無綫近年鬧小生花旦荒，唔少一線當紅藝人都唔續約，紛紛選擇離巢向外闖，令到劇集主角來來去去都係嗰幾個，可以擔大旗嘅女藝人越來越少。其實無綫過往同而加都有好多有樣、有演技又有觀眾緣嘅女藝人。
近日喺討論區就舉行咗無綫走漏眼有潛質做花旦嘅女藝人選舉，快啲睇下以下暫時頭五位女藝人係唔係大家覺得真係值得捧？
第五位：簡慕華
2000年落選港姐，相信大家對佢嘅印象就係秘書，好似《同事三分親》嘅Doris及最近《陪着你走》嘅阿Wing。由01年開始拍劇，可惜都係做閒角，戲份一直唔多，唔少網民讚佢有樣有演技，可惜無綫冇力捧佢，捧簡慕華真係可以考慮吓。
第四位：朱慧敏
04年港姐亞軍朱慧敏最為人熟悉嘅並唔係佢嘅演技，而係與梁榮忠喺05年發生車震事件，呢件事令佢形象插水。小三形象深入民心嘅佢，偏偏殺出一條血路，喺唔少無綫劇集入面有性感嘅演出，例如喺《珠光寶氣》嘅三點式及《天與地》入面同陳豪嘅床戲，成功引起大家關注，但係大家焦點並唔係佢嘅演技，只係佢嘅身材多啲囉。直至12年，佢喺《愛‧回家》飾演尹德如一角改變佢喺大家心目中嘅形象，唔少網民覺得佢演技有進步，仲好鍾意佢飾演嘅尹德如同黎諾懿飾演嘅馬壯呢一part而成功入屋。可惜有傳佢扮大牌，教對手做戲又教導演拍戲而得罪高層，最終仲被飛出劇組，之後就被投閒散置。得罪高層喎，仲邊有運行呀！
第三位：唐寧
就算唔講大家都知已經有2個仔女嘅唐寧係童星出身，至1989年開始拍電影同拍電視劇，近年仲參與舞台劇。唐寧自細參演好多唔同類型嘅劇集，但係從來未試過喺無綫獲得任何獎項殊榮及委任第一女主角，默默耕耘嘅佢大多數都只係做女配角。直到14年喺HKTV劇集《警界線》飾演丁小海先初嚐第一女主角滋味。唔少網民都話就算睇咗佢咁多年，都仍然百看不厭，唐寧拎第三位都可以話係實至名歸。
第二位：姚子羚
越嚟越靚嘅姚子羚喺02年參加《TVB8全能主持比賽》獲得冠軍而入行，佢第一次拍劇《當四葉草碰上劍尖時》就做第三女主角，不過之後喺大部份劇集只係擔任配角 （多數做人嘅細妹），戲份唔多。直到05年喺《酒店風雲》中 飾演壞表妹鄭可兒，雖然唔係骨幹角色但因出色嘅演技令佢成功獲觀眾關注，之後仲喺《鐵血保鏢》飾演利祥鳳，首次擔任第一女主角添呀！其實好多時姚子羚喺劇集中都有出色嘅演出（無論係正派定分派），但係每次都同獎項無緣。經過咁多年嘅演技磨練，加上觀眾又認同佢嘅演技，如果無綫下次捧佢做女主角，相信觀眾都會buy。
第一位：李佳芯
深得網民愛戴嘅李佳芯（Ali）12年離開有線轉投無綫，主持節目《學是學非》憑著標誌外貌開始被人留意。之後仲開始接拍劇集，喺《名門暗戰》飾演蔣承天(岳華飾)情婦及《倩女喜相逢》飾演九尾狐入型入格，網民對佢嘅演技更加有讚冇彈。做小三做到人見人愛嘅Ali，最近喺《無雙譜》中飾演段素四（田蕊妮飾）嘅婢女摘仙，雖然唔係咩重要角色，但仍然引起網民熱烈討論同瘋狂cap圖。無論時裝定古裝都咁靚嘅Ali，有樣又可塑性高，喺待播劇《波士早晨》及《潮流教主》開始擔當主要角色，唔少人都希望佢可以快啲上到一線。Ali咁受歡迎，捧佢真係有得諗架！
|
鍾意就快D Share啦！
|
|
|