掃呢頁CODE去手機

2015年9月23日 星期三

女客關照深圳住豪宅 周永恒爆肌冧富婆忽然富貴 [FACE - 435] 周永恒,MF,



教到剝衫

周永恒單對單教中女客人做瑜伽,究竟點解要剝衫教呢?

封面

女客關照深圳住豪宅 周永恒爆肌冧富婆忽然富貴

今年初因涉嫌恐嚇老婆趙頌茹及向外母吐口水,被判入獄兩個月的周永恒,幸獲緩刑 18個月,唔使坐監。

執番身彩,不過阿 Yu堅決要離婚,周永恒成頭家散晒。香港冇人冇物,惟有北上搵出路。做開 band友的周永恒,近月黐住細佬 Ray,合股在深圳開了一間瑜伽中心。變身做導師的周永恒,上堂不惜剝衫騷肌冧客仔!賣肉求榮有回報,據知周永恒多得一班富婆客仔關照,現租住區內著名豪宅,與唔少當地名人做鄰居。

《 FACE》更發現表面上已同周永恒斬纜的 Ruby,竟然跟埋上深圳同居!個底咁花都可以繼續風流快活,周永恒呢隻小強真係生命力強喎!

31歲周永恒( Roy)今年 1月因普通襲擊罪成,被判入獄兩個月緩刑 18個月,當時 Roy獲母親安排到內地親戚家暫避,原來係交俾親細佬睇實,以免阿哥再出事。

操肌轉行

最初北上為避難,估唔到周永恒竟然轉行教瑜伽。《 FACE》發現,現時長居深圳的周永恒,在深圳一間名為「整合瑜伽普拉提培訓中心」的店舖做瑜伽導師。該培訓中心位於高級地段,附近有不少高尚住宅,出入大部分是中產階級及有錢人。

上週三( 16日)晚 8點,剷了短髮、運動褲加背心上陣,操得一身肌肉的周永恒現身培訓中心,單對單教一名中女做瑜伽。周永恒落力地示範唔同動作,表現得好有耐心,與以往暴躁性格有極大對比。

夜釣吊帶妹

教完中女,原來周生仲有下場,他專登行去街口接呢位黑 bra女,服侍周到!

露黑 bra

黑 bra女去瑜伽中心唔係上堂,反而跟咗周永恒上二樓密密斟!

專冧富婆闊太

上堂期間,中女一時向周永恒展露滿意笑容,一時以無助眼神表示唔識做,要求周永恒陪住練。一輪熱身後,周永恒進一步出招,忽然剝衫爆肌!上堂上到要除衫,真係第一次見,難得中女相當受落,笑得比之前更甜,而周永恒亦好識做,捉住對方隻手教玩健身器材,美男計玩到出神入化!

中女唔識做某啲動作,周永恒即跪低做示範。

周永恒逐個步驟細心教客人做,呢個溫柔樣可能連阿 Yu都未見過。

貼到實

爆晒肌教瑜伽,動作難免身貼身,一身肌肉加上現場單對單,真係好 hot呀!

好腰力

期間中女太攰要休息,周永恒就做高難度倒立動作 show off。

劇烈運動足足 20分鐘,中女滿足地離開課室,周永恒亦着返件衫送對方落樓,服務周到。去到門口,中女繼續捉住周永恒傾偈,唔捨得走,仲要喪玩 selfie,梗係成 600蚊人仔一堂㗎!中女離開後,周永恒同其他女顧客吹水,大騷手機入面的型仔相,氹到成班女人圍住佢,連訓練中心的女職員都忍唔住傾埋一份,足見周永恒冧女確有一手。據知他滿足了不少富婆闊太客,難怪在深圳留連忘返。

爆肌冧完中女後,周永恒單拖外出,原來是約了另一黑 bra低胸女食飯,之後周帶對方折返瑜伽中心,兩人在二樓密密斟近 1小時;一晚要應付兩位女客,但周永恒都唔覺攰,仲漏夜過關返香港,第二日又再返深圳教瑜伽。

專教夜班

周永恒同細佬有份投資的瑜伽中心,剛剛開張已有唔少女客人幫襯。轉做瑜伽導師的 Roy多數夜晚先返工,負責教 7點後的堂。中心最夜 9點幾關門,大把時間俾周永恒收工瘟女

大隻 King:唔可以隨便除衫

周永恒教瑜伽教到除衫,仲要係單獨對住女學員都照除!究竟咁樣啱唔啱規矩呢?自己開健身室嘅大隻 King趙勁皓就話,「每間 club都有自己規矩,唔會話啲客或者教練可以隨便除衫!上堂時少少身體接觸一定有,但就唔會除衫教,我亦都未聽過會咁做!」

小三 Ruby現身

以為周永恒修心養性專注事業,點知原來同小三 Ruby(劉依靜)未斷纜!上週四( 17日)晚,周永恒收工後急急腳走,原來約了 Ruby見面。兩人隨後竟然鬼鬼祟祟走去公園坐低,起初都傾得幾開心,不過之後愈講愈勞氣,周永恒激動到手指指, Ruby就愁爆托頭。

傾了 15分鐘,兩人手持一大袋日用品,一齊返回周永恒寓所。

位於深圳市中心的服務式住宅,去年尾才落成,屬區內豪宅,屋苑有齊 Wi-Fi、健身室及泳池,有不少當地名人居住。身無分文的周永恒能夠入住豪宅,全靠瑜伽班的闊太客關照,難怪要施展畢生功力冧客

17/9 未斬纜夜會 Ruby

周永恒喺香港消聲匿跡,原來已經移居深圳,小三 Ruby把口話斬咗纜,原來又係講大話!

Roy收工後會合 Ruby,不過兩人一見即黑口黑面,火藥味濃。

其後轉場去公園, Roy手指指似鬧人, Ruby就托住頭唔出聲。

返同居竇

最後兩人一齊返回 Roy的豪宅寓所,成晚冇再落過樓。

阿 Yu新生活

樂做單親媽媽的阿 Yu,週日( 20日)同朋友食 tea,生活寫意。

Ruby買元朗樓 方便北上

網上圖片

小三 Ruby入行多年都紅唔起,做極都係奀模或者喺劇集做大茄,但估唔到佢原來都有樓揸手! Ruby上年用真名劉嘉瑩,以 454萬買入元朗尚悅 1個單位。咦,元朗過關北上咁方便,咪可以成日搵周永恒短聚?

Yoga兄弟幫

周永恒曾經吸毒、家暴、有外遇,幸得細佬幫手,邀請佢北上深圳一齊教瑜伽,仲叫佢合股做埋老闆,周永恒先唔使留港做過街老鼠咋!

靚仔細佬

周永恒細佬周永基( Ray),唔只身形有線條又大隻,連樣都俊過阿哥好多!網上圖片

堅有 quali

Ray 04年已學瑜伽,曾跟隨印度瑜伽大師 Master Kamal學習,係 YA+美國瑜伽聯盟、 I.Y.F歐盟瑜伽協會認證導師,現為「整合瑜伽學院」教學總監。 04年,佢阿哥仲因藏毒被判感化!網上圖片

健康生活

Ray玩瑜伽超過 10年,經常外出參加表演同交流,生活非常健康。網上圖片

極速增肌

多得細佬帶挈重過新生活,周永恒積極操肌變大隻。網上圖片

雞手鴨腳

02年試過做 Pilates,可惜當時身手遲鈍,連啲簡單動作都做唔到!

不良嗜好

周永恒曾經沉淪毒海,之後又向阿 Yu家暴,又一度被爆有特殊性癖好。《蘋果日報》圖片

採訪、撰文:娛樂組

攝影:娛樂突發組(深圳)

鍾意就快D Share啦!