掃呢頁CODE去手機

2015年9月2日 星期三

畢業唔使食屎  90後插畫師靠花仔發圍 [FACE - 432 - 大專校園] MF,



想睇花生仔除咗買書,𠵱家仲可以喺 FACE Pop睇到中,每星期流星都會將潮文化成動畫,一齊剝花生!想睇?快啲 download FACE Pop APP

U人攻略

畢業唔使食屎  90後插畫師靠花仔發圍

家陣香港立立亂, fb見到都係啲市民鬧交爭執片,圍觀拍片食花生嘅人就有,勸交嘅人就好少囉!

剛畢業於浸大媒體及影視創作系嘅連嘉裕(筆名流星),就將呢種食花生睇戲文化,以漫畫形式變成主角「花生仔」喺 fb連載,上年 3月花生仔出世至今, fb專頁( Ohkashi純粹搞笑)成功吸引近 2萬人 like。喺書展,「花生仔」成為實體書見 fans兼搞埋簽名會,「係人都食過花生,所以我畫嘅內容,讀者一定會有共鳴。」𠵱家通街花生友,多 like唔出奇!

連嘉裕(流星) 22歲

浸大媒體及影視創作學士畢業

早前荷里活明星羅拔迪尼路向藝術學院致辭時話:「你哋畢業,食得屎」唔同醫科工程師,藝術難搵食係常識,讀媒體及影視創作嘅連嘉裕(流星)深明現實,所以上年初,佢開始在 fb開專頁畫插畫,抽吓 689水,希望殺出血路,「其實知道呢科出路好窄,要突圍就要增加人氣,人紅就多 job,呢個係呢行玩法!所以我咪靠插畫,希望增加人氣,等多啲人識!」

呢本《花生旅行團 01香港手作小旅行》總共用咗半年時間寫成,流星話會去 2個月台灣環島遊構思續集添,佢希望向旅遊插畫路進發。

網上圖片

「咩都惡搞吓!」

就係呢一幅抽水 9格漫畫,抽盡社會時弊水,短短 3日俾網民瘋傳達萬 5個 like,令流星呢個靚靚插畫師開始廣為人知。網上圖片

專頁一年間有近 2萬人 like,唔少網友讚流星啲畫得意又有共鳴,「本來我畫啲主題好無聊,但後來好似譚玉瑛被 out兒童節目主持,四點鐘許 Sir又咁 hit,我咩都惡搞吓,點知除咗網友 like,仲吸引都出版社,叫我出書!」

除咗插畫,流星為增人氣,仲百足咁多爪,拍微電影、剪片、寫專欄無一不精,佢仲要係學生會宣傳幹事兼平面模特兒:「讀 Art嗰陣已經覺得唔可以讀死書,因為 Art呢個範疇好大,唔單只畫畫咁簡單,你愈識得多就對自己愈著數,例如媒體創作、平面設計等,就算將來出嚟做唔成插畫師都可以有其他出路。」

通常啱啱畢業嘅 90後大專生要為前途煩惱,但如今剛畢業 1個月嘅流星已經身兼數職,正職係活動統籌主任,還集插畫師、畫室導師於一身,得閒仲會接吓剪片,寫吓旅遊博客,證明佢當初嘅犧牲都係值得。

但原來流星中學時係宅女,喺學校毫不起眼又唔多出聲,不過自從中四留完班,比同學嘲笑兼睇唔起,佢就決心要改變:「啲同學喺體藝讀得,一係運動超勁,一係藝術天份好高,相反自己好似係零,所以要發奮,上到大學仲慘,啲同學話我個樣似蒲妹,係典型 90後,我好想證明自己,唔想俾人睇死!」

學生會宣傳幹事

雖然學生時期嘅流星(紅圈)身兼多瓣秘撈,但佢絕對唔係摺友,除咗係學生會嘅宣傳總幹事,搞好多大大小小活動好似千人宴等,亦經常幫不同學會設計宣傳海報。

拍旅遊節目

流星(紅圈)拍咗 1分鐘短片去應徵做港視嘅節目,最後成功俾監製相中,搵埋佢做後期製作,一齊去拍內地旅遊節目《星級旅行團》。

夠真夠共鳴

「花生仔」咁受歡迎,全因主題夠真實,好似公開試必經階段,仲有打工仔心聲,所以就算畫功簡單都好受歡迎。

公開試惡夢

網上圖片

打工仔無限 loop

網上圖片

點解有花生仔?

講起「花生仔」出世原因,流星話事緣上年 3月又一城發生黑雨落雹撞穿玻璃的「水舞間」事件,發生後港人只懂瘋傳改圖及食花生抽水,啟發佢創作「花生仔」嘅念頭。

浸大多少女

浸大其實好多才女,除咗花生插畫師流星,仲有同樣係插畫師嘅謝曬皮,同入埋樂壇嘅女神 Yuki Lovey,入得浸大果然多才多藝。

謝曬皮

八十後插畫家,專以諷刺社會為題材,好似肖友懷單嘢,佢就將嫻姐畫成移民顧問,超抵死。

網上圖片

Yuki Lovey

原名勞嘉怡, 2013年加入樂隊壞碑唇,去年以 Yuki Lovey名義推出創作碟,被網民封為港版陳綺貞及唱作徐子淇。

撰文:彭家駿

攝影:林迅景

場地提供: DOT ART

鍾意就快D Share啦!