林欣彤（右）唱功絕對唔輸蝕俾連詩雅（左），要追擊 Shiga其實唔難。
真面目
轉運 拒續約大台 英皇雪藏 林欣彤轉會追擊連詩雅
12年因嫲嫲中風及壓力而患上抑鬱症的林欣彤（ Mag），經過年多的治療後終於回復健康，重新投入生活。
11年簽約英皇後出過 4張大碟，但公司唔算力捧，冇乜邊首歌 hit，今年 6月出 EP更近乎零宣傳；而大台亦冇好好栽培 Mag，只間中派 Mag拍旅遊節目或出慈善騷，工作量少之又少。唔想愈撈愈霉， Mag決定轉會求變，拒絕續約大台及英皇，據最近同柏豪、連詩雅的 Starz People密密斟喎！
25歲林欣彤 5年前參加《超級巨聲》出道，最初被封「小巨肺」受大台力捧，及後迅即被英皇睇中，有得做容祖兒、謝霆鋒師妹。
大台投閒置散
上得快跌得快，林欣彤 11年因工作及生活壓力患上抑鬱症，全面停工接受治療，經過 1年多終於好番。可惜時間唔等人，復出後迴響不大，去年推出的大碟《 Mooooody Me》銷量一般，英皇今年亦只肯幫 Mag出 EP，而合約亦於早前無聲無息地完結，雙方都冇意思傾續約。
同時，《巨聲》二幫出身的林欣彤亦被大台投閒置散，相比起《巨聲》一幫的何雁詩已晉身小花行列有得拍劇，林欣彤明顯不受重用，只間中拍旅遊節目或上《勁歌金曲》做嘉賓，曝光率奇低！
挑機連詩雅
大台幫唔到手，林欣彤決定今年 10月約滿後唔再續約。據知有幾間公司想搵 Mag過檔，當中包括連詩雅所屬的 Starz People。
在大台多年有名無利，眼見 Starz幫旗下的連詩雅、周柏豪等傾到唔少廣告代言， Mag亦心郁郁想搵真銀。連詩雅近年狂接電影，《野狼與瑪莉》亦非常有話題，擺明要做新一代女神 icon；而林欣彤一向 sell唱功，兩個唔同 style，過咗檔都可以一山藏二乸啩！
銷「聲」匿跡
大台由 09年開始舉辦了 4屆《超級巨聲》，不過有頭威冇尾陣，巨聲幫愈捧愈奀，當中不少已經離開大台，甚至轉行退出娛樂圈。
採訪、撰文、攝影：娛樂組
|
鍾意就快D Share啦！
|
|
|