張淨思同李思捷喺 8月認識，當晚仲合照添，但原來李思捷第一日識人就摸髀，認真狼死。
真面目
急色 李思捷猴擒抽水 SM模爆：第一次見就摸大髀！
天生充滿溝女 DNA嘅李思捷，自從同春卷分手後，單身更加猖狂，最近有傳狂溝上圍 33 C，拍過《 3D肉蒲團》有裸露，又自爆同陌生男人玩 SM嘅張淨思（ Flora）。
張淨思更喺 facebook爆李思捷叫佢上屋企睇《今晚睇李》。
叫人上屋企未算狼，張淨思大爆李思捷首次見面就摸大髀，「叫我坐佢隔籬，博下我懵，佢摸我大髀。我諗呢個係佢打招呼方式，攞完我電話之後就同第二條女走咗。」攬緊女嘅同時仲可以溝第二條女，如果《今晚睇李》有呢啲情節，收視肯定好過𠵱家。
41歲李思捷天生愛溝女，當年就算同春卷拍拖時已經好花弗，𠵱家單身更加盡情發揮小宇宙，最近忙為新劇《爸 B有話兒》開工，劇中做單親爸爸，但現實中卻係風流小生，最近有傳佢狂溝 33C剝模張淨思，女方仲大爆李思捷好狼死。
捉手𢱑背脊
張淨思除咗係三級片女星，亦為全港出名裸模，每次做攝影裸模收$1,500一小時，入行前喺悉尼大學計算機科學系畢業，一直咁搏都係想有個演出機會。性格爽朗的她，提起李思捷都冇避忌，她說：「我話約佢出嚟飲嘢，佢話可以上佢屋企飲，點知佢就係咁播《今晚睇李》播咗兩個鐘，佢真係自戀狂嚟，成日想人氹佢㗎，要人當佢係寵物，捉住我隻手叫我幫佢𢱑背脊，我覺得唔啱 feel就走咗。冇發生過任何嘢。」
除咗上屋企外，張淨思仲爆李思捷首次見面已經出手抽水，她說：「我喺喬寶寶搞嘅一次飲嘢識嘅，佢叫我坐佢隔籬，博下我懵咁囉。（點博你懵呀？）佢摸我大髀囉，我話你咁樣我好驚喎，之後佢咪縮手囉，其實都好似冇縮，之後佢遞個電話俾我㩒，又錫我隻手，但攞完我電話就攬住第二條女走咗。」李思捷不如直播溝女啦，收視肯定高過《今晚睇李》！
爆埋又南金剛溝女招
除咗李思捷嗒糖外，張淨思仲爆黃又南同金剛都對佢好有意思，當中黃又南兩星期前送佢返屋企，她說：「佢送我返屋企，話想上嚟屋企參觀喎，我話屋企唔招呼人㗎。」嘩！好大粒檸檬喎。
採訪、撰文、攝影：娛樂組
|
鍾意就快D Share啦！
|
|
|
