今年五月，顧嘉煇榮休演唱會原本只邀吳若希鄭俊弘演出，「星夢」亦送埋胡鴻鈞、何雁詩。
探熱針
頂爛市 吳若希 X鄭俊弘 2.5萬有交易
喺無綫大晒的余詠珊，帶挈老公何哲圖做大台唱片部揸弗人，將綜藝節目同音樂獎項全部益晒自己友，但供過於求，旗下一班歌手根本冇人吼，為咗搶 job，實行大堆頭加劈價頂爛市！洗腦歌后吳若希連《星夢》冠軍鄭俊弘打孖上，唱騷價都係收兩萬五；想平啲，得！鄭俊弘加送胡鴻鈞、何雁詩，萬五！特餐常餐，任揀！
好使好用
一二年加入無綫後，余詠珊已部署大換血！唔係自己人的，陸續清空，換吓換吓，當年在有線只是主持旅遊節目的黃翠如、洪永城，都可以企穩戲劇組，成為阿姐阿哥，厲害！
大權在握，去年余詠珊策劃成立無綫唱片公司「星夢娛樂」，更安排老公何哲圖做行政總裁，閂埋門一家親，自此無綫綜藝科的節目和年尾音樂獎項，自己友玩晒，名正言順。
不過，即使日日用電視洗腦都於事無補，「星夢」歌手根本未成氣候，要靠賣大包劈價搶 job，洗腦歌后吳若希騷價只收兩萬，加送鄭俊弘才是兩萬五。
「吳若希雖然有首洗腦歌《愈難愈愛》，但佢無唱過紅館，又無其他 hit歌，收得貴根本冇人要，所以兩萬已經頂磅！至於鄭俊弘仲低，就算搭埋何雁詩、胡鴻鈞，都係收得萬五，算係好使好用！」知情者說。
密食當三番
頂爛市外，「星夢」亦以捆綁方式 sell客。
「 Herman（何哲圖）覺得低價搶多啲 job冇問題，起碼密食當三番，就算錢唔多，曝光當賺咗。公司入面最多人搵其實係許廷鏗，但都係收三萬，同樣係附贈胡鴻鈞、何雁詩，試過三個月接咗十幾個 job。好老實，除咗吳若希、鄭俊弘同許廷鏗單飛都有人考慮，其他根本冇人吼！
「而家市道唔好，好多客搵歌手唱騷，如果一嚿錢就有幾個人，一定會覺得抵好多；外邊嘅好似盧凱彤、連詩雅佢哋，一個人都收四萬啦，『星夢』頂爛市，真係唔夠佢哋玩㗎！」
過去曾是何哲圖旗下的鄭欣宜，當年出騷價只有一萬元，搞到欣宜自爆銀行得幾百蚊，要搵朋友接濟。
「欣宜而家去咗蕭定一公司，唱騷價都高番，唔會好似以前咁，幾平都好，有人要就接！」知情者說。
同級不同酬
歌星賺大錢，一定係靠開演唱會和做巡迴，未夠班開個唱的，收入就要靠商演或唱私人騷；無綫「星夢」旗下歌手低價接 job兼買一送幾，頂爛市。
★以唱兩首歌計
撰文、攝影、攝錄：娛樂組
|
鍾意就快D Share啦！
|
|
|
