熱爆娛樂: 袋完三百萬黃鑽　周麗淇急撇落馬官二代 [壹週刊

2015年9月17日星期四

袋完三百萬黃鑽　周麗淇急撇落馬官二代 [壹週刊 - 1332] 周麗淇,M1,

談到有官二代埋身時，周麗淇表現避忌，以笑帶過。

探熱針

袋完三百萬黃鑽　周麗淇急撇落馬官二代

有傳 36歲周麗淇（ Niki）為了強國石油大亨，於是狠撇 30歲內地小生徐正曦； Niki愛攀權貴，亦非新鮮事。年前她曾跟大陸官二代搞姊弟戀，當時更收下價值三百萬黃鑽生日禮物；拍拖近一年，男友父親突然失勢落馬，她為自保即斬纜，勁現實！

北京箍仔

有嫁得豪的家姐周汶錡做示範，周麗淇與有錢人亦特別容易結緣！近年密返內地拍劇，更不乏官二代、富二代埋身，據了解，一一年同紗廠闊少拍拖期間， Niki曾劈腿快撻強國官二代；雖然對方細幾年，但對她十分嗒糖，追足幾個月，甚至特登人肉速遞到港獻殷勤，其時， Niki亦曾為了對方飛北京幾次，在官二代的朋友圈，二人是公開一對。

同年八月，官二代約埋成班朋友，組團去西非旅行為 Niki慶祝生日，為氹女友，更在當地豪擲三百萬，買了一粒黃鑽，作為生日禮物。之後， Niki亦戴過該黃鑽出席公開場合。

跟官二代拍拖數月，周麗淇便獲贈三百萬黃鑽，仲戴住出席活動。

家姐嫁個有錢人，更生了個可愛 BB，令周麗淇羨慕不已，希望同樣嫁得風光。

一一年戀官二代時，周麗淇不時飛北京箍仔，更去公園拍拖。

美國陪讀

官二代父親在國內有錢有面， Niki為了箍實筍盤，自西非回港後，不惜停工飛到美國陪男友讀書，在波士頓冧仔個多月。至一一年尾，傳出男友父親在官場失勢，初時二人還有保持聯絡，但到了一二年三月，官二代父親確定要落馬，翻身無望， Niki即狠心斬纜。

「官二代班朋友都見過晒 Niki，當時因為男友關係， Niki同前人大委員長萬里孫女萬寶寶都幾 friend，後來大家都知佢現實，其他官二代圈子都唔再同佢來往，而家 Niki只係黐班富二代。」知情人說。

近年北上吸金的周麗淇，生日也在大陸度過，生日蛋糕特別有強國 feel。

剛在大陸出席完鞋騷，努力吸北水。

徐正曦被周麗淇狠飛前，買了一架瑪莎拉蒂跑車給她，他付了五十萬首期，但周麗淇當成自己買的。

徐正曦人財兩失

有變色龍本領的 Niki，撇官二代後一度翻撻紗廠闊少，之後再搭上內地小生徐正曦。拍拖兩年，徐正曦突然出局，又係錢作怪。

「近年 Niki喺內地時間多咗，都識咗唔少富二代，但講到實力雄厚，而家呢個石油大亨應該屬頭幾位， Niki好鍾意黃鑽，拍拖冇耐又𦧲到對方送五卡黃鑽俾佢。要攞正牌拖新仔， Niki擺出姿態，高調撇舊愛。徐正曦財力遠不及官二代或富二代，但對 Niki就盡量做到最好，之前 Niki住貝沙灣每月五萬幾蚊租，都係徐正曦負責。

徐正曦為送 Maserati跑車給 Niki，向公司借糧，但都只係夠俾首期五十萬。其實架車係要一百二十萬； Niki話自己用九十萬買返嚟，因為唔係佢買，佢根本唔知價。總之，徐正曦就人財兩空！」知情人說。

對於有富二代新歡， Niki接受本刊訪問時，表現避忌。

壹：壹週刊周：周麗淇

壹：因為有富二代追緊你，所以同徐正曦分手？

周：（猶豫）真係有咁奇怪嘅新聞？

壹：聽講有好多富二代追你，你亦收過好多名貴禮物喎。

周：有啲咁嘅新聞？我唔知嘅。

壹：追你嘅富二代好多後生過你，你唔介意姊弟戀？

周：全部都唔係事實。