掃呢頁CODE去手機

2015年9月25日 星期五

樂樂盈盈細女首曝光 似邊個呢? 盈盈,樂樂,湯盈盈,



本月23號凌晨,錢家二小姐出世喇,個名叫做Kassidy,個樣時時變,依家已經收緊水,爸爸錢嘉樂笑囡囡好似OT完口腫面腫,仲越來越似媽咪,左邊面有酒凹。

之前有傳謂盈盈話細女若再似錢嘉樂的話,就會發爛渣,老友佘詩曼探B時都笑笑口話:「生多個囉。」不過錢嘉樂就話要等細女有自理能力先至再考慮。咁Kassidy究竟係似爸爸定媽媽?

今日下午三點零五分,錢嘉樂帶埋女兒凱晴,去山頂嘉諾撒醫院接盈盈同B女出院,見盈盈化了淡妝,黑色衫灰色長頸巾,一家四口笑晒企定任影。只見盈盈懷中B女好趣致,仲突然伸脷,可愛到震,亦有俾BB影咗幾張相,不過好快就影完。

之後兩公婆一齊受訪,嘉樂仔更送上kiss kiss,答謝老婆,盈盈亦回吻老公,兩人嘴對嘴錫錫,好鬼恩愛。至於老友Toby梁靖琪早於兩人出院前已抵達,手執一袋二袋應是BB禮物。

見盈盈面色好好,非常精神,仲話傷口喺生B第二日已經埋口:「醫生都話好快。」問佢痛唔痛?盈盈話唔痛,記者即笑指既然唔痛就可以快快追第三個,盈盈聞言大笑:「咁快?唔諗住喇。」嘉樂仔就話:「再追多個女?到時有三條女,仲唔贏晒?」又笑言一屋都係女,自己已經冇地位喇。

好可愛呀! 錫啖老婆先啦
鍾意就快D Share啦!