Ruby同周永恒分手大約兩個月，現忙為舞台劇演出，及打理自家 model公司，她說：「呢一年冇收入，𠵱家先開始返我嘅工作。」
真面目
甩身 淫照後有驚恐症 失財 20萬 小三 Ruby撇周永恒：無法再忍受佢
因介入周永恒同趙頌茹婚姻，令原本冇人識嘅𡃁模 Ruby（劉依靜），成為出名小三，之後更變為正印，早前就被本刊拍得同周永恒喺深圳出雙入對，以為二人仲打得火熱。
上週五（ 16日）， Ruby接受《 FACE》訪問，首次詳述與周永恒的關係， Ruby堅稱與周永恒已分手一段時間，仲話阿 Roy成日無理取鬧搵佢做出氣袋，試過去街市買唔到菜都要被鬧，亦借咗唔少錢俾阿 Roy讀健身課程。同阿 Roy拍拖成年，零收入、孭上小三之名，𠵱家亦人財兩失，期間更患有驚恐症，「都冇聯絡喇，暫時都唔可以再做咩朋友，同佢講嘢會令我諗番好多唔好回憶！」
27歲 Ruby上年因為做咗周永恒小三，搞到周永恒同老婆趙頌茹分居，早前更被拍得陪住阿 Roy喺深圳做健身教練，以為二人仍然打得火熱；上週五（ 16日） Ruby為舞台劇《有限人生無限愛》綵排，大爆分手原因，仲話自己試過有驚恐症。
買唔到菜都鬧
「好大壓力，我嗰陣時有驚恐症，一起身或者瞓覺前心跳好快，去到成 1分鐘 150下咁快，跟住好驚，唔敢出門。」但被指小三唔係最大壓力， Ruby最唔開心係被指影祼照及情慾片流出，她說：「嗰個唔係我，嗰陣瞓唔到覺，又食唔到嘢瘦咗十幾磅。」
Ruby話冇諗過做小三，但承認同周永恒拍拖一年，在兩個月前亦已分手，但點解上個月被本刊影到？她說︰「𠵱家我哋真係冇聯絡喇，你哋影到喺深圳嗰日已經分咗手㗎喇！我係上佢朋友屋企唔係佢屋企，分手原因係好多小事積埋，佢情緒唔係好穩定，成日發我脾氣，試過有次一齊去街市，因為街市無菜賣而鬧我，呢啲我控制唔到。同佢一齊我覺得我 take care佢多啲，我想搵個穩定啲男友，暫時都唔可以再做咩朋友，同佢講嘢會令我諗番好多唔好回憶！」
「我叫佢返屋企㗎」
周永恒有家暴前科，問 Ruby有冇試過？佢就話︰「佢冇打過我，不過我心靈上受到好大創傷，無法再忍受佢。」做咗小三，形象跌落谷底， Ruby就好理智咁話︰「我覺得後悔都冇用。」咁究竟同周永恒係點開始？「起初佢同我傾屋企啲唔開心嘢，之後就話鍾意咗我，講到為咗我冇咗個屋企咁！點都好，件事我係有責任嘅，其實由頭到尾我都叫佢返屋企㗎。」
賠上事業，如今又同周永恒分手， Ruby可算人財兩失，「冇咗廿幾萬，佢使咗好多錢讀唔同嘅健身課程，嗰陣時我負責大家嘅生活費，到𠵱家都仲有啲錢喺佢度！我都唔想再聯絡，我都唔使佢還喇。」當大家以為周永恒重新做人轉行做健身教練，原來又係錯覺，「據我所知佢已經冇做喇……」唉！小三突然醒覺宣布分手，自稱人渣嘅周永恒又幾時先生性呢？
經典小三
除咗 Ruby外，中港台都有不少出名小三，雖然有曝光率，不過紅完一排就冇人理，其實都係靠自己穩陣啲，學 Ruby重新發展事業仲好啦。
採訪、撰文：娛樂組
攝影：林迅景
|
鍾意就快D Share啦！
|
|
|
