掃呢頁CODE去手機

2015年10月8日 星期四

黑燈 鄭融 [壹週刊 - 1335] 鄭融,M1,



豪語錄

黑燈 鄭融

鄭融成名作《紅綠燈》:「明明綠燈,轉眼變成紅燈……」揸車聽最啱,是少女故作老生常談了。

一語成讖,之後她事業走下坡,對應歌詞,你紅燈時人家綠燈,下次輪番你,家家有求,尚算勵志。但要命的是,老生常談並不等於永恒真理……立法會投票 28:8,竟然兩邊都算輸;睇慣恒指紅色代表跌,怎知內地股市綠色亦代表跌!根本已沒紅綠燈,只剩黑燈,全香港呆在十字街頭,前路茫茫。

鄭融尤其係,減肥猶如學無止境,敢言或封嘴都唔啱。高峰過了是低谷;低谷過了,是更深不見底……

她夠自嘲,索性來首《黑面神》。控訴嗎?睇化嗎?「都係唱吓啫。」

過日辰

作為男性看鄭融,只會嫌她嬌小,但翻閱其新聞離不開減肥失敗,我也照本宣科地問。

「是永遠講不完的,所以我決定冇嘢好講。我娛樂性不高,拍拖又穩定,冇乜話題。」鄭融夠 cool。

仔細觀察,她還帶點肌肉,觀眾睇肌肉等如肉等如腿粗,睇肉睇肉,不如由體育講起。

「感謝 Nike俾機會,我沒想過人生會跑四場半馬拉松,由三藩市到華盛頓到上海返香港,除了 keep fit還練鬥志,而且,都係收入。」

這句最老實,沉寂的日子,鄭融清楚記得,足足四年過得太充實——每天做家務、洗衫、放狗都不假手於傭人。

「多謝你問我點解會咁,因為你仍以為歌手話晒事——梗係唔係我不嬲想活躍,不是自己揀去唔活躍。

「當然擔心過,事情總有兩邊,灰心的一邊容易跑出,但可以好好利用另一邊,有空間靜下來。十二年(入行)以來,同年紀女仔應該識的生活,我最近才有機會接觸,例如學車、上網理財、報稅。」

正如你不相信那些財務重整廣告,理來理去,財不會因此變多嘅。

「一早有前輩教過,這行開心時別太開心,我一笑便大笑姑婆咁,下次笑少啲,便俾人話黑面。錢如是,用得太盡,搵少咗就弊,好彩父母提點着我,他們是我 anchor,是穩定我的船錨。」

黑面非神

說黑面是鄭融「死因」並不為過,有目共睹——她曾在電視上對記者做出疑似咒罵的口形,自此眾怒難犯,一蹶不振。

「十幾歲時不會問怎樣認識自己,一心坦誠就得。但這行是人際關係 business,學唱歌學跳舞,都不及學做人重要。

「並非什麼話題令我反感,正正相反,那種群訪場合,不同你專訪準備好來問我,基本上就是自行報料,我報不出料,便皺眉閉翳,怕人家怪我冇做功課。

「以前覺得只有真與假,現在懂得睇動機,為件事好,最緊要大家舒服。」

新作以《黑面神》為題,算是舊事重提抑或鬥怨激?

「我一向唱青春情歌,好正面,白𠽌𠽌咁,女仔咁樣穩陣嘛。來到今次都會諗,何必舊事重提呢?根本觀眾已忘記,不如 move on啦;真正仍存恐懼的只有我,但正因愈恐懼,愈不應逃避,剖白一下。

「坦誠畢竟是重要的,屈住屈住,報紙那些社會悲劇便由此而來。如果首歌引發到同樣困境的人有共鳴,也是一種正面。

「我並非驚世駭俗,你估我想嘅係咩?都係唱吓啫,可能下次輪到講我在天堂開心跳舞呢。」

新公司老闆之一的 Bob(林盛斌)永遠笑臉迎人,與鄭融成強烈對比。

「他是不是很愛笑?我和他很少傾偈,有,都談工作。他以大局為重,從不自我中心。

「我見過 Bob咬實牙關、吞聲忍氣,在公司後樓梯深呼吸;但幕前他專業地滿足客戶需要——不能期望人人理解你內心世界,觀眾睇的是第一眼感覺。」

黑面從來不算神,看看四面佛或千眼觀音便知,面面俱圓,方稱得上神。

當刻

黑色的燈,邏輯上不成立,世界就係冇乜邏輯好講。

「你比喻說交通燈失靈,是的,少了規矩、 pattern去捕捉,舊方程式行不通了,新方程式未搵到,我埋怨點解發生在我身上,其實不然,全行頭頭遇難關。

「以前期待有首歌爆出來就掂;但現在,是否要像《我是歌手》扭到爆粒音出來?你以為真的感動到喊嗎?

「以前簽 TVB便可上《勁歌》;現在簽又未必好,唔簽仲弊。卡拉 OK如是,以前簽一間便這間有那間冇,仲可以揀;現在乾脆愈來愈少人唱卡拉 OK。

「冇咗訊號,看誰夠膽先衝出去,通常做烈士、做炮灰。」

正如賦閒的鄭融考取了車牌,至今不太敢揸車出街。

「但怎說呢?每天起身、返工,有表演便交足貨,記得日飲八杯水 keep fit,一個人盡了本分總不會錯。練習,不能妄想有什麼驚天動地的事業去預備成就,要珍惜就是練習、不斷重複當刻的感受。」

當刻感受——我沒寫錯吧?雖然點聽,我都會誤以為她在說「當黑感受」。

一個人盡了本分總不會錯。

面面俱圓的老闆與黑口黑面的夥計。

同薛凱琪老友鬼鬼,鄭融自言比 Fiona更情緒化。

起步不俗,後勁不繼,鄭融說,入行十二年有一半時間等多過做。

Diamond Copy Cat

《紅綠燈》調子 easy listening,歌詞具內涵得來易懂,曾經是鄭融致勝之道。她自嘲,監製半講笑半認真說:「現在不等如整首《斑馬線》會大紅喎。」世界已沒「安全過路設施」。

所以,《黑面神》的延續篇是《 Diamond Cat》。「不能黑面到底,人要有很多面,鑽石也愈多切割面愈矜貴。」

堅強如鑽石,鄭融在努力學習中;但作為最硬的物質,切割鑽石惟靠鑽石刀——即係錢搵錢、不惜工本,道理也很顯淺,卻知易行難。觀眾慾求無限,而只願免費 download做 copy cat(歌影視以至資訊皆然),才是最大困局。

兩張派台的 single,前後呼應,黑暗中尋找光明。

撰文:余家強

攝影:胡春輝

攝錄:梁炳權

協力:鄧凱珊

髮型: Zing Wong@Hair Culture

化妝: Hubei Har

服裝:十舍 10thshop.com

nextplus.nextmedia.com

鍾意就快D Share啦!