2015年10月28日 星期三

做足 15年小角色 不滿大台搵外援爭食 羅天池:訓練班咁多人都唔用 [FACE - 440] 大台,MF,TVB, 羅天池



羅天池演技受讚賞,可惜未有機會做主角,佢識泰拳兼係教練,仲識玩飛刀同棍術,名副其實周身刀,張張利!佢仲為我哋表演咗超級飛刀,下載 Face Pop有得睇!

爆 Like王

做足 15年小角色 不滿大台搵外援爭食 羅天池:訓練班咁多人都唔用

一個人喺一間公司打工十幾年,辭職一定有原因,問題係老細幾時至知呢個原因啫!

羅天池 15年前加入大台訓練班,唔靚仔但算幾四正、精通泰拳又識格鬥、演技又得到觀眾認同,可惜十幾年都係演一啲小人物角色,《愛.回家》嘅阿登、《畢打自已人》嘅牢騷岳都深入民心,主角就冇佢份!難得羅天池仍好樂天咁話:「我天生係一個配角!」

眼見高層唔俾機會、寧願請外援都唔用自己人, 37歲羅天池即使下月「光棍節」就同圈外女友結婚,亦決定離巢出去闖一闖。大台又少一個好員工囉!

F:《 FACE》 羅:羅天池

F:你最喜歡演過嘅角色係?

羅天池話對《愛.回家》最有感情:「大家關係好好,我哋有個 group會約埋飯聚。(有冇唔捨得你走?)佢哋話:『最緊要你鍾意,第時喺出面見囉!』」

羅:《畢打自己人》嘅牢騷岳同《愛.回家》嘅黃茂登小人物係最生活化嘅,你身邊唔會個個係律師,身邊梗有啲小人物。我都想演下奸角,個樣唔奸係冇問題,我相信一個演員係咩都做到嘅,只要你畀機會嘅話!

F:大台有冇畀機會你做主角?

就係鄭世豪 po呢張相,大家至知羅天池離巢,羅天池話:「當日執 locker好唏噓!我喺呢度成長,望住啲劇集宣傳貼紙覺得幾得意!柴九話齋人生有幾多個 10年?嚟緊 10年又會點?」 網上圖片

羅:我從來冇諗過做主角,我天生係一個配角!我係 born to be一個「最佳男配角」,我哋呢啲性格演員唔係好靚仔、高大,好卡通樣,我哋生存喺香港嘅市場同荷里活、大陸唔同,例如黃渤、 Jack Black可以做主角,香港一般係靚仔做主角,偶爾有黎耀祥或者歐陽震華係少數唔典型靚仔而做到主角,純靠實力,所以我目標係攞金像獎「最佳男配角」,哈哈!

F:你識格鬥技同泰拳等等,係咪一直冇得發揮?

羅天池願望係做一個打星,最欣賞李小龍同甄子丹。 網上圖片

羅:公司知道我識打,但好少用到,唔知點解,可能係佢策略或者做法,我好想表達,我呢啲唔怕辛苦嘅演員,希望可以做多啲,但反映都冇用。我哋問唔到高層,十幾年經驗話我知係冇用,惟有演戲時盡量加啲嘢畀自己博注意,做 TVB咁耐打得最多係《愛.回家》,但已經要走。

F:有冇對大台心淡?

喺《鐵馬尋橋》同馬明合作過,羅天池讚對方:「唔係個個主角都囂張嘅,馬國明啦、陳豪啦、徐榮啦、歐陽震華啦都好幫下邊啲朋友,態度好好!」

羅:都會,我哋呢行會有負能量,做 6、 7年就有,唉!點解仲做啲咁嘅角色呀?冇新人咩?你會咁諗,但又會算啦,喺心灰嗰陣又會有個角色俾你,咦,會唔會今次掂呀?原來諗多咗,呢個 dream好似永遠唔會完,又永遠繼續。𠵱家離開係有啲破釜沉舟,不如博一鋪,係生係死都試下我𠵱家要搵個經理人先,希望繼續演戲。

F:大台有乜令你最不滿?

羅:佢哋搵啲外援返嚟,或簽啲新晉歌星入嚟拍劇,其實我唔明點解訓練班咁多人都唔用,高矮肥瘦、靚仔靚女、有戲冇戲乜都有,唔用你搵佢哋返嚟做乜?訓練班開頭可以話係廉價勞工,學咗嘢咁耐係咪應該放手俾佢哋做呢?我又見唔到喎!搵啲 model返嚟拍偶像劇,點解唔搵佢哋呢?

F:𠵱家離開會有好發展嗎?

下月 11月 11日羅天池就同圈外人多多拉埋天窗,正在失業嘅天池認有壓力,但多得太太支持,佢至夠膽離開大台。

羅:𠵱家娛樂圈生態唔健康,得一間電視台冇乜競爭;但又咁講,嚟緊好多變化,網上平台多咗、媒體多咗,好多資金入嚟,外國資金又入嚟,亞視個牌又唔知點, now又拍劇,好多變數,又好似充滿希望。雖然結婚後會有壓力,但太太覺得我堅持咗咁耐,只要我考慮清楚佢都支持。

攝影:周倪瑩

鍾意就快D Share啦!
Related Posts Plugin for WordPress, Blogger...