掃呢頁CODE去手機

2015年8月3日 星期一

石詠莉拍MV喊爆: 鄧健泓搞喊我最多 石詠莉,鄧健泓,



【碌爆親友牌】石詠莉拍MV喊爆: 鄧健泓搞喊我最多

2015-08-03 15:31:00



石詠莉新MV由Sukie男友鄧健泓度橋大玩概念創作。

石詠莉(Sukie)早前拍攝MV《聽不到的說話》,MV正式曝光,今次MV由Sukie男友鄧健泓(Patrick)度橋大玩概念創作,仲搵嚟同師弟妹出鏡講出自己聽過最難聽或討厭嘅說話,陳詩慧(Eva)話佢聽過最難頂嘅係:「你唱咩都冇用。」,而張建聲係:「收皮啦你,你冇用0架喇!」

至於Sukie三位至愛父母同男友都罕有亮相,Patrick聽過最傷心嘅說話係「I Don't Love You Anymore」,而石爸爸從來未同囡囡講過嘅說話係;「女,我愛你。」但最令佢憤怒嘅說話就係:「最憎人問候我老母。」石媽媽就話:「老公陪我食晚飯已經很滿足。」佢要同阿女講嘅係:「多謝你嘅孝順,俾心機做自己鍾意做嘅事。 」

喺MV入面,Sukie就講到佢最想聽到嘅說話係:「加油、你得嘅。」佢自問係個好簡單嘅人,講講下佢仲忍唔住抹眼淚:「希望大家可以聽清楚我把聲音。」

對於今次出動親友死黨拍MV,Sukie就當然非常感謝佢哋幫忙,但問到點解會被男友問到落淚嗰時,佢就話:「佢問我一啲問題嘅時候,觸動到我入行到而家嘅一啲神經,勾起好多以前畫面令我喊,佢係搞喊我最多嘅男人。至於曾經令我最痛心嘅說話,就係『你不如嫁人唔好唱歌』、『佢做唔起,做咩都唔得架』,但0依家回望番係對我嘅鼓勵,冇以前嘅經歷就冇今日嘅我。」

Patrick喺MV入面搞喊Sukie,佢解釋話:「佢好易喊,係成個大碟創作過程中遇到困難會喊,錄音唔好會喊,大碟出街成績好又喊,宣傳一時感動又喊。我好了解佢,所以要佢喊好容易,不過呢啲都係幸福嘅眼淚,女人用水做吖嘛。」



陳詩慧話佢聽過最難頂嘅係「你唱咩都冇用」。



張建聲係「收皮啦你,你冇用架喇!」



石爸爸從來未同囡囡講過嘅說話係「女我愛你」。



石媽媽就話:「老公陪我食晚飯已經很滿足。」



MV入面講講下佢仲忍唔坐眼濕濕抹淚。



今次出動親友死黨拍MV。

鍾意就快D Share啦!