《鬼影帝國》斥資 23億港元拍攝。單是飛去墨西哥拍攝這場亡靈節場面，已招請了當地 1,500名臨時演員演出，絕對係大場面。
西區
打到七勞八傷 《 007》丹尼爾想唔撈
相信你，甚至你阿爸都係睇《占士邦》電影大。話咁快，今年已經係《占士邦》電影系列踏入 53年，而第 24齣邦片《 007：鬼影帝國》（ 007： Spectre），將於 11月打到嚟香港。
今次《鬼影帝國》中丹尼爾基克飾演的占士邦，將透過一名寡婦罪犯滲入一個秘密會議，發現邪惡組織魔鬼黨，繼而深入虎穴，進行正邪交戰。斥資 23億港元製作的《鬼影帝國》全以實景拍攝，男主角丹尼爾基克更因親身上陣上演多場驚險動作場面，搞到七勞八傷，令火爆丹尼爾忍唔住發晦氣話，寧願割手都唔想再演占士邦。
《 007：鬼影帝國》講述一則神秘訊息引領占士邦從墨西哥追蹤到意大利，途中遇上寡婦罪犯 Lucia（ Monica Bullucci飾），占士邦透過她參加一個秘密會議，期間發現邪惡組織「魔鬼黨」，為對抗邪惡組織，占士邦身陷險境。
1.今次《 007：鬼影帝國》投資幾多錢拍攝？
今次《鬼影帝國》為求真實，不惜工本用實景拍攝代替 CG。因今次電影涉足的國家除英國之外，還有墨西哥及意大利等，據知在墨西哥拍攝一場亡靈節場景，更動用 1,500名臨時演員做出嘉年華會感覺。而片中占士邦更撞毀 7架 Aston Martin名車。計計埋埋《鬼影帝國》一片總共豪花 2億英鎊（約 23億港元）拍攝，簡直燒銀紙，唔怪得成為史上投資最多錢的占士邦片。
2.今次丹尼爾有幾搏殺？
於《鬼影帝國》丹尼爾上演多場動作戲，如衝上直昇機追打壞人，更跳入反轉飛行的直昇機中對打，全部親身上陣演出。亦因太搏殺，丹尼爾在拍攝期間腳部受傷，並要做手術，但並不代表他可以慢慢休息，據知上月他仍要回片廠補戲，簡直收買人命。
3.聽講丹尼爾發晦氣唔再做占士邦？
現年 47歲的丹尼爾基克，最近被爆他所主演的 4部邦片，合共收約 7億港元片酬，成為史上最高片酬占士邦。但最近因拍新一輯邦片《鬼影帝國》搞到七勞八傷，早前接受訪問時，佢終於忍唔住發晦氣：「其實我演占士邦只為錢。現在我寧願用玻璃割手，都不想再拍邦片。」公開唱衰部戲，卒之搞到電影公司老闆下令他收口。不過有指丹尼爾最近終於同電影公司傾掂數，他會再簽多一部邦片合約。呢場大龍鳳，夠晒宣傳效果。
《 007：鬼影帝國》
上映日期： 11月 5日
撰文：何家文
|
鍾意就快D Share啦！
|
|
|