噚日係胡杏兒嘅36歲生日，杏兒未來老公Philip Lee（李乘德）噚晚為女友喺中環PMQ舉行生日派對，仲盛傳會即場求婚。
呢晚杏兒勁多老友都到場見證呢個歷史時刻，好似馬賽、崔建邦、林二汶、姚子羚、胡蓓蔚（豹嫂）、李雪瑩、趙希洛、徐子珊、莊思敏、莊思明、莊思華、黃君馨、李思捷等等等等。
雖然喺會場入面忙住招呼朋友，但杏兒半夜仲將自己同未來老公嘅婚紗照放上微博，佢同老公Philip情深對望，仲留言道:「謝謝你，謝謝你每一天也讓我的臉上充滿笑容，謝謝你在過馬路的時候永遠站在有車的那一邊，謝謝你在我不吹頭髮睡覺的時候你會一路罵我一邊幫我吹乾，謝謝你，讓我知道原來我也可以是一個小女人，也謝謝你邀請我做你的終身伴侶，讓我對未來充滿信心和希望，thank you and I love you」
杏兒喺派對場內亦有片段喺朋友圈流出，杏兒喺現場話:「thank you very much for being here share happiness with us」(多謝大家來到這裡分享我們的喜悅)，片段中見杏兒好感動，身邊有兩位長輩應是雙方家人，亦表現得十分感動。
陳敏之於凌晨12點50分左右離開，佢接受訪問時話:「好開心，好感動，喊晒。」求婚浪唔浪漫?佢話:「好浪漫呀。」有咩承諾佢就話「你問返杏兒啦。」之後就話Philip現場冇跪，又話:「恭喜晒李生李太。」又表示佢哋冇公佈婚期，但應該都好快。
廖碧兒走時就話場內氣氛好開心，杏兒笑得好sweet，仲話感動到講唔到嘢，仲話成個求婚好有誠意，個蛋糕好貴。而林二汶就喺後樓梯陪一班賓客煲煙，不過其實嗰個位應該唔食得煙。
|
鍾意就快D Share啦！
|
|
|