袁嘉敏（右）拍《鴨王》時扮大牌得罪監製王晶（左），《鴨王 2》順理成章由「晶女郎」文凱玲（中）攝位補上。
真面目
大換血 得罪王晶冇得翻生 袁嘉敏被飛 奀星攝位
港姐出身的 30歲「大波 Candy」袁嘉敏，把口唔收周圍辣火頭，拍《豪情 3D》搞到同杜汶澤反晒面，今年初拍《鴨王》又要求多多，連同劇演員何浩文 Dominic及何佩瑜 Jeana都怕咗佢唔敢埋身。
人緣唔好，《鴨王》監製王晶索性將袁嘉敏飛出《鴨王 2》，改由兩位晶女郎文凱玲及「 E Cup超蓮」鍾采羲補上。新戲繼續賣肉玩雞鴨戀，但兩個女角唔使露點，唔似袁嘉敏咁大犧牲。
得罪方丈，不過袁嘉敏依然寸嘴未驚過，話即使再搵佢都未必拍，「整到我上次咁就唔好」
據知袁嘉敏年初拍《鴨王》時諸多要求又扮大牌，辣㷫其他演員同一班工作人員，搞到監製王晶好不滿，落 order永不錄用。
鍾采羲︰佢多負評
王晶話大台冇胡杏兒唔係世界末日，更何況只係冇咗個袁嘉敏。簽落大把新女的王晶，決定起用同「大波 Candy」一樣係港姐出身的文凱玲，以及「 E Cup超蓮」鍾采羲補上拍續集。
無端端由奀星變主角，有望上位，「 E Cup超蓮」鍾采羲當然要加多腳幫老闆出氣，「我聽公司同事講過，話佢（ Candy）拍攝時有困難，唔係好合作！初時睇新聞（話佢麻煩）都唔知真定假，後尾聽同事講先知係真，啲人都俾幾多負評佢！」愈踩愈 high，鍾采羲仲扮傻寸袁嘉敏，「舊年女主角係佢咩？唔係 Jeana咩？不過佢嘅 attention大啲，因為露點嘛！」
晶女郎玩晒
接登台夠住豪宅
被飛出局、又俾人唱通街，照理好冇面，點知寸嘴 Candy又搵到個靚位落台，她以 WhatsApp回覆《 FACE》，「無接過（《鴨王 2》），而且我個角色原本戲中已經被槍殺死咗！《鴨王》其實係為捧個男仔，我哋只係 side character！」仲講到自己唔恨拍續集，「睇下幾多片酬又睇下個造型啦，又要整到我上次咁就唔好」
其實多得《鴨王》帶挈，袁今年接多咗大陸登台騷，快錢好易搵，住過鐵皮屋的袁嘉敏，早前去睇山頂豪宅。唔使點做都有本事交 4萬蚊租，區區一套《鴨王 2》算得咩先？
晶女郎愈捧愈 cheap
一提「晶女郎」，第一時間諗起邱淑貞，當年豆斗拍過《赤裸羔羊》、《香港奇案之強姦》等由王晶監製的經典港產片，其後在影圈爆紅！可惜之後無以為繼，近年的孟瑤、胡然等雖然都擁有人間胸器，可惜撈唔起，拍親都係做配角。
採訪、撰文、攝影：娛樂組
|
鍾意就快D Share啦！
|
|
|
