掃呢頁CODE去手機

2015年8月19日 星期三

理大熱血索女 瞓身搞 OCAMP [FACE - 430 - 大專校園] MF,



鄭宇澄 Natalia

理工大學社工系 Yr.3

就讀社工系的 Natalie去過老人中心實習,喜歡幫人的她說:「一開始揀讀社工係因為自己鍾意幫人,去完實習之後更加覺得呢份工有意義。」

U花 U草

理大熱血索女 瞓身搞 OCAMP

八月迎新營旺季,經常喺街見到一班學生狂跑狂嗌。要數玩得最癲,最多靚仔靚女一定係理大大 O(學生會 Ocamp),嚟緊九月就讀社工系 final year的鄭宇澄( Natalie)更加係最搏兼最索組媽。

勵志堂出名玩得又多靚仔靚女, Natalie當然係數一數二嘅靚女

「呢個暑假我去咗一間老人中心度實習,九點返老人中心,五點幾放工就即刻返理大準備 Ocamp,整旗、整紀念品、排舞,日日凌晨三點幾先走,每晚瞓得幾個鐘。不過我覺得喺大學日子入面,可以做件咁熱血咁青春嘅事,幾忙幾辛苦都值得!當你見到咁多人一齊練舞 battle、一齊叫口號,好自然會對呢個地方好有歸屬感,好有感情,所以就算實習有幾攰都好,我都會撐住!」

要籌備一個三日兩夜俾五百人玩嘅迎新營當然不容易,事前功夫真係預備幾個月都唔誇張。不過偏偏今年理大大 O只有一個月時間籌備, 20歲的 Natalie解釋:「以往大 O都喺烏溪沙青年營搞,理大年年大 O都玩得好開心,有時會嘈到附近鄰居,又會玩傳統節目水 game,青年營今年拒絕咗我哋嘅申請,我哋到咗前一個月先確實可以喺宿舍搞大 O,準備功夫得番一個月預備,以前練舞有 30堂可以練,今年得 10堂時間,下星期就係大 O,呢幾日都會捱埋佢,希望到時啲 freshman玩得開心,有個美好嘅回憶!」

Natalie閒時會到皮革工作室做兼職,「一開始我係去皮革工作室學整皮革,點知個老闆話我手工幾好,我就膽粗粗話不如請我做兼職。」

為迎新營搏晒命狂通頂, Natalie就話好值得,「今年得一個月時間準備,好彩其他莊員都好明白體諒,付出好多時間都無怨言!」

撰文:葉浩婷

攝影:范仲良

化妝及形象: Kika Wong

鍾意就快D Share啦!