探熱針
洗米華小四按摩上位 賭廳晒籌碼
過去一年，精力充沛的周焯華（洗米華）周旋於正印陳慧玲以及小三 Mandy Lieu之間，兩女一個東一個西，經常飛來飛去速遞氹女的他，再爆出有小四 Meko，陪坐私人飛機到韓國出席太陽城賭場活動。
據了解，小四暗撻洗米華已經半年，趁 Mandy要湊女，少咗時間陪周焯華周圍飛去外地傾生意， Meko乘虛而入，以為坐得定的她，「唔小心」出 po——「 wif my luv洗米華」自爆密切關係；令遠在英國的 Mandy即時發爛，周焯華火速飛倫敦交人，更要小四為事件發聲明道歉。不過，由美容妹變洗米後宮佳麗的 Meko，並不打算就此罷休。
開多間「廠」
上週三（十一月四日），爆出周焯華有小四 Meko後，有指身在倫敦的 Mandy Lieu即時開拖，玩出禍的周焯華惟有連隨補鑊，要求小四剷走所有證據和發聲明扮唔識外，又要 Meko充作是他朋友的
女友。
要氹掂洗米嫂和二廠 Mandy Lieu，周焯華本已分身乏術，勢估唔到，竟然還有時間精力，再開多間「廠」。據了解，擁有長腿及 33C身材的小四 Meko，還有一對巧手。
「 Meko做過好多間美容院，因為好識冧客，做按摩又做得零舍出色，好多客都指定要搵佢， keep到客又幫公司賺到錢，所以公司試過頒咗個金牌俾佢。 Meko好手勢，華哥都會搵佢按摩，不過今年中開始，佢就冇再做，後來先知係跟咗華哥。」知情者說。
乘虛而入
過去半年，要周圍飛巡視賭場生意的周焯華不時帶埋 Meko出埠，今年四月已經去過一次韓國，上月又陪飛越南。
「 Mandy生完 BB冇耐，個女仲細唔可以成日走開陪華哥四圍飛，所以俾到機會 Meko攝位。」
成功令周焯華開多瓣，小四 Meko除了手勢好，仲有一招！
「 Meko跳蛇舞都好叻，有時叫佢當眾表演，佢可以即嚟唔怕醜，華哥都讚佢跳得好。」
晒華哥禮物
明晒碼頭
據知， Meko每次去澳門，周焯華都會安排她搭直升機，又用 Rolls-Royce接。
「華哥不嬲對自己啲女人都闊綽，有時佢仲會俾 Meko落場賭幾手，每次都幾十萬上落。其實跟咗華哥之後， Meko好多時都放啲相上 fb同朋友圈，成日有意無意話俾人知佢今時不同往日，又試過將一隻鑲滿鑽石嘅錶晒俾人睇，慌死人唔知佢有老細咁。 Meko今次無端白事晒相晒恩愛，擺明係要俾 Mandy知」知情者說。
洗米仔唔執輸
老豆有新女，洗米仔周柏豪亦唔執輸，但父子品味就相差一大截。年中，他與二十五歲，從事金融的「嫩版吳辰君」 Lina撻着。在美國讀大學，畢業後返港工作的 Lina，年紀雖然較十九歲洗米仔大，但無礙發展，更不避嫌將二人食飯拍拖照，上載朋友圈。
「洗米仔之前喺倫敦個 ex Maisie都係長頭髮，但個樣清純啲，新呢個 Lina就比較成熟，佢做 finance但又唔見佢好忙，好多時都係玩呀食呀咁；同洗米仔一齊後仲由九龍塘搬咗去淺水灣，都好富貴。」知情者說。
洗米仔姊弟戀
停學閂水喉
得老豆真傳的洗米仔，對做生意亦愈來愈有興趣。去年跟同學在英國推出學生購物折扣 app，今年八月再推出另一個叫 WOW的新 app。
「原本柏豪打算唔讀書，但華哥唔俾，講到明若果唔繼續讀書，就閂佢水喉，等佢乜都做唔成。柏豪明知華哥講得出做得到，所以最後都冇咁做，免得激嬲老豆。」知情者說。
洗米嫂剝花生做慈善
老公賭場生意版圖愈大，「廠房」亦愈開愈多！周焯華小三、小四陸續有來，洗米嫂陳慧玲已經麻木，老公爆新歡的同時，正印人在北京出席慈善晚宴，之後留多幾日，遊覽散心。
有老爺和姑奶撐，洗米嫂守住頭家。早前接受曾訪問過何超瓊的澳門社交雜誌《 Gafencu Men》訪問時，她表示雖然自己喜歡食同玩，又會瘋狂買鞋，但近年開始多做慈善工作，希望幫助更多人。
撰文、攝影：娛樂組
|
鍾意就快D Share啦！
|
|
|
