掃呢頁CODE去手機

2015年9月10日 星期四

晒鐘錶大王長孫 龐卓欣明寸麥明詩:我好大方! [壹週刊 - 1331] 麥明詩,龐卓欣,M1,



拍拖兩年,龐卓欣從不閃縮,亦未有因為選港姐剷走社交網站內和男友的親密合照。

探熱針

晒鐘錶大王長孫 龐卓欣明寸麥明詩:我好大方!

天生宿敵的應屆出爐港姐麥明詩(冠軍)和龐卓欣(亞軍),由讀書鬥到選美,鬥埋身邊男友,有個牛津大狀做觀音兵的麥明詩繼續被睇高一線。不過,鍾意拖男友晒恩愛的龐卓欣其實都唔輸蝕,男友 Solomon孫智威是鐘錶大王孫秉樞的長孫,身家地位絕不失禮。

相比龐卓欣大鳴大放,麥明詩對男友林作不認又認,扭擰得多!上週六(九月五日),她到深水埗出席保良局活動時,男友暗地隱身撐場,配合女友唔玩高姿態。

名人之後

參選港姐至今,亞軍龐卓欣毫不掩飾自己名花有主,獲選當晚,父母在中環蘭桂坊包場慶祝,男友 Solomon孫智威一直陪伴在側,大方任影。

對於拍拖已經兩年的男友背景,龐卓欣未有公開,外界只知對方是富三代。據了解, Solomon的祖父是有鐘錶大王之稱的孫秉樞,名下公司代理多個鐘錶品牌,在業內極有影響力,月前九十歲生日,「香港鐘錶業總會」還為他舉行大型壽宴。

聖 Jo仔(聖若瑟書院)的 Solomon,在 HKIS( Hong Kong International School)完成高中後,隨即遠赴美國 Babson College(巴布森學院)升讀大學。比龐卓欣大兩年的他雖然家底厚,但鬼仔性格加上打扮樸素,少有將家事向身邊人透露,故令人誤會他是 ABC。

「 Solomon喺 College有好多朋友,無論白人黑人都玩得好埋,放假就去睇波,好 local,同一般去外國讀書嘅香港人好唔同,所以開頭大家都以為佢係 ABC( American born Chinese)。」一名在波士頓認識龐卓欣男友的留學生說。

龐卓欣與男友同遊馬爾代夫,二人在碧海藍天下激嘴。

去馬爾代夫前,二人先在香港考定潛水牌,在男友影響下,龐卓欣不再晚晚夜魔女。

現年 90歲的孫秉樞在鐘錶界德高望重,兩子孫大為及孫大豪繼承父業,至於身為長孫的龐卓欣男友孫智威,大學畢業後任職貿發局,未有參與家族生意。

早幾日龐卓欣孖住東驥基金董事父親龐寶林(左二)和母親(左一),與男友祖父孫秉樞(粉紅西裝褸)等家人共進晚餐。

見晒家長

據了解,龐卓欣同前度分手,因愛犬的撫養權鬧上法庭後才認識 Solomon,男方被她的 happy girl性格吸引,主動出擊,兩人相識不久,便正式拍拖。

在美國留學期間,龐卓欣確實極愛夜蒲 clubbing,但自從同 Solomon拍拖,在對方的影響下,變成鍾意戶外運動,兩人都愛熱鬧,經常大班朋友一齊多人世界,拍拖兩年已經見晒家長。

「 Ada而家鍾意日間活動多過夜蒲,拍咗兩年拖, Solomon都冇變,盡量 keep住接送,好 sweet好細心,佢哋兩個都係性格大方,有嗰句講嗰句嘅人,不過 Ada如果做娛樂圈,太坦白就會俾人話寸。」龐卓欣的友人說。

猛料阿爺

「富三代」孫智威( Solomon), 13年於波士頓著名的巴布森商學院( Babson College)畢業,祖父是有鐘錶大王之稱、新達集團主席孫秉樞,現年 90歲的孫秉樞是業內老行尊,從事鐘錶業超過五十年,甚有江湖地位,名下坐擁十多間公司外,也是東方錶行、樂聲電子及卓能集團等多間公司的非執行董事和香港鐘錶業總會永遠名譽會長。 69年已做了太平紳士攞咗 MBE的孫秉樞, 85年獲邀做香港基本法諮委會委員外,亦肩負多個社會慈善團體崗位,銜頭一籮籮。

13年,孫秉樞(右一)與三太陳婉珍(右二)及高永文(中),一同出席東華三院董事就職典禮。

知道女友對獨角獸情有獨鍾, Solomon今年特別為龐卓欣準備了獨角獸蛋糕慶祝生日。

自力更生

作為鐘錶大王的長孫, Solomon並沒有參與家族生意,反而自食其力,在香港貿易發展局打工。連日忙於出席港姐活動的龐卓欣,週一(九月七日)到灣仔出席汽車頒獎活動時,被問到會否同麥明詩一樣,當選港姐後將男友降呢變為好朋友,她大有反應。

「吓!唔會點解呀?(公司冇俾壓力要你低調?)冇呀!(無綫)都冇俾壓力我嘅!佢哋俾我做番自己,我一向同我男朋友嘅戀情都好大方,我知佢個 background,冇乜特別!」

同男友感情穩定,但龐卓欣坦言不會在短期內結婚。「哈哈哈,而家太細個,廿三歲,拍多幾年先諗!」

同是女拔高材生的麥明詩及龐卓欣,讀書鬥到選美,天生宿敵。

週一出席港姐頒獎活動時,龐卓欣企硬要愛得大方,無意學麥明詩將男友降呢變好友。



大狀混入師奶堆

龐卓欣大方,更顯得樣樣看似勝一籌的麥明詩閃縮。

同牛津畢業的大狀男友林作拍拖兩年,依然唔認,還公開批評林作不夠成熟,搞到對方即時在 ig發功,自嘲自己「不夠成熟」。大狀男友唔 like,麥明詩即在 fb補鑊:「他和我都不夠成熟!」

上週六(五日),麥明詩、龐卓欣同何猷君等現身西九龍中心出席活動,原來麥明詩的大狀男友亦在場,企在外圍做觀眾。

現場所見,林作刻意在活動開始後才出現,只見他混入一班師奶堆中,含情脈脈𥄫實台上女友,又用電話影相,之後更在 ig上載一張女友在台上的大合照並留言:「 Truly boring. Aho faked me.」醒覺此舉會暴露行蹤,林作將留言秒刪。

活動去到義賣環節時,見一班師奶團開始散,為免被人發現,亦早走早着。

其後麥明詩被問到會否公開戀情,她繼續大耍太極:「唔知呀!我講咗我想講嘅嘢,橫掂都係大家有自己結論㗎」

上週六(九月五日),麥明詩與龐卓欣等到西九龍中心出席活動,大狀男友林作低調現身撐場。

林作靜雞雞混入人堆,不停舉機幫女友拍照。

今年四月,林作正式做大律師,在慶祝派對上,麥明詩跟林母一起招呼賓客。

林作上載大合照上 ig呻悶,之後發現自己行蹤曝光,立即秒刪。

被女友彈「唔夠成熟」,林大狀隨即在 ig上載一張煙肉書籤相,自嘲「不夠成熟」。

宿敵

港姐受訓期間,「十優狀元」麥明詩和「富貴女」龐卓欣已經屢傳不和,當選後,龐卓欣因和季軍郭嘉文聯手杯葛死敵,搞到被無綫照肺。

鬥多朋友

被指人緣差冇朋友的麥明詩,早前於 instagram晒相,力證自己有朋友;另一邊廂的龐卓欣即貼上與一眾佳麗約埋去食雞蛋仔,不過冇冠軍份。

唔知輸乜

不負眾望成為雙料冠軍的麥明詩以大比數勝出,屈居做阿二的龐卓欣即寸嘴表示非常滿意自己表現:「全晚冇咩特別輸蝕。」

互當透明

被無綫「照肺」後,麥明詩與龐卓欣即上演一場拖手一齊行真人騷,但早前出席公開活動時,二人又打回原形,在台上零交流,互當透明,龐卓欣只顧同其他人有講有笑,冷落麥明詩。

撰文、攝影、攝錄:娛樂組

nextb@nextmedia.com

鍾意就快D Share啦!