嫌棄男角
無綫花旦買少見少，阿佘應承接拍重頭劇《呂后傳》，但眼見劇中拍檔竟然是低自己幾班的黃浩然和張致恆，最後她以擔心頸椎舊患復發為由辭演。
娛樂喧
阿佘拒演陳凱琳未夠班 《呂后傳》胎死腹中
佘詩曼自 13年翻簽無綫後，講明一年一劇，本來今年 3月接拍李添勝的宮廷古裝劇《呂后傳》，但臨開工前卻稱病辭演。據知她思前想後，唯恐男主角黃浩然唔夠班，未必幫到收視，唔拍是最好選擇。
新劇臨陣易角，頭痕死一班高層，據知公司曾考慮胡杏兒、楊怡及周麗淇頂上，但一眾花旦統統拒絕。無計可施下，便決定由近期備受力捧的陳凱琳執二攤。
可是本刊收到消息，近日《呂》劇監製李添勝發現自己心臟血管塞了三成，醫生建議他少操勞，加上有高層擔心陳凱琳太嫩難孭飛，《呂》可能開拍無期。日前添哥亦親證：「今年應該開唔到㗎喇！」
近年興起古裝宮廷劇熱，遠至無綫出品《宮心計》、《公主嫁到》，以至內地的《甄嬛傳》及早前播完的《武則天》，套套勁收，演員亦個個紅晒。
男角貨不對辦
既然有好收視，無綫亦唔執輸，本決定今年 3月開拍以阿佘、黃浩然孭飛，李添勝監製的《呂后傳》。但劇集至今仍未開得成，原因是阿佘在今年 2月，突然自稱擔心頸椎舊患復發，不能負荷重逾十磅的古裝頭飾而辭演。無綫雖然出動珍姐及樂易玲做說客，但阿佘最後都拒演。
其實阿佘一向有收視保證，加上《呂后傳》擺明以她一人做膽，發揮機會頗大，冇理由有好籌唔執？一知情人透露：「咪就係因為黃浩然囉。舊年拍巡禮條片嗰陣，阿佘已經口頭應承公司接《呂后傳》，但當時公司話男主角方面會搵個有分量啲嘅先襯得起阿佘，黃浩然係齋拍嗰條宣傳片㗎啫！但今年添哥搵阿佘傾劇本嗰陣，阿佘發現男主角竟然用番浩然。佢覺得貨不對辦，既然唔夠火花，拍出嚟都唔夠好睇，所以阿佘最後拒絕咗公司。」
男女角都要換
阿佘一句「唔拍」，臨陣易角，無綫上下嗌晒救命，據知珍姐親自出馬先後搵過胡杏兒、楊怡、周麗淇。「杏兒最近約滿，無謂咁辛苦啦，拍吓拖好過；而阿怡就冇興趣執三攤，一口就推咗；添哥對 Niki（周麗淇）有意，不過太臨急臨忙叫， Niki嗰邊話冇期喎！」知情人續說。
無綫思前想後，珍姐與添哥打算起用備受力捧的陳凱琳，但卻要犧牲黃浩然，知情者表示：「呂后係個好有霸氣嘅角色，加上嗰啲頭飾要好誇張、好壓場， Grace（陳凱琳）咁瘦、個樣又鬼鬼哋，真係唔係太適合。所以公司到依家仲諗緊有冇其他人選，如果真係搵 Grace拍，浩然就要俾人飛啦，因為珍姐同添哥都想搵番有分量啲嘅男一襯 Grace。心目中屬意阿 Joe（馬德鐘）同祥仔（黎耀祥），覺得佢哋有氣勢啲。不過佢兩個個期又要再度過，所以套劇咪一拖再拖囉！」
添哥血管塞要停工
演員未埋班、劇本又大執，但最麻煩是早前李添勝做身體驗查時，發現心臟血管塞了三成，醫生建議他多休息，所以工作進度惟有拖慢。日前記者致電添哥求證患病一事，他直認不諱：「老人家實有病痛，醫生話暫時未使通波仔，總之注意飲食，唔好操勞，所以我得閒咪同老婆去多啲旅行囉！（咁《呂后傳》開唔開得成？）執吓劇本先演員都未定好，今年應該開唔到。（係咪阿佘唔肯拍，依家轉為陳凱琳頂上？）係我想用新人，唔講咁多喇！」真正係一波三折。
花旦先後辭演
|
鍾意就快D Share啦！
|
|
|
