被仔撇陰功豬，阿 Sa早前受訪提起分手都忍唔住眼紅紅。 《蘋果日報》圖片
真面目
有樓冇仔 失戀冇仔錢最親 阿 Sa揸過億物業搬新竇
蔡卓妍上月宣布同師弟陳偉霆的姐弟戀玩完，正式回復單身。有傳威廉在內地爆紅兼撻着趙麗穎導致分手，不過兩人都例牌否認有第三者介入。
慘被狠撇， 32歲阿 Sa惟有寄情工作。年尾 Twins跨年演唱會一開賣即爆場，證明孖妹仍有市場，搵埋唔少的阿 Sa狂買磚頭保值，今年 7月一擲 3,400萬買入大潭紅山半島 2千呎單位，唔再住近威廉屋企九龍塘，搬新竇療情傷！
英皇藝人鍾意買樓投資，大師姐容祖兒、謝霆鋒、古巨基全部係樓王樓后。 Twins孖妹都唔弱，各自擁有多個單位，其中阿 Sa更持有過億物業，比好姊妹阿嬌略勝。
複式都唔住
5年前公開與陳偉霆拍拖後，阿 Sa曾豪花 2千萬買入跑馬地慧莉苑頂層複式單位，打算與男友築愛巢，當時仲派 Sa媽親自監督裝修，希望新居有咁靚得咁靚！
可惜隨住 5年情玩完，阿 Sa決定另覓新竇，月前以個人名義、用 3,372萬買入大潭豪宅紅山半島一個 2千呎單位，更透過經理人 Mani透露物業用作自住，唔係入市炒樓。阿 Sa亦早已將裝修好的慧莉苑放租，死都唔肯搬入去住。
避走港島南
其實阿 Sa之前為了與家住九龍塘和域臺的威廉方便見面，曾租住九龍塘區的單位，不過分手後自然唔想撞口撞面，加上阿 Sa從小住慣港島南區，即使在樓市高峰期亦決定高位入市買下心頭好。
自己住得豪，出名孝順的阿 Sa亦非常照顧父母， 12年打本俾母親馮月茹，以 2,350萬買入跑馬地玫林別墅； 08年又與父親聯名買紅磡海濱南岸，單位當年只售 460萬，對吸金力驚人的阿 Sa當然唔係一回事！年尾 Twins合體開騷又賺一筆，睇嚟阿 Sa又可以睇定樓喇！
採訪、撰文、攝影：娛樂組
|
鍾意就快D Share啦！
|
|
|
