2015年10月5日 星期一

上唔到飛機 搞到一肚氣 蘇民峰與網民fb爆罵戰 蘇民峰,





其他影片:>>






真係算唔到?

是咁的。堪輿學家蘇民峰噚日黃昏喺facebook貼文,狂呻本來要坐KA(即係港龍航空)出埠,點知佢喺貴賓候機室等咗好耐,都冇人通知佢上機,到佢趕到閘口嘅時候,飛機已經飛走咗,佢啲行李都畀人卸返落嚟,搞到佢一肚氣。蘇師傅仲因為呢件事喺facebook同網民舌戰咗一輪,你一言我一語,一個網民回應完又有一堆網民回應個回應,蘇師傅反擊網民回應咩,又有一堆人網民反擊佢個反擊......哇,沒完沒了,好煩呀!

嗱,等《蘋果》盡量簡單唔複雜咁組織返件事出嚟先!

話說噚日蘇師傅同一個人(好大可能係蘇太)好開心咁拖喼出埠去旅行(佢冇講,但應該係),坐三點幾機嘅佢,兩點幾到咗check in,當時未知去邊個閘口上機,佢就去咗貴賓候機室等通知啦,就係咁,等下等下,飛機都飛走咗咯!

蘇師傅之所以咁激氣,係因為佢話自己一直坐喺lounge等,但竟然冇人通知佢上機,但網民就唔同意佢嘅講法,認為佢將自己嘅責任推喺人哋身上,仲反問佢點解人人都知道要上機,係得佢唔知?又有網民仲寸爆咁叫佢delete個post,唔係會越嚟越多航空公司職員留言鬧佢。

講返蘇師傅個post先啦,佢係咁講嘅:「上唔到機-一生人第一次上唔到飛機,仲要係座在候機室內,多個巧合。1-幫我地出機票的人忘登記我地會員號碼。2-今天打風航班亂曬龍,班機延誤,再看以為再延誤,到發現無再延誤時趕去閘口,我們在起飛的時間趕到,但閘口人員說已經把我們的行李拿到飛機外,已經不能登機。

問題1-我們在候機室內還叫櫃枱的人幫我入返會員號碼,但他們居然沒有通知我們要登機了。

2-在候機室內已經十分留意講播,但並無聽到所搭的航班要登機的講播。

3-閘口人員發現到時間而還有人未去到閘口,起飛前居然沒有叫名找人。

4-我在起飛時間去到時閘口,閘口人員說已經把我們的行李拿出機外,所以我們不同能登機,有兩個已登記的乘客未上機居然也準時照飛,這是我未見過的。5-閘口人員說叫過貴賓室的員工找我們但沒找到,但我就坐在貴賓水吧旁邊每個人都看得見的大沙發上。種種種種種情況,導致上唔到到機。還要在機場等了一個半小時才能將行李拿回。現在回家了」

之後就有網民留言問佢係咪坐CX(國泰),蘇師傅仲即刻回應話係坐KA(港龍),網民就留言安慰佢,話航空公司服務越嚟越差,直到有人留言:「機場沒有廣播乘客名已很久很久了!千錯萬錯..有一疑問..!請問整架機有幾多人上唔到機?..如果全部乘客均有登機..又為何只有各下未有前往登機呢?」駡戰就開始喇!

蘇民峰對於嗰位網民質疑自己,最初回應話:「那個只是其中一個問題」後來對方再話:「當然有事發生好多時絕非單一問題..所謂衰開有條路..首先聲明對事唔對人!..但我真好奇..登機過程無可能3,2分鍾(鐘)完成..我相信至少半小時以上才能完成..整個機場登機資訊隨處可見!..每位乘客其實自我有責任留意登機時間..個人覺得雙方均有責任..不能一面倒將問題推向對方!..」就係咁,就辣㷫咗蘇師傅喇,仲嬲爆咁回應嗰個網民:「我只可以講你無知,又或者未搭過港龍,又或者無去過lounge」真係好好火喎!

不過,網民話明係對事唔對人,蘇師傅一句「無知」回應,令到好多網民睇唔過眼留言鬧爆佢,問佢點解要咁樣鬧人,唔少網民連串爆發咁留言問佢點解上機要人提?有人甚至叫佢不如改坐私人飛機。

蘇民峰可能覺得有航空公司職員踩場,一度反擊話:「明明係員工(指網民),做乜咁鬼鼠(祟)唧,而且我根本沒有開航空公司的名,根本不是要投訴誰,只是有些人越搞越大,搞到通曬天。」惟網民即時cap圖,證實他回應網民時,四度提及乘坐KA客機,叫他不要自打嘴巴,火藥味極濃。

結果蘇民峰喺該貼文後十小時再貼出「蘇語錄」:「批評-人要接受批評,頂得住批評,檢討自己對錯,有錯則盡量改善,無錯則一笑置之,才有改善空間,當然批評有善意惡意之分,惡意的那些,就不去管他好了。但現世代個人主意抬頭,不管善意、惡意,總之批評就是錯、是不懷好意。但人非聖賢 誰能無過,能在錯誤中學習改善過來,才能登高仰望。否則,一生只會在爭鬥中消耗自己而直至老死。」而踩場嘅人都離咗場喇,留言嘅都係撐佢嘅網民,不過蘇師傅就冇再回應喇!

蘇民峰喺fb表示上唔到飛機,之後就留言狂呻。(fb圖片) 蘇師傅同網民掀罵戰。(fb圖片)
蘇師傅同網民掀罵戰。(fb圖片) 蘇師傅同網民掀罵戰。(fb圖片) 蘇師傅同網民掀罵戰。(fb圖片)
鍾意就快D Share啦!
Related Posts Plugin for WordPress, Blogger...