網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2015年8月13日 星期四

又嚟料 代罪祭品 草蜢《超強》被失踪 [壹週刊 - 1327] M1,



探熱針

又嚟料 代罪祭品 草蜢《超強》被失踪

錢嘉樂、森美及草蜢做主持的《超強選擇 1分鐘》,有錢派有三點式波女力谷,是無綫暑假重點節目,不過首播遊戲系統伺服器竟出現故障死機,錢嘉樂又老貓燒鬚,在鏡頭前騷答案貓紙。開波脫腳落人笑柄,方丈氣難下,將一直忠心的草蜢當祭品,第六集開始「被失踪」。

出師不利

方丈余詠珊主導綜藝科後,逢暑假檔必定揼錢做遊戲節目,又會下令全台藝人幫手谷收視;今年的送錢遊戲節目有《超強選擇 1分鐘》,不過第一集出街 server死機,搞到主持之一的蔡一傑在鏡頭前手指指 O晒嘴,好失禮。

「之後無綫死撐話唔係死機,系統健全,但傑仔(蔡一傑)同森美嘅表情根本話晒俾人知出咗事。過多幾集草蜢就無聲無色『被失踪』,無綫仲以『知道你哋都忙,之後有適合嘅先再搵你哋幫手』,同當日 Bobby(歐陽震華)傾續約俾人冷待嘅情況一樣。」知情者說。

出師不利加上收視跌,據知,余詠珊竟將責任歸咎到草蜢身上,認為過往做過《華麗明星賽》和《快樂聯盟》的草蜢做主持唔夠班,蔡一傑「唔出聲」,蔡一智就「頻頻講錯嘢」,只有蘇志威比較稱職,但為保節目質素,都要出局。

生殺大權在我手!(設計對白)

第一集

《超強》第一集嘅遊戲系統伺服器故障,現場直播住各主持對死機反應,森美 O嘴,蔡一傑手指指。之後有指方丈不滿草蜢一時失誤表現,做完第五集消失!

唔使主持《超強》,近日蔡一傑被稱腳部受了傷。

逢請必撐

過往草蜢撐盡大台節目,主持《華麗明星賽》碌盡人情咭,拍《快樂聯盟》上天下海乜都做,其他遊戲節目亦逢請必到撐,有功有勞,可惜都難逃被飛。

陳豪好俾面

「余詠珊做呢個節目想立功,佢特登加藝人騷錢俾公司大粒嗰班阿哥阿姐,希望佢哋上節目,好似平日唔做遊戲節目嘅陳豪,都俾面上去做嘉賓評判,企足成晚。至於出面啲星,紅嘅唔會睬你,奀嘅好似之前搵陳嘉桓同松崗李那,佢哋因為啱啱幫有線做過節目,結果俾樂易玲嗰邊投訴,話搵啲咁嘅人都唔益自己人。」知情者說。

收視谷唔起,仲要惹到四圍火頭,余詠珊將草蜢祭旗,洩憤!

有指第三集出現的陳嘉桓及第八集的松崗李那,事後招來內部投訴,指藝員科的高層樂易玲向監製詐型,問點解玩遊戲要搵外援唔益自己人,樂余鬥爭真係冇休止。

過往大台藝員玩水上遊戲守身如玉,但為對抗外援入侵,一眾港姐包括張秀雯,開放事業線。

打完齋唔要和尚

新秀出身的草蜢,同無綫一直保持良好關係,次次一 call就到,今次卻成為節目收視低的代罪羔羊。人情紙咁薄,難怪雞飛狗走,就算同無綫長期合作的曾志偉,亦心淡自己顧自己。

似無綫人多過似電影人的曾志偉,前年又孭正監製碌盡人情咭幫無綫拍劇集《 M Club》,李若彤、李麗珍、袁潔瑩、陳慧珊、葉蘊儀及張慧儀一呼百應「復出」,劇集出街受歡迎,有功有勞。

同陳國強分屬老友的他,眼見何麗全離巢後綜藝科冇人掌帥,於是向殼王引薦余詠珊入局,對方打完齋唔要和尚,甚至影響埋殼王,覺得志偉俾太多意見,雙方關係,已不似過往密切。

撰文、攝影、攝錄:娛樂組

nextplus.nextmedia.com

鍾意就快D Share啦!