今年六月，何雁詩搭上日韓新歡 Wateru，拍拖三個月，二人愛得痴纏。
探熱針
新歡上場： Dry咗半年何雁詩轉食六呎韓男
○九年參加第一屆《超級巨聲》簽約無綫後，何雁詩終憑《四個女仔三個 BAR》成功「入屋」，事業有新進展，但瘟仔更緊要；去年與拍拖多年的謝東閔分手，「食齋」半年，最近搭上日韓新歡 Wateru，拍拖三個月，為 mark實靚仔男友，何雁詩幾乎每晚在男友所開的韓國餐廳打躉，做跟得女友。
返港即見
由「巨聲幫」升呢做「女神」的何雁詩，先後同過幫中的木偶哥林師傑和謝東閔拍拖，專吼高大靚仔的她，和謝東閔甩拖半年，今年六月，速上經營韓國餐廳、三十歲出頭的日韓混血兒 Wateru。
九月三日晚，剛與家人去完旅行返港的何雁詩，已急不及待，人肉速遞到餐廳會新歡。
晚上八時，白 tee牛仔褲便裝打扮的何雁詩，孖住一名女性友人到男友位於尖沙咀的上樓韓國餐廳，坐在餐廳露天位。
現場所見，熟晒架步的何雁詩，自動波去拎酒，自己招呼自己，而忙於招呼客人的 Wateru，只要一有空檔，就會埋枱陪女友傾偈，每次見男友走埋枱，擺出溫柔樣的何雁詩就望住對方，眼都唔眨，聽完男友講嘢，她又會笑晒俾足反應，表現冧爆。
一拍即合
「 Stephanie（何雁詩）同 Wateru係响呢間韓國餐廳識嘅，兩個都鬼聲鬼氣，所以一拍即合，差不多日日都見佢哋一齊！間餐廳係 Wareru同啲朋友一齊合作搞，開咗差唔多年幾，生意都唔錯。
「 Wateru係日韓混血兒，兩個人溝通以英文為主， Stephanie不時叫埋班姊妹好似陳瀅、阿 Moon（劉佩玥）嚟幫襯，輪流陪佢上去食飯，等男友收工，又成日喺 Instagram打卡，幫餐廳宣傳，有時亦會幫手招呼客人，好似佢自己有份一樣，對 Wateru特別認真！」
男友摸面
拍拖三個月，正值熱戀期，當晚何雁詩在男友餐廳磨到凌晨三點都唔願走， Wateru見女友開始有醉意，即摸吓對方面珠，然後護送落樓。
生得細粒的何雁詩聽晒話，任由身高六呎的 Wateru拖住離開。
專吼「巨聲」男
入行六年的何雁詩，出道以來緋聞不絕，個個唔係有米就係「巨聲幫」型男，好識食。
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|
