掃呢頁CODE去手機

2015年8月6日 星期四

暑期新片 林嶺東好帶挈 古仔喪跑浸水做肯雅古 [壹週刊 - 1326] 古仔,林嶺東,古天樂,M1,



臨時演員手上攞住的開山刀係堅嘢,稍為走漏眼,隨時要 call白車。

探熱針

暑期新片 林嶺東好帶挈 古仔喪跑浸水做肯雅古

E神嫂徐濠縈因為鍾意跑馬拉松,被圈中友好封為肯雅徐,最近古天樂亦因為林嶺東,失驚無神做咗肯雅古。在新片《迷城》中,林導一聲令下,古仔由銅鑼灣跑落避風塘,仲要在南丫島浸足一日鹹水,冇 say no!不過,相比跑得更遠、浸得更長時間的余文樂和張孝全,林嶺東已經厚待了肯亞古!

跑到腳軟

同杜琪峯同期出道又好好兄弟的林嶺東,同杜導一樣,開戲只用自己演員班底,繼○七年《鐵三角》一片後,月中上畫的《迷城》,古天樂依然係膽!

電影去年六月開機,開拍不久,一場飛車戲已經令古天樂的替身受傷,要送入深切治療部留醫。經此一役,導演林嶺東更加緊張,加上古仔同一時間孭住幾部戲,有乜「依郁」,火燒連環船,於是所有危險動作,都交替身上陣。

「有啲場口我覺得自己做到,導演都唔俾,一定要替身做。」古天樂說。

其中有場追逐避車戲原是一鏡過拍,林嶺東亦臨時改為分鏡將場口斬件,方便替身替古仔拍避車鏡頭,但古仔覺得一鏡過的拍攝手法較有效果,一度同林導拗撬。

「真係有風險,所以導演先放棄一鏡過拍,替身都試好晒位,但古仔堅持話自己 OK,係咁𦧲導演俾佢試一、兩次,唔得先再搵替身拍過。」一名幕後人員說。

另一場跑落銅鑼灣避風塘的場口,因為冇乜危險,導演讓古仔上陣,每次一口氣跑十分鐘,拍了差不多近十 take先收貨,跑到腳仔都軟埋的古仔,從此得名肯雅古。而拍落水戲當日,拍極林嶺東都唔啱心水,最終古仔由朝早零九浸到下午六點,太陽落山。

南丫島拍落水戲,由天光浸到收太陽,古仔浸到呆晒。

同台灣演員高捷船上肉搏,古仔七情上面。

錫晒張孝全

古仔因為一身片債,林嶺東唔敢輕舉妄動,但同片的張孝全和余文樂,就冇情講!

有場戲要兩人由觀塘碼頭起跑,接去銅鑼灣避風塘再跑落北角,跑足三日,之後再分別在南丫島和北角碼頭落水,浸鹹水拍足成個星期;在北角碼頭埋位的張孝全因為長時間浸在污水中,搞到皮膚敏感。

肯捱肯做,林嶺東重重有賞!十月開拍的新片,已落實預埋張孝全一份。

北角碼頭水質差,浸足成個星期的張孝全中招皮膚敏感。

初次拍動作片,表現突出的張孝全獲林嶺東再召入組, 10月開拍的新片預留一角。

跑勻港九,仲要揸住貨真價實的開山刀拍動作場面,余文樂坦言體力全透支。

余文樂跳水有姿勢有實際,但導演要求高,拍足幾日先收貨。

鍾意就快D Share啦!