掃呢頁CODE去手機

2015年10月22日 星期四

秋季日劇檢閱 新舊收視女王對決 [壹週刊 - 1337] M1,



電視精

秋季日劇檢閱 新舊收視女王對決

日劇一年分四季播出,剛剛播完夏季一輪,成績慘不忍睹,無論係收視定係口碑都差強人意,最有話題的《死亡筆記》平均收視得 11.5%!三個月過去,新一輪日劇又可以洗牌再嚟過!有上季嘅教訓,各家電視台不敢怠慢,秋季日劇卡士強勁,四位一線花旦分別擔正,四十出頭嘅天海祐希、篠原涼子,迎戰新進女神石原里美、新垣結衣,一爭收視女王之位!而男士孭飛嘅有阿部寬,一樣令人期待!

石原里美  Satomi Ishihara

與俊和尚結婚

《朝 5晚 9~俊俏和尚愛上我~》

最近香港一單和尚假結婚案件鬧得熱哄哄,事有湊巧今季日劇都有一套關於和尚結婚嘅日劇。故事改編自同名暢銷漫畫,女主角係夢想移民嘅英文老師,男主角係繼承家業嘅住持,兩個本來大纜都扯唔埋,因為一場相親結下不解緣。石原里美近年被封為「美唇女神」,今次喺劇中有多場講英文戲份,完全難佢唔到,日本人咁崇洋,講英文講得流暢好聽又加分!

天海祐希  Yuki Amami

假面女王回歸

《偽裝的夫婦》

天海祐希九年前憑《女王的教室》入面嘅冷酷演技打響名堂,近年多數演 Madam、女強人的硬朗角色,係日本最有女性觀眾緣的女演員之一。今季天海祐希唔使再做老姑婆或者單親媽媽,終於嫁得出,不過係假結婚!故事係講女主角性格孤僻,重遇大學時代拋棄佢嘅前男友,竟然向佢提出假結婚,向患絕症嘅媽媽交代,從而鬧出笑話。天海祐希再次與《女王的教室》嘅編劇合作,將感情收起,用假笑臉嘅 poker face做戲,少啲演技都唔得,劇迷引頸以待!

天海祐希喺劇中經常笑臉迎人,但皮笑肉不笑,無論有任何情緒都唔會表露,比《女王的教室》嘅黑口黑面更加難演。

新垣結衣  Aragaki Yui

偵探一日失憶

《掟上今日子的備忘錄》

另一套改編漫畫嘅作品。天才偵探女主角有一個怪病,記憶只係維持一日,瞓醒就乜都唔記得,於是所有案件佢都要喺一日之內破案,展現超強推理能力。新垣結衣一向印象入屋,作品收視有保證,加上今次男主角係之前於《律政狂人 2》合作過嘅岡田將生,兩人默契十足,處理搞笑情節得心應手,開播收視暫時領先!

篠原涼子  Ryoko Shinohara

獨身中女萬歲

《大人女子》

篠原涼子結咗婚做咗媽媽,反而繼續接拍愛情劇,兩年前喺《最後的灰姑娘》同三浦春馬嘅姊弟戀,為唔少中女帶來希望。新劇《大人女子》搵嚟幕後原班人馬,繼續講中女戀愛哲學,講 40歲女強人喺情場上如何見招拆招。同《最後的灰姑娘》唔同,《大人女子》行成熟路線,男主角唔要小弟弟,換上兩位型佬江口洋介及谷原章介,姊妹們會唔會更有共鳴?

愛情小品嘅女主角身邊總會有傾心事嘅知己,今次有吉瀨美智子及鈴木砂羽,三個女人圍埋傾偈,女劇迷特別代入。

反町隆史  Takashi Sofimachi

大熱查案系列

《刑偵相棒》

由老牌演員水谷豐主演嘅《刑偵相棒》系列,已經做到第 14季,今季開始換上新拍檔同佢一齊查案,就係反町隆史!今次係兩位演員第一次合作,劇迷甚為期待,加上《刑偵相棒》喺日本師奶圈堪稱神劇,結果第一集就高收超過 18%,對反町隆史嘅評價亦非常好,相信會係領跑今季日劇嘅作品。

阿部寬  Hiroshi Abe

翻版半澤直樹

《下町火箭》

《半澤直樹》續集開拍遙遙無期,於是原著作者池井戶潤嘅作品就成為電視台嘅吊命靈藥。《下町火箭》係池井戶潤於 2011年嘅得獎作品,都係講小人物力抗強權,故事同《半澤直樹》如出一轍,不過將背景搬到家庭式經營嘅工廠,對抗實現航天夢嘅大企業。男主角阿部寬好戲不在話下,但係有《半澤直樹》嘅成功,恐怕觀眾會有比較。

向井理  Osamu Mukai

豪門家族爭產

《遺產爭族》

爭產戲喺大台仲睇唔夠?估唔到今季日劇都有豪門家族爭產劇!其實呢種題材喺日劇比較少見,通常只係佔一小節,甚少成為主線,對日本觀眾嚟講幾新鮮!故事同大台嘅都係大同小異,男女主角梗係好人,然後同一班壞蛋親戚爭家產。向井理同榮倉奈奈可以話係選角恰當,不過呢啲戲通常都係綠葉至好睇,好多老戲骨都係日劇迷熟悉嘅面孔,值得一追。

撰文:關錦雯

鍾意就快D Share啦!