掃呢頁CODE去手機

2015年8月7日 星期五

防黃心穎介入 陳自瑤擬生B箍王浩信





其他影片:>>






去年有傳王浩信同「姣Wing」黃心穎因拍劇日而夜對而撻著,令陳自瑤(Yoyo)同王浩信一度冷戰,近期老公擔正嘅《樓奴》終於出街,事業發展有起色,Yoyo要再次打醒12分精神喇!

日前有報導指,陳自瑤11年用個女箍掂王浩信,成功逼婚,產後專心匿喺屋企湊女,由王浩信主力賺錢。亦因為咁,夫妻間權力差距愈來愈懸殊,王浩信更曾被影到對住Yoyo兩母女黑口黑面。對多陣老婆都嫌煩,相反,拍《東坡家事》時對住黃心穎就笑到魚尾紋都出晒嚟!

因為冇人,王浩信喺大台上位神速,而Yoyo為免老公再次「身痕」,時刻管到實之餘,決定使出大婆必殺技──追仔箍老公!早排下晝,陳自瑤喺《樓奴》宣傳活動結束後,即刻鉗實老公去圓方睇戲。

全程行街,兩公婆都各自修行,冇乜交流,各自對住空氣講嘢。Yoyo睇手袋,王浩信就眈天望地,好唔耐煩咁,連食飯都好似搭枱咁,各有各食。見Yoyo當日身穿鬆身褲,但身形仍肚凸凸,孕味濃,黑面王浩信又罕有地全程拖實老婆,唔通真係成功追到第二胎?
鍾意就快D Share啦!