吳鎮宇一向能屈能伸。做飛機師？得！之前喺《神經俠侶》扮癲佬，一樣得！今次喺新片《脫皮爸爸》扮阿伯，當然無問題。佢老闆古天樂個阿叔LOOK先大犧牲喎。古天樂有份投資嘅《脫皮爸爸》，改編香港話劇團得獎作品，由日本劇作家創作，講失業失婚中年男人要照顧患有腦退化症嘅阿爸，點知阿爸係咁脫皮，由八十幾歲慢慢脫到二十幾。古天樂做個仔，吳鎮宇就要扮演不同年紀嘅爸爸。咁嘅情節，明眼人都睇得出古老闆出錢捧自己爭影帝啦，咁又係呀，幾年前拍《竊聽風雲3》，古仔連跛佬都做埋，點知焦點去晒劉青雲度。之前拍《殺破狼2》，亦都要扮醜做大奸角。今次演個頹爆中年，一啲都唔出奇。但係，點解個造型，咁似扮智障嘅黎明嘅。
