【馮仁昭四圍超】蕭亞軒有米男友 爆分訊
台灣天后蕭亞軒（Elva）噚日踏入36歲，凌晨12時好友喺社交網貼慶生相，雖然係生日嘅大日子，壽星女卻冇扮靚靚慶祝，仲連眼妝都懶得化，搞到個樣好憔悴，更重要嘅係，Elva嘅有米男友Elroy（石正祥）不見蹤影，身邊只有愛犬、楊謹華同男友等20多位朋友陪伴，「雙E戀」傳泛起暗湧。
原來Elroy返咗新加坡陪家人，佢家姐Arissa（吳建豪太太石貞善）前晚喺社交網貼全家福聚餐相，粉絲都擔心兩人感情有變，Elva只留言感謝好友：「我嘴不甜，但這種愛……你們真的有給我surprised到，而且，你們真把我放在心上，不離不棄，謝謝你們。」
■Elva（右三）生日男友冇影，幸有一班好友為佢開生日P。微博圖片
■Elroy於Elva生日當天寧返家陪家人都冇陪女友慶祝，「雙E戀」泛暗湧。互聯網圖片
■楊謹華（左）噚日喺微博貼佢同Elva嘅陳年比堅尼照，祝好姊妹生日快樂。微博圖片
Elva今年生日冇男友喺身邊，相反，另一位台灣女星吳辰君噚日喺微博晒老公為佢搞嘅美人魚生日P，上周五踏入37歲嘅吳辰君，大前年嫁畀內地官二代廖懷南，去年誕下女兒Mia，幸福滿瀉嘅吳辰君留言：「生日當天本想簡單和家人吃個晚餐，沒想到先生和好友們給我安排驚喜派對，很感動喔。」
撰文：馮仁昭
|
鍾意就快D Share啦！
|
|
|