小小超李澤楷係城中超級鑽石王老五，佢同梁洛施分手之後，佢感情生活自然受到關注。上個月有讀者撞見小小超同一位齊蔭長髮女仔喺灣仔餐廳談心，到早幾日，又俾人撞見佢同女伴喺泰國曼谷街頭又攬又鍚，個女伴似足之前灣仔個齊蔭女，極似係同一個人。
呢位咁得小小超歡心嘅齊蔭女，終於現真身佢睇落30歲，雖然唔係乜嘢超級美女，但五官端正，鼻樑直直，個樣好pure好白淨！原來，小小超早喺今年5月，已經同呢位齊蔭女一齊去日本名古屋，重比讀者撞見小小超同齊蔭女棄坐私家車改搭普通市民搭嘅交通工具添。
今日讀者鄧小姐透過本報「爆相爆片」報料，話睇完今日《蘋果》報道之後，發現齊蔭女同佢今年5月撞見嗰個小小超女伴外型似到十足十。
鄧小姐話5月3號喺名鐵名古屋站搭電鐵去中部機場，佢喺月台頭等車等候位置等下一班特急車，突然有兩個人好趕急衝入鄧小姐面前嗰部非特急車廂，雖然隔住玻璃，但鄧小姐好清楚睇到其中一個係小小超，而身邊另一個就激似今日見報嗰個齊蔭女。
鄧小姐話:「李澤楷上到嗰卡頭等車卡之後搵坐位，見到有一家人坐喺度，就同對方講個位係佢，跟住嗰家人起身，但原來李澤楷搭錯車，佢其實係同我坐同一班車，因為我上車之後，下一個站就見到李澤楷同個女仔上番車搭番我同一班。」
鄧小姐指小小超同齊蔭女喺機場站一出閘之後，兩個人就好依依不捨咁企到埋一埋，小小超仲一手拖住行李，一手攬住齊蔭女，鍚咗齊蔭女個面珠一啖，齊蔭女頭dup dup好唔捨得，小小超人於是又哄又0氹咁咬耳仔，兩個人癡纏咗5分鐘左右，齊蔭女就好依依不捨咁，同小小超人分頭走人，小小超冇同齊蔭女一齊搭飛機，剩得女嘅自己一個拖住行咗去機場。
鄧小姐話唔清楚齊蔭女係咪搭飛機返香港，但近距離見佢個樣，冇乜點化妝，個樣似乎好細個好文靜，睇打扮似有家底，而且好多時都係匿喺小小超身後面好怕羞咁款。
小小超喺呢幾個月內三度同齊蔭女現身名古屋、灣仔同曼谷三個唔同地方，睇嚟愛得相當癡纏。至於嗰位齊蔭女三現身都係着住款露膊連身短裙，衣着品味似乎都好專一咁呢！
| 各位讀者…「楷女郎」廬山真面目…現身!(《蘋果》讀者提供圖片) |  今年5月喺名古屋…拍拖拖!(《蘋果》讀者提供圖片) |  輕輕耳語…(《蘋果》讀者提供圖片) |
 又係錫面珠仔!(《蘋果》讀者提供圖片) |  攬到實一實!(《蘋果》讀者提供圖片) |  趕上車，不過好似上錯車!(《蘋果》讀者提供圖片) |
 似乎同日前另一讀者報料喺泰國見到嘅相中女子係同一個人嚟!(《蘋果》讀者提供圖片) |
|
鍾意就快D Share啦！
|
|
|