掃呢頁CODE去手機

2015年11月4日 星期三

兩老細供車供樓 吳若希騷價 2萬揸 200萬波子 [FACE - 441] 吳若希,MF,



吳若希 40萬自置 Benz變咗 12年落地 200萬波子,新車登記公司昇運國際有限公司董事係郭志燊,郭生名下公司經常買下工廈,而位於北角的會計師樓亦係自置。

封面

兩老細供車供樓 吳若希騷價 2萬揸 200萬波子

八、九十後上樓勵志故,十個潮文九個假:自己儲 30萬,男朋友俾 300萬喎,咁都信,傻的嗎?

不過凡事都有例外, 23歲吳若希就係嗰十分一嘅成功例子喇!打份出名人工奀嘅大台工,頂爛市出騷價二萬五仲要同鄭俊弘分一半,未計公司抽佣,咁都有得越住越貴、越揸越豪,最新戰績係睇三千萬豪宅揸二百萬波子,而架新入手波子又係另一 uncle名下公司登記,真係要用高八度 200分具吳若希 mode驚叫一聲:「點解既!」點解又係 uncle?點解唔睇得又唔唔得嘅吳若希上位上樓買車極速,仲勵志過啲勵志潮文嘅?

無論 Benz定波子都係公司登記,公司東主又係年約五十大叔,周一(2日)本刊搵到車主、郭姓會計師大叔:「唔係好方便講!」

點解次次升呢都係關爸 B、大叔事嘅?點解新嗰架波子又係公司登記東主又係大叔嘅?點解 23歲人仔、出道得嗰五年,變樣變樓變車變得仲快過 Louis變杯麵嘅?覺得吳若希變錢得意過甄澤權變魔術嘅,請舉手!

圖文嚴重不符

成件事最「打耳」就係,吳若希搵幾多有數得計,唱紅《越難越愛》後收入大增,佢亦都親口向記者講過:「唔過 100萬,一半就有,( 14年)搵咗七十幾萬」至於 15年,年頭照顧踩單車受傷媽媽同忙外婆後事、主打拍劇賺得雞碎咁多大台騷錢、有限時間接商場騷,被指同鄭俊弘打孖上共收二萬五,忙到九月拍埋《實習天使》仲話喉嚨生嘢停工整整兩個月!條數點計都唔會搵得多過搏到盡嘅 14年,反而被傳媒影到殺入何文田、跑馬地睇豪宅,出入代步又係名車,上週二( 27日)就被本刊發現,停緊工嘅 Jinny又有錢換車,座架由 40萬 Benz一跳五倍變 200幾萬波子。

其實呢, Jinny唔係識變魔術,係同父輩叔輩特別有緣就真!初入行就離奇出席成龍 60歲生日派對自揭關係非一般,其後同 57歲股壇老手王弼燮傳出緋聞見完家長,又話背後有年過五十馬主「十哥」林棣權送車送樓。

嘴仔甜識叫唱片公司老闆何哲圖做「爸 B」,呢班年紀真係做得 Jinny爸爸嘅大叔亦都真係錫佢錫到親生女一樣,去年自稱自資 40萬買 Benz,等緊新車落地之時,有大叔借出 80萬 Range Rover代步,今次架 200萬波子就係公司登記、公司東主又係年約五十郭志燊,職業係會計師,咁啱同上次部 Benz公司登記東主係同一人。

在天后泊低部波子後,吳若希上咗一大廈疑似練歌。

大台最後作品係《實習天使》,結果着制服坐病床又俾人鬧。 網上圖片

已婚大叔:「證明我多車」

次次支出與收入不符被質疑都識見招拆招,被指搭上王弼燮即詐傻:「邊個 Jason Wong?我電話簿有好多個 Jason Wong!」被指得十哥厚愛送樓又送車就扮懵:「咩牌子?我連車款都唔知點買呀?冇諗住跑馬地,港島區完全冇諗過!」 Jinny最叻大大聲死口唔認,車主大叔把口就比佢差得遠。週一( 2日),《 FACE》在其天后會計師樓下終於等到郭姓車主真身,對住鏡頭郭生話:「唔係好方便講,呢啲係私隱,唔可以咁問我……你哋問錯人。我都係喺報紙雜誌見過佢(吳若希),我係會計師,又結咗婚,你一登我會收百幾個電話!」不過問到郭生 Jinny兩部車都係佢公司登記時,他就笑說:「咁咪好囉!哈哈……證明我多車,你哋咁樣問我真係答你唔到喎!」

最新緋聞對象,係拍《實習天使》後混熟既五線奀星黃子恒,孤男寡女坐 Jinny架波子赤柱同遊三粒鐘。 圖片

窮兵仔陪玩

有傳同花弗周志文離離合合,年頭至好返一齊去嘉年華,年中無嗱嗱反轉豬肚做金手指,篤走男方變大台棄將。 網上圖片

年初媽媽受傷、外婆病逝,大隻仔溫家偉陪去醫院又幫手湊細佬,大大隻擔得抬得合照就隔開成呎,呢啲咪最啱做觀音兵囉。 網上圖片

一度同出名靚仔籃球王子劉子健傳出私下極多互動,直至去年對方傳出露「雀」照被停賽,即劃清界線。 網上圖片

經常同吳業坤出雙一對一齊玩一齊食,有傳吳若希 523生日坤哥仲捐出 523蚊俾慈善團體,追女出晒面。 網上圖片

大叔剎手

18歲出道,今年先得 23歲,吳若希個人經歷和交友圈子絕對同實質年齡不符。入行前網傳做過 club女,入行後就不斷同年紀大佢倍幾既大叔傳緋聞,佢又自稱歷任男友至少年長 15歲,同大叔有緣。

十哥

住宿代步連環跳級,吳若希生活大改善後屢次被傳背後金主係地產富豪、人稱十哥的林棣權。

《蘋果日報》圖片

爸 B

星夢老闆何哲圖身為簽女捧女老江湖,一樣俾吳若希句「爸 B」叫到暈晒大浪,成個星煥,錫 Jinny錫到出面。

老豆

被影到約埋食飯、親密拍頭,吳若希就話戴榮添( Simon)有份帶自己入行,平時叫佢老豆喎。

《蘋果日報》圖片

股佬

同年長 15年前度談婚論嫁卻被母親棒打鴛鴦後,結識 57歲陳淑蘭前男友、昔日股壇神童王弼燮,如果係真,父女戀年齡相差足足 35年。

越貴越愛

在福建出世長大, 10後移民香港,吳若希話過初到埗被同學恥笑新移民、又要同媽媽、外婆、舅父、細佬逼住 400呎公屋。不過短短幾年知名度同富貴程度幾何增長,睇怕班同學恥笑咗唔係好耐。

昔日福建本來屋企開酒店、家住 2000呎大屋,自稱因為爸爸爛賭全部輸晒,其後同爸爸不相往來,跟住媽媽移民香港入住公屋。

搬竇

入行後未走紅先搬屋,不過萬五蚊月租翔龍灣一樣住咗冇耐,已經升呢入住四萬月租何文田、以 80萬 Range Rover代步。

換車

自稱 Range Rover係朋友借出,作為自資 40萬 Benz未交車時代步之用。不過自資買新車,未夠一年又淘汰換車? 《蘋果日報》圖片

再換車

又話 Benz自資,不過登記車主係會計師,最呼之欲出係否認富貴,但新車波子又係同一個會計師登記。

一籮𤓓

背後兵多大叔多,原來又唔代表有觀眾緣喎。吳若希出道五年,除咗好叻叻炒股票,可以買六位數字股票,但有得揸七位數字車同睇八位數字樓外,最巴閉都係成日可以做潛力圖,其他人恨都恨唔嚟。

攝石

〈越難越愛〉攞金曲金獎但攞唔到人心,同最受歡迎男女歌手一齊影張相,都被 C笑係硬入攝石人。

半邊

Do姐好可能同吳若希有私人恩怨,繼《勁歌》合照唔俾吳若希攝入後,亮燈辛苦攝得入又要 cut走半個頭,又幫 Jinny做笑料。

刺耳

其實係人睇魔術都鍾意問點解,不過吳若希問得特別多特別刺耳,年頭主持《街頭魔法王》又係,搞笑度強過穿崩 Louis。

升呢要靠貴人

吳若希年紀輕輕但冧「叔叔」有一手!查實圈中同樣有唔少女星都收入支出極度唔成正比,冇乜 job,但就可以享受富豪般生活,講到尾又咪係同身邊嗰位「貴」人有關囉!

傅嘉莉:搬南灣

上年被影到同新加坡猛人「肥叔叔」喺的士又攬又啜嘅傅嘉莉,雖然做咗大台親生女月入只得兩萬,不過就享有名車兼司機接送「福利」,仲月租 6萬住南灣千呎豪宅,加上得閒作客請食飯,條數好難計!

網上圖片

《蘋果日報》圖片

朱晨麗:坐頭等

喺大台月薪只得萬五蚊嘅朱晨麗,出入司機包接送,歐遊坐頭等,之後又用咗 700萬買入將軍澳 The Parkside單位,仲搬到月租 15萬嘅金鐘太古廣場栢舍服務式住宅,好難怪有指背後有大水喉射住嘅!

圖片

《蘋果日報》圖片

葉翠翠:買大屋

港姐葉翠翠同富商黃有龍傳完緋聞,月入得萬三但竟然可以有三千萬本錢掃北角豪宅賽西湖大廈兩個單位,之後繼續以樓換樓方法搵錢,直至今年 7月下嫁建築師兼公司副董事周曉東,終於可以收心做富貴人妻。

《蘋果日報》圖片

圖片

陸詩韻:住半山

港姐陸詩韻當選後月薪唔夠一萬蚊,加上工作量又唔多,但出入竟然可以揸 30萬 Benz代步,仲由將軍澳居屋搬到渣甸山豪宅居住,生活幾級跳,十足阿太生活,可惜成日遇失匙夾萬打回原形。直至今日,仍撇甩唔到「專釣金龜」嘅頭銜。

圖片

撰文:娛樂組

攝影:攝影組

鍾意就快D Share啦!