探熱針
湊齊四個 徐子淇封肚勁喊
恒基「千億新抱」徐子淇，同老公李家誠的第四個 BB終於出世。九月底，成功避過傳媒耳目入院， B仔重 5.7磅，由爺爺四叔李兆基改名為李建熹。星期二（十月六日），恒基發放三張 BB相，正式對外公布有家庭新成員。
已經生到第四個，兩女兩子兩個好字，徐子淇同老公商量後，決定封肚唔再生。今胎是最後一次佗 B，徐子淇特別感觸，見到囝囝出世後，竟失控爆喊近半個鐘，情緒遲遲未能平復，老公惟有出絕招，攬實安慰。
眼似媽鼻似爸
同李家誠結婚九年，上月底徐子淇再為李家添丁，生下第四胎，仲要係慈姑椗，幫老公湊成兩個好字。 B仔出世時重五磅七，頭髮濃密，眼大大而且有明顯雙眼皮，似足媽咪，至於鼻仔就遺傳了李家的家族特質，是大鼻仔一名。
星期二（六日），恒基發放三張相片，包括一張爺爺李兆基同 BB和李家誠兩公婆合照，一款 BB得意托頭相，以及爸爸媽媽親吻囝囝的溫馨合照；新聞稿中，李家誠同徐子淇透露兒子取名李建熹，由爺爺李兆基親自改。
「迎着這新成員回家，我們一家人都萬分興奮！小寶寶體重 5.7磅，活力十足，母子皆平安，我們深感福分，希望可以很快跟各位親友見面。
「大姐姐晞彤，二姐姐晞兒和榮升哥哥的俊熹，對家中再添一位小弟弟都雀躍萬分，對小寶寶愛護有加，令整個家更添歡樂溫馨！」
改變主意五變四
除了三張官方發相外，徐子淇私下亦有將 BB介紹給她的朋友圈認識，本刊得到其中一張她 send給親友的私密 B相，相中造型相當特別，小建熹被一塊網布包住，十足蠶繭一樣， BB當時瞓到成口都係口水，超趣致。
已經生了四個，徐子淇同老公商量後，決定夠籌收工，封肚唔再生。
「之前子淇有講過想生五個，因為佢開刀生，最多可以開五次，所以想生夠五個，覺得大家庭熱鬧啲。但今次有咗建熹之後，佢開始改變主意，湊住三個小朋友已經唔容易，每日單係湊返學放學，陪做功課，同小朋友去玩做運動，已經用咗好多時間，加上佢樣樣都要親力親為，唔想依賴工人，如果同時照顧四個，佢覺得已經係極限。所以同老公達成共識，決定提早封肚。」徐子淇身邊人說。
生完三日提早出院
據了解，由於今胎是收工之作，生完 BB後，徐子淇第一眼望見囝囝時，竟然當場爆喊，情緒相當激動，喊了近半個鐘，要老公攬實呵番，才慢慢平復。
「子淇有講話今次生 BB之後喊得好勁，比之前生嗰三胎都喊得多，可能係諗到係最後一次， BB同自己身體一齊咁多個月，一下子分開，所以特別感觸；佢仲話嗰種感覺好奇怪，唔識點形容，所以喊咗好耐。」徐子淇身邊人說。
孻仔孻心肝，但徐子淇唱反調。一般情況下，剖腹分娩要留院五日，但徐子淇因為牽掛住屋企另外三個小朋友，生 B後三日，已經要求醫生，批准她提早出院。
經醫生檢查後，認為她的傷口康復進度良好，最終簽字放行，讓心急媽咪提早返屋企，休養陪小朋友。
添孫大陣仗
32歲的徐子淇， 06年嫁入李家，九年抱四，而每次誕下男孫，老爺李兆基都重重有賞，出手闊綽。
二女 晞兒
派萬元利是
每次四叔添孫，李家都會大派利是。 07年，大女晞彤出世，四叔以個人名義，向恒基員工每人派一萬元利是；二女晞兒出世撞正金融風暴，四叔想低調，未有豪派；到 11年添丁，四叔再向恒基直系千五名員工，派出總值 1,500萬元的萬元利是。
大仔 俊熹
送豪宅起堡壘
四叔為獎勵新抱為李家開枝散葉，生頭兩個女時，徐子淇已獲贈麥當勞道四千呎豪宅；男孫俊熹出世後，四叔更加豪氣，以 18.2億購入山頂白加道 35號地皮，興建三間獨立屋，李氏三父子每人各佔一間。
成立教育基金
過往兩孫女出世，每人都各自獲設 5,000萬教育基金； 11年，徐子淇成功追仔，四叔豪擲三億，為孫仔成立基金，培養成才。
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|
