擁34C魔鬼身材、有「咪神」之稱嘅梁政珏，今年1月14日註冊同大佢10年嘅生意人何思源（John）結婚，仲一擊即中，結婚個幾月就已經造人成功，而且一索得男陀男B，雙喜臨門。
不過，懷孕6個幾月嘅梁政珏，之前同本報透露會開刀生B，除咗因為遺傳咗媽咪有子宮後屈，仲有胎盤前置問題，如果選擇順產，好大可能會有出血問題，所以佢唔會選擇順產。
雖然梁政珏嘅胎盤前置問題冇台灣藝人徐若瑄咁嚴重，但醫生都建議佢多臥床休息，但係梁政珏日前竟然着晒三點式去曬太陽，身邊仲擺咗杯凍飲喺度，似乎唔多聽話喎！
梁政珏接受本報電話訪問就話：「唔係（唔聽話）呀！有聽醫生話成日瞓架！但可能瞓得太多，搞到條腰好痛，右邊腰直頭腫咗，所以先至去出去曬下太陽，等自己郁動一下。」佢又話：「唔知係咪因為陀仔影響咗荷爾蒙，我胃口都變晒，好似我本來一直唔飲奶，但依家就好鍾意飲，但最辛苦係0依家六個月幾月仲會作嘔。」
不過，仲有幾月就升呢做人母嘅梁政珏話，日前去做產前檢查見到囝囝個樣真係好開心，仲話醫生讚囝囝個鼻好高同下巴尖，所以佢都安樂晒。
另外，梁政珏又喺instagram貼咗幾碟餸嘅相，仲喺啲相落咗好有趣嘅tag，包括「有人叫加多d水點知被毀容」，還有「男仕恩物」及「何師奶遲下有精神就教煮餸」等，十分搞笑。
|
鍾意就快D Share啦！
|
|
|
