探熱針
離婚分手重創 直擊 33歲生日買醉 阿 Sa大嗌：男人收皮
失過婚！蔡卓妍（阿 Sa）又被陳偉霆拋棄，再遇情傷的她，日前為慶祝 33歲生日大搞燒烤派對。成晚俾仔圍，但飽受離婚、甩拖重創的阿 Sa心情其實好差，不停自隊，飲到爆晒，更對住在場男人大嗌：「收皮」兼狂數男人成日講大話，擺明好傷！
瘦到紙板
一○年宣布跟鄭中基離婚，今年同陳偉霆的姊弟戀又玩完。週日（十一月二十二日），阿 Sa三十三歲生日，明知壽星女無仔陪，一班好友包括 Kary吳雨霏、 Yumiko及公司同事非常識做，安排在上週三（十八日）於大潭舉行 BBQ派對，提早為她慶祝。
女主角阿 Sa亦做戲做全套，不時自拍，又躲在大蛋糕後伸脷賣萌，放相上載微博，表面十分盡興。
本刊記者直擊當晚派對，發覺口口聲聲話自己冇事的阿 Sa，身體卻很誠實，就算穿上全套白色秋裝，仍然掩蓋不了紙板人身材，明顯消瘦不少。人前硬淨，亦玩得投入，當晚阿 Sa幾乎杯杯清， high爆。
溝酒自隊
由十點劈到深夜三點幾，壽星女一到埗，已不停自隊，紅酒溝白酒，完全冇擔心會醉，滿場飛的她更周圍撩人，全晚飲酒多過食嘢。
未到十二點，阿 Sa已經飲到成個關公咁！是夜出席 BBQ活動除了圈中友好，還有英皇和環球兩間唱片公司的工作人員，兩間公司分兩組玩包剪揼，其中人妻 Kary錫身冇喪劈，仲要睇住時間交人，阿 Sa當堂詐型：「最衰你結咗婚！」
之後，阿 Sa拎住支白酒周圍撩人隊，又豪氣說：「我陪你飲，幾大方，我哋英皇好大方㗎！」
飲完兩杯，望見附近有羽毛球場，阿 Sa話要打羽毛球，旁邊的友人 O晒嘴，但仍陪她打了兩板。其實跟陳偉霆拍拖時，二人都熱衷打羽毛球，當晚阿 Sa明顯睹物思人！
鬧男人講大話
過完手癮，阿 Sa坐番去男人堆撩人隊酒，「我同你一人一半，我哋呢啲有義氣，義氣仔女嚟吖嘛！」男性友人唔肯飲，阿 Sa即發脾氣大嗌：「收皮我都未見過你醉！」見壽星女唔 like，對方即乖乖自隊，阿 Sa才滿意說：「一陣送你返屋企，唔准揸車呀！」
之後滿面通紅的阿 Sa high到唱埋歌，又跟遲來的朋友說：「你咁遲嚟呀，我一早飲咗好多」飲大兩杯，阿 Sa忽然借醉高呼：「你哋啲男人，成日都講大話！」相當感慨。
契哥呵番
其間，有朋友要和阿 Sa飲杯，祝她生日快樂，阿 Sa即向搭住她肩膊的契哥、潮牌 Ground- Zero創辦人 Eri詐嬌：「我生日梗要錫住我，哥哥，係咪要錫住我呀？」 Eri只好不停幫她按摩，儘量安撫。之後阿 Sa又 high爆高呼：「邊有人去生日會揸車㗎？呢個世界有的士㗎嘛！」
週日（二十二號）正日生日，阿 Sa拍住阿嬌出席活動搵真銀；生日前一晚，阿 Sa原打算由北京趕返香港慶生，怎料航班 delay五個鐘，結果要在空中度過三十三歲一刻。
「空中少爺同空姐知我生日送咗支香檳俾我，又將我團隊嘅人全部 upgrade晒。」問阿 Sa生日願望是否想快些拍拖？她說：「個個都咁講，隨緣」
阿 Sa與潮牌 Ground-Zero創辦人之一的 Eri相識多年，並以兄弟相稱。 BBQ當晚阿 Sa被朋友隊酒，醒目女即向旁邊的 Eri撒嬌，說：「哥哥，係咪要錫住我呀？」 Eri即刻軟晒，並由搭膊轉為幫阿 Sa按摩兼頂酒。
$138任食
阿 Sa生日舉行 BBQ派對的地方並非高級消費場所，而是$138任食的平民燒烤場。位處赤柱大潭道大潭篤村尾的燒烤場，地方可容納五十至八十人，早上及下午有滑水服務提供，收費另計，晚上則是任食任玩 BBQ，由於位置偏遠及無公共交通工具直達，所以人流不多，搞私人派對一流。
陳偉霆冧女
陳偉霆（ William）與前度阿 Sa的生日只差一天，以往二人亦多次合體搞生日 P。此情不再，二人的共同朋友大多企阿 Sa陣線，同 William割席。「班朋友本來都係因為阿 Sa先同 William玩，呢幾年佢哋都係一齊搞生日，大家都冇諗過 William會咁絕情，而家佢哋分開咗，我哋要玩都同阿 Sa玩 William覺得自己升晒呢，咪留喺大陸，做佢嘅小鮮肉囉。」其中一名友人說。
不過， William亦不愁寂寞。上週六（ 21日）三十歲生日，五千粉絲陪慶生。一向識冧女的 William，在派對上剝衫騷肌自摸，於新歌《 1121》 MV中又化身兔仔扮可愛狂送吻，為冧女，乜都得！
「佢個新歡趙麗穎拍嗰條祝賀片好大回響，班女粉冇呷醋，仲好支持佢兩個一齊。喺廣州搞生日派對嗰日係正日， William特登包咗架中港車，接佢屋企人到現場，見證佢有幾紅。」知情者說。
撰文、攝影、攝錄：娛樂組
|
鍾意就快D Share啦！
|
|
|
