掃呢頁CODE去手機

2015年7月29日 星期三

亂畫無聊發明博到 like 東尼電機:會同曹宏威合作變實物! [FACE - 427] 曹宏威,MF,



東尼電機喜歡以日常生活遇到嘅問題嚟諗發明,全部都只係騎呢好笑,造唔到實物為主。

爆 Like王

亂畫無聊發明博到 like 東尼電機:會同曹宏威合作變實物!

發明呢家嘢最緊要講腦筋發達,外國有個 Tony Stark研發 Ironman,香港都有個 Tony Leung,唔係梁朝偉呀!係「東尼電機」呀!

「東尼電機」啲發明唔係用嚟打外星人,係笑死人,或者笑死啲外星人。所有發明都係畫出嚟,搞笑抵死如「雄風紋身」喺女友面前威番次、「斷正閃燈」偷食唔怕畀女友發現等等。作品喺 fb專頁發布有成 3萬幾人 like,今年書展出版第 3本作品《癡心大發現》又大賣;更同曹宏威博士合作,發明咗幾樣防止食飯時玩手機產品,真係會有實物㗎今次!

斷正閃燈

「斷正閃燈」戴住佢同女性朋友去街,萬一俾女友撞到,即閃到對方乜都睇唔到,然後逃之夭夭。

雄風紋身

「雄風紋身」手心紋咗隻死蚊,女友俾蚊騷擾,即扮一手捉住,好威威!其實隻蚊已經飛走咗!

反骨遮

「反骨遮」同女友雨中漫步,把遮俾大風吹反咗都唔使驚,反轉用另一邊手抦即可。

F:《 FACE》 東:東尼電機

F:你自己同網友最鍾意邊個發明?

東:我最鍾意而又好想整到實物嘅,係「失望短裙」,啲女仔着短裙上電梯好易走光,我發明條裙只不過封咗個裙底,得兩個窿伸對腳出嚟,好簡單嘅設計但又解決到問題,諗嗰陣係從女性角度出發,整到出嚟都幾好笑!網友最愛應該係隻碗,叫「衞生篤插」,茶餐廳侍應成日插隻手指落啲湯麵度,我就喺碗邊整個窿畀佢插,咪唔使掂到啲麵囉!

Tony最愛「失望短裙」,着住就唔怕走光男士們失望啲啫!

「衞生篤插」喺碗邊有個窿嘅設計,侍應有插手位就唔使整污糟碗麵有實物都幾正喎!

F:幾時開始畫公仔?

東:小學已好鍾意畫啲書畫到花晒,當時好興日本漫畫,《龍珠》呀、《 IQ博士》呀,跟住嚟畫囉!唔聽書㗎,所以讀唔成書囉!一直想做漫畫家,個腦不斷諗可以喺呢方面發展喎, F.5後去咗做漫畫助理,畫過《醉拳》,負責擦啲鉛筆稿呀,撥走啲擦膠碎咁囉!冇得發揮㗎!後來跟啲日本風嘅漫畫家,跟過劉雲傑,開心啲囉!真係有啲景畫下,唔似啲打書一式一樣。後來轉咗去《 Teens》雜誌畫連載,又同朋友合資出咗一本叫《愛情 magic touch》,叫完成咗夢想。

考考東尼電機,即席畫一個「做到局長嘅多功能垃圾筒」,究竟畫咗啲乜出嚟?下載 FACE Pop睇片

東尼電機第 3本作品《癡心大發明》幾十項發明以愛情做主題,佢話同之前兩本冇主題亂糟糟好唔同喎!

東尼書內少有政治作品,但 fb就有好多,得閒睇下發洩下都唔錯!

F:點解變咗「發明家」出書呢?

東:畫畫下去咗大一讀設計課程,做咗設計工作,輾轉𠵱家喺酒店做 in-house designer兼繼續讀設計,好無聊咁畫咗啲發明放喺自己 fb,啲人都有啲反應喎,阿 Sir見到就建議我用呢樣嘢去做 final project,就整咗本書攞去印,又索性開咗個 fb page將功課擺晒落去,後來愈嚟愈多人 like。我直情將啲書賣畀啲朋友,賣成本價 100蚊,原來真係有人俾錢買;後來出版社搵我,想喺書展出,上年書展就一次過出咗兩本,今年出第 3本。

F:你嘅發明有冇機會變成實物?

東:最近有電訊公司搵我搞個 project,題目係阻止食飯玩手機嘅發明品,同曹宏威博士合作,我負責諗 idea,佢要寸下我啲設計唔 work咁,最後有 3個 idea畀人投票,一個係好長嘅眼罩,戴住睇唔到個手機;有一個係隻假手,食飯時擺喺枱邊,形成錯覺好似有人想偷你手機咁,就唔敢攞出嚟啦,遲啲大家會有片睇。另外同一間集資公司合作,我發明啲嘢放上網集資,啲人投放資金後會製造實物,但𠵱家仲係初步未有得睇住。

曹宏威同東尼電機針對食飯玩手機出到提案咁大陣仗,上東尼電機 fb就知發明咗啲乜嘢。

早前一間集資公司邀請東尼電機搞咗個講座,介紹咗好多無聊發明,遲啲會有實物認真集資,集資成功就會推出產品發售。

鍾意就快D Share啦!