唐詩詠有樣有身材兼有演技，表現比起陳凱琳絕對唔輸蝕，不過公司大細超，離巢可能都係遲早問題。
真面目
冇碇企 捧晒港姐幫 做到心淡 唐詩詠：我哋好被動
大台小生花旦輪住走，講到尾都係同硬谷港姐幫上位有關，搞到一班默默耕耘多年嘅藝人心淡走人囉！最近連維基百科都顯示唐詩詠同大台完咗約，仲轉投蕭定一旗下喎！堅定流？
《 FACE》問過唐詩詠，雖然佢即時否認，不過就話中有話：「 TVB每年都會捧一啲人……我哋好被動嘅！」明嘅！話晒唐詩詠入行 12年，演技唔錯又好形象，不過就似足陳國邦，至今仍未試過做女一滋味，就算今次真係離巢都好易理解
大台除咗製作出名是是但但外，對旗下藝人亦明顯大細超，就連貢獻咗 15年青春嘅陳國邦都宣布離巢唔再續約，一句講晒，背後死因咪又係同公司硬捧一班新人上位有關！
蕭定一︰從來冇傾過
大台藝人紛紛離巢，就連親生仔女林峯、胡杏兒一樣冇面畀，出面大把公司爭住用，諗都諗到，大台喺藝人心目中，地位有幾咁「重要」！近日，《 FACE》發現維基百科顯示唐詩詠原來已經同大台完咗約，仲話佢已經泊到蕭定一呢個好碼頭添！
《 FACE》致電唐詩詠，佢即時澄清：「佢錯咗喇！我仲有好長約！（新人如陳凱琳上位快，會否意興闌珊？）我相信 TVB每年都會力捧一啲人，我都做咗一段時間，知道呢一樣嘢，對我係冇任何影響。我覺得自己心態一直都好好，亦都知道自己鍾意演戲，所以呢啲娛樂嘅嘢影響唔到我！（會不甘心？）其實我哋都係好被動嘅！最緊要做好自己，要時刻提醒自己！」蕭定一睇完維基百科，回覆就話：「咁搞笑？從來冇傾過！（有意簽？）公司暫時都唔會簽女藝人喇。」
犧牲品
大台爆發藝人逃亡潮，明眼人一睇就知咩事！仆身仆命為公司付出咁多年，點知到頭嚟都係難逃投閒置散厄運，心淡離場是常識吧！至於現時都仲有唔少藝人經歷咁嘅遭遇㗎！
採訪、撰文：娛樂組
攝影：娛樂組
|
鍾意就快D Share啦！
|
|
|
