風餵忙化妝的蝦頭吃腸仔、看到蝦頭兩度聽邵子風說到艱難處雙眼通紅,兩位吓吓對唱情歌對答猶如對方肚入面條蟲……老老實實,畢竟兩位都是演技派,蝦頭還是舞台劇后,我功力淺,前後四個小時都沒法看出破綻找到答案。

對於真假,邵子風迴避不談,只說:「我呢份人係以呃盡全世界為樂㗎!」

而蝦頭的眼淚,也始終浪吓浪吓沒掉出眼眶:「條路仲好長,我會一直陪佢行落去!」

總之到最後,邵子風有句話把我徹底說服:「如果真係一條橋,我演得唔好,條橋就會散。你話若果我真係演得好,我哋兩個個騷做得成,咁就真係絕喇!」

拍拖這件事是真是假其實真的無所謂,重點是茫茫人海,邵子風和蝦頭找到了那個肯陪對方演這場戲的人,就算這一刻是橋,既然是天生一對,遲早亦都會變真。

第一晚就同車攬腰

你哋成日話識咗好耐,到底識咗幾耐?

邵:我細細個就已經睇楊小姐啲舞台劇㗎喇……佢 93年已經做緊舞台劇,我嗰陣時仲好細。

蝦:我細細個就睇佢拍教育電視㗎喇……講真,其實係十年之內。

邵:成日做嘢都會撞到,但一直冇深交。

由蝦頭離開詹瑞文 PIP開始熟絡?

蝦:在此之前,我記得熟番係因為新城電台節目……

邵:係喇……佢做嘉賓,我係主持。一見佢,我就同佢分析,𠵱家女喜劇演員買少見少,一路局限喺舞台好嘥,應該要諗啲大嘅平台,例如電視台。

蝦:一傾到共同目標……

邵:又唔係話共同目標,建議嚟啫,因為我見到佢之前對自己做緊嘅嘢、個圈係咩情況、條路應該點行、可以點突破,一直懵盛盛。呢啲演藝學院畢業嘅人,淨係識得專心演戲,唔同我哋啲經理人,會諗娛樂圈應該點生存……實在啲講,即係點樣入屋啲、點可以再紅啲。

蝦:以前冇機會同佢傾偈,亦都冇人同我講呢啲,做完節目嗰一刻,就係我哋展開友誼重要一步。

邵:我仲記得我嗰日揸電單車, 1964年古董韋士,就帶佢上我公司傾偈。

你又會帶多個頭盔嘅?

邵:不嬲都會帶多個,我哋呢啲帶定㗎,隨時有女上車㗎嘛。

蝦:突然間我覺得,點解有人會關心我嘅前途嘅呢?嗰一晚做完節目十點幾,再上佢公司傾咗成兩、三個鐘。呢一傾,覺得好投契……

邵:佢咁諗啫,我都係純粹傾下。

嗰幾個鐘齋傾偈?對對方有冇遐想?

蝦:冇……

邵:佢有㗎!因為我揸電單車,佢童年回憶都係坐爸爸電單車大。

蝦:我本來係扶佢膊頭,佢話安全啲應該要攬腰……

邵:我話安全啲應該要揸住下面……(開腔唱)原諒話也不講半句,此刻生命在凝聚……

蝦:哈哈哈

蝦頭嗰晚覺得邵子風係多事定好多諗頭?

蝦:最大感受係,我好想講吓,但係冇人同我講呢啲,嗰日覺得呢個人,咁多橋、咁多諗頭、又會花咁多時間喺一個唔多熟嘅人身上、會為我將來打算嘅?

所謂學院派,入電視台同入屋係唔係禁忌?

邵:藐㗎!

蝦:係藐㗎!有啲人會藐,有啲人就算好想,都唔敢開口。嗰陣時我對網絡了解唔多,但佢已經係網絡教父……(邵被喻為第一代網絡紅人)

邵:唔好咁講,網民嚟啫。對笑,我自細已經有好深入嘅研究同獨特見解,我想做梁醒波、許冠文、周星馳呢種代表一個年代嘅笑匠,奈何冇機會,當我發現佢可以,但係做緊嘅嘢好「細蟻」,就忍唔住要講。

邵子風真係有病

過咗咁多年至拍拖,嗰一吓又點解會撻得着?

邵:其實有一日,我着衫着少咗……但凡女仔同我相處,好難唔鍾意邵子風,我真係殺女無數㗎……

蝦:我成日拍拖、好多戀愛故事,多到出書,我以前戀愛生活好少展現於人前,唔係 show off嗰種人,今次唔知點解,會有人關心真定假。我哋以經理人同藝人身份合作咁多年,好多難關、好多低潮,大家都喺對方身邊,呢個唔係鍾意一個人就會遇到。因為互相支持互相鼓勵,對方無論幾差幾樣衰幾多壞習慣都見過,要開始嘅嗰一日就開始咗,我記得佢嗰日情緒好低落。

點解低落?

蝦:佢有病。

邵:我有好嚴重嘅燥鬱症,即係燥狂加抑鬱,已經好多年,我真係好難相處。公司夥計好多人走,就係因為我惡頂。我又咁睇,咁都唔走,嗰個人一定係好叻、一定明白我嘅獨特之處。我早年燥狂多於抑鬱,近年抑鬱多於燥狂……

蝦:你𠵱家都好燥狂……

係囉,你𠵱家都好燥狂,以前點為之再燥狂啲?

邵:例如全公司啲人㩒住我,唔俾我攞嘢掟龍小菌。

小菌做咗啲咩你要發火?

人哋話晒係你前度?

邵:哈哈……講呢啲……咩前度?係我現任藝人!你哋影到嗰張相(十指緊扣)我一早答過,唔可以求其搵個戴口罩嘅人就話係我嘛……

頭先蝦頭眼紅紅,𠵱家俾你破壞晒氣氛喇!

邵:(又唱)我最初面紅……

蝦:現在雙眼通紅……

邵:唔記得喇…… 09年搞公司開始,我發現我有事嗰日,係用雙腿摧毀咗公司一個鐵櫃……踏到對腳幾乎報銷,同事送我入醫院,而我係唔知自己點解要發火、點解會喺度,我就知要睇醫生喇。我嘅病好大反差,日頭覺得自己天下無敵,夜晚想跳樓,攞藥返嚟食咗會變傻仔,一個月以後即停。

點解你咁賴皮,死都唔認小菌係前度?

邵:咩前度啫?都話唔係囉!係賴皮㗎啦,邵子風不嬲都賴皮㗎

蝦:其實呢啲嘢係會發生喺浪子同流浪花之間,十指緊扣又如何呢?

有情人互相吹捧

蝦頭話你兩個關係改變一刻,又係因為邵子風情緒低落?

蝦:佢有心事時我會 sense到,嗰晚佢同我講,我又用我嘅經歷去開導佢。唔記得係邊日,唔記得係咩事,其實拍咗拖一段日子,至喺 4月 1日公開。總之嗰一下大家互相扶持之下,覺得對方係可以一齊行落去嘅嗰個人。

邵:(盧冠廷唱腔)陪着你走……

同邵子風相處,蝦頭你唔覺得煩嘅咩?

蝦:其實我已經有方法處理,佢鍾意講、鍾意講唔停,咪唔理佢囉。

佢對人燥狂,有冇試過對你燥狂?

蝦:佢燥狂之前,我仲燥過佢我哋兩個成日開片,幾開心㗎,增進感情㗎!

所以邵子風經常上網搞事,大家要原諒你、體諒你真係有病?

邵:使乜你哋原諒啫,我自己都唔原諒自己搞唔搞事係一件事,有啲嘢係性格嚟㗎……路見不平,我覺得基本嚟囉。但呢個社會就係咁,關你咩事啫?又唔係打劫你!

情人眼裡,總會覺得對方有啲地方特別正、頭頂有光環,蝦頭你呢?

蝦:佢喺我心目中,成日都好正,我揀得同呢個人一齊,佢一定喺我心目中比其他人更加發火發亮。

喺佢咁正義嘅時候?俾網民鬧時,唔縮反而更勇?

蝦:我最欣賞就係佢呢份堅持,好多人就算有諗法都未必出聲,但係佢敢言有態度,就算俾人鬧都會據理力爭,佢唔係吹水,係有 point支持自己喎。

你唔怕佢咁樣落去會出事咩?

蝦:其實佢已經出咗事㗎喇,佢自己知。當然,我𠵱家身份唔同,會講我嘅擔心俾佢知,會討論唔會隱瞞。

邵:我𠵱家已經講少咗喇,同佢一齊,已經就住就住喇。一定關佢事,我講一句,記者會寫、又會辣到佢,不如講少句。

講番轉頭,蝦頭頭先做咩咁感觸?

呢幾年有冇試過你都覺得難頂想走?

蝦:我覺得共富貴容易,共患難、真係可以一齊經歷嘅人就未必遇到,我咁多戀愛經驗,嚟到呢個階段,自己到底想要一個咩關係行到最後?我會搵一個同行、一樣鍾意笑嘅人一齊。真正同一個人一齊,係要睇到對方缺點,我好清晰㗎𠵱家。

邵:佢以前唔知自己有咩咁好,喺 PIP賣晒飛都唔知自己點解得。係我同佢講:「蝦頭你一定得,唔得我切個頭落嚟俾你。」結果佢呢幾年行得好好,下個工程就係要做我自己……咁多年係得佢一個咁話我,幾乎每一日都咁同我講:「邵子風,你係一個天生嘅喜劇演員。」

對的人演絕的橋

下一步係你哋兩個情侶檔?

蝦:有個咁嘅諗法,不如一齊演,拍檔喺香港冇出現過。

邵:我比較按步就班,佢演戲經驗多過我好多,我嘅身份未算平衡,所以我爭取緊更多演出機會。出年,由我一個人嘅獨腳戲開始, one man show以後就係 two man show,我成日覺得,由我同蝦頭做晒全世界嘅男女關係會好正。

由經理人變男朋友,跟住書展推出拍拖心得自傳,下一步再做 two man show,難怪外界質疑你哋拍拖係宣傳橋段,你都諗得好盡喎?

邵:橋嚟講,最終如果我演得唔好,條橋就會散……你話若果我真係演得好,咁就絕喇……

所以話你哋兩個天生一對,就算真係一條橋,都唔係個個搵到一個人同你一齊做呢場戲?

蝦:一齊嘅時候都有一個感覺,雖然我哋有啲嘢有衝撞,但係夾起上嚟,威力亦都可以好大。佢睇過咁多藝人,對藝人、對社會發生甚至未發生嘅事,眼光都咁準。你話橋,邊有咁易,你估睇緊《我是歌手》咩?台下全部都係演員咩?

邵:其實好好睇,最後一個訪問,承認所有嘢都係假嘅,所有場景都係搭出嚟嘅……

蝦:直情可以拍套戲啦。

邵:我呢種人係以呃全世界為樂㗎!

若果係真愛,你哋互相成就咗更好嘅自己,其實都好完滿。

邵:我都覺得係,佢的確改變咗我好多嘢。例如我以前唔返屋企、永遠都喺公司瞓,我覺得大禹治水,路過家門而不入,我做大事,未成功做咩一定要返屋企啫!

邵子風,你有咩同想蝦頭講?

邵:(又唱)我盡力學習成為男人……做事認真……

蝦頭咁你呢?

蝦:要達到你嘅目標,仲有啲路要行,我會陪你一路行,同埋想你再健康啲、開心啲……(又眼紅)

邵:(再變盧冠廷)陪着你走……

戴咩 bra好?



邵子風係橋王定抽水王?係網路紅人還是網路麻煩友?無論如何,上週意外頻生,我要謝謝他臨急臨忙答應和蝦頭情侶檔上陣,關鍵時刻救了筆者,拔刀相助正義朋友確係真!

拍照前,同邵子風通過幾次電話談細節。其中一通,佢問我蝦頭該準備甚麼內衣,我說一深一淺一有帶一冇帶,他聽了就在電話裏重複講給身邊的蝦頭聽:「帶兩個,一深一淺,一個有帶一個冇帶。」

我想話,係經理人、係男朋友、係拍檔、仲要一齊住,你話幾方便呢?

鍾意就快D Share啦!