掃呢頁CODE去手機

2015年10月7日 星期三

估佢唔到 苦讀 7年變婚姻治療師 餅碎 Helena幫阿 Yu解抑鬱 [FACE - 437] MF,



由歌手轉做藝術治療師專業人士嘅餅碎 Helena,坦言最想將多年研究心得回饋香港,幫助基層人士。

真面目

估佢唔到 苦讀 7年變婚姻治療師 餅碎 Helena幫阿 Yu解抑鬱

前 Cookies成員 Helena(馬思恆),組合解散後隻身到美國進修藝術治療,讀完學士再讀碩士,苦讀 7年成功轉型為藝術治療師兼婚姻治療師,𠵱家仲向博士學位努力邁進!

雖然闊別香港多年,不過 Helena一直好關心香港,表明畢業後就會回流,本週四至六仲舉行首個藝術國際會議添!

唔講都唔知,原來 Helena私底下同阿 Yu趙頌茹勁老友,相隔咁遠都唔成問題,對於曾遭受家暴同婚外情嘅阿 Yu, Helena就話:「應該畀時間佢慢慢療傷。」

當年 9人組合 Cookie出道係威係勢㗎!可惜短短 3年就 9變 4, 9餅有 4餅已經離開娛圈。 圖片

週日( 4日), Helena接受《 FACE》訪問,大爆當初 Cookies解散後,自己情緒一度跌入谷底,每日匿埋一邊以淚洗面,最後靠畫畫先再次爬番起身,機緣巧合接觸到藝術治療科目,仲用咗 7年時間考獲碩士學位,成功由歌星仔轉做藝術治療師同婚姻治療師的專業人士,仲計劃將歷年研究心得回饋香港添!

唔覺 Theresa被杯葛

當初隻身到美國進修, Helena說:「 Cookies解散後心情好難平衡,會唔出街同不停咁喊!自己索性匿埋屋企整啲 art work嘢,之後喺美國接觸到藝術治療,仲好大興趣!」藝術治療要求碩士學歷, Helena前後用咗 7年時間終取得學位,仲身兼藝術治療師同婚姻治療師。

Helena同阿 Yu於拍攝劇集《青出於藍》認識,對於好友身受家暴同婚外情, Helena坦言對方最需要嘅係時間! 《蘋果日報》圖片

本週四至六, Helena就會在香港舉行「第 11屆國際表達藝術治療協會國際會議」,希望同香港人分享自己多年嘅研究心得。

Helena用咗 7年時間,終取得學士同碩士兩個學位,𠵱家仲向博士學位邁進,仲係 Cookies眾多成員之中最高學歷㗎!

回想 Cookies日子,問到 Theresa是否真的被排擠? Helena就話:「我所見到嘅,又唔覺得佢被人杯葛喎!可能佢哋年紀比我細,我嗰陣 19歲,佢哋都係 19歲以下,嗰個年紀難免有啲拗撬我覺得嗰陣 9個人喺埋一齊,經歷係好難得!可能年紀太細,好多事都唔識處理啫!」

12年「復出」過

12年, Cookies獲邀擔任 Shine表演嘉賓, Theresa同 Serena都缺席演出,最終只得 7餅同場,亦係散 band後最齊腳嘅一次!

Cookies由九餅變四女,當時仲有傳 Miki、 Stephy同 Kary杯葛 Theresa,事件至今仍然沒完沒了!

年初, Theresa喺微博撰寫數百字感想,大爆自己當初被排擠,令不和傳聞再度炒起。

家暴需要時間療傷

唔講唔知, Helena最 friend唔係 9餅,而係同年出道嘅阿 Yu,對於佢經歷家暴同婚外情, Helena直言空間最重要,「同阿 Yu係拍《青出於藍》識嘅!如果有家暴嘅時候,每個人嘅療傷過程同時間都有唔同,我覺得應該畀時間佢慢慢療傷,外界嘅人盡量唔好打擾佢!」

轉型專業人士, Helena亦堅拒復出唱歌,「唱歌跳舞真係冇乜興趣!拍戲就有興趣嘅!最大目標係做一個 non-profit機構!希望幫到一啲無能力、邊緣嘅人,而自己亦唔需要奢華生活,最緊要活得有意義。」

多才多藝嘅 Helena,本身仲係一名陶瓷老師,平時兼職教陶瓷幫補學費。

擁有碩士學位嘅 Helena(中),在美國生活圈子同娛樂圈有很大分別。

Helena拍落唔少作品,當中《六樓後座》仲同 Juno合作,難怪至今仍有鋪「戲癮」 圖片

餅碎下落

Cookies 9名成員, Kary榮升人妻繼續喺樂壇搏殺、 Angela就靠住把口留守主持界、 Miki同永安太子郭永淳感情穩定,等嫁階段;至於 Theresa就積極搵人仔,至於其餘 4位成員, Helena做埋碩士,其餘 3餅碎又點?

Gloria會計師

Gloria陳素瑩退出娛圈後增值自己,去到曼徹斯特大學修讀碩士學位,仲成功考獲會計師牌,𠵱家仲喺四大國際會計師事務所之一德勤返工。

Serena嫁人

Serena蒲茜兒現時已退出娛圈, 11年同男友拉埋天窗,翌年因要喺加拿大安胎,錯過擔任 Shine演唱會嘉賓。網上圖片

Elaine做 OL

Elaine何綺玲淡出娛圈後返到澳門生活,現時任職 OL嘅佢,去年 3月結埋婚,當時 Angela、 Miki、 Stephy同 Kary都有出席婚禮,姊妹情依舊。

採訪、撰文:娛樂組

攝影:鄭明川

髮型: Tani Bravender@Vidal Sassoon, Daniel Lam@ii hair&nail.

鍾意就快D Share啦!